ప్ర‌తీస‌భ‌లో ఒక ముస‌లాయ‌న ఉండేవాడు అంటూ జ‌గ‌న్ రెడ్డి చంద్ర‌బాబుని టార్గెట్ చేస్తూ మాట్లాడుతూ ఉన్నాడు. సీఎం వంటి గౌర‌వ‌ప్ర‌ద‌మైన ప‌ద‌విలో ఉండి ఆ ముసలాయ‌న ప్ర‌భుత్వం అంటూ బాబుని ఎద్దేవ చేస్తున్నాడు జ‌గ‌న్. ఎన్నిసార్లు ముస‌లాయ‌న అని ఆరోపించినా స్పందించ‌ని చంద్ర‌బాబు.. త‌న‌దైన శైలిలోనే దూసుకుపోతున్నారు. తానెక్క‌డికి వెళ్తే అక్క‌డకి జ‌గ‌న్ అండ్ కో ప‌రుగులు పెట్టేలా చేస్తున్నారు. ఇటీవ‌ల స‌త్తెన‌ప‌ల్లి నియోజ‌క‌వ‌ర్గంలో ప‌ర్య‌ట‌న‌కి వెళ్లారు. అక్క‌డ మంత్రి అంబ‌టి రాంబాబు డ్రైనేజీలో ప‌డి మృతిచెందిన బాధిత కుటుంబానికి రావాల్సిన చెక్ క‌మీష‌న్ ఇవ్వ‌లేద‌ని ఆపేశారు. ఆ బాధితురాలిని ప‌రామ‌ర్శించి టిడిపి నుంచి సాయం అందించారు బాబు. ఈ చ‌ర్య‌తో ఒక్క‌సారిగా మంత్రి ప‌రువుతోపాటు ప్ర‌భుత్వం ప‌రువూ పోయిన‌ట్ట‌య్యింది. మృతుల కుటుంబాల వ‌ద్ద ప‌రిహారంలో వాటా అడుగుతున్న మంత్రుల తీరుని మ‌రోసారి ప్ర‌జ‌ల ముందుంచారు బాబు. తూర్పుగోదావ‌రి జిల్లా ప‌ర్య‌ట‌న షురూ చేశారు టిడిపి అధినేత‌. ఒక్కో మంత్రి త‌న నియోజ‌క‌వ‌ర్గంలో రోడ్ల‌ని గుంత‌లు క‌ప్పించే ప‌ని, ధాన్యం కొనుగోలు చేయించే ప‌నుల్లో బిజీ అయ్యారు. ఇప్ప‌టివ‌ర‌కూ కాన‌రాని అధికారులైతే గ్రామాల్లోకి వ‌చ్చి మ‌రీ అర్ధ‌రాత్రి అయినా రైతుల వ‌ద్ద ధాన్యం కొనుగోలు చేస్తున్నారు. ఇదీ చంద్ర‌బాబు దెబ్బంటే! ముస‌లాయ‌న ముస‌లాయ‌న అంటూ ఆయ‌న‌ని జ‌గ‌న్ రెడ్డి గిల్లాడు. ఆయ‌న కుర్రాడి కంటే స్పీడుగా టూర్లు తిరుగుతూ జ‌గ‌న్ రెడ్డి స‌ర్కారునీ ప‌రుగులు పెట్టిస్తున్నాడు.

ఎవ‌రైనా మామూలు వ్య‌క్తులు ఒక‌ట్రెండు రోజులు క‌న‌ప‌డ‌క‌పోతే పేప‌ర్లోనో, సోష‌ల్మీడియాలోనో ప్ర‌క‌ట‌న‌లు గుప్పిస్తారు. అటువంటిది షాడో సీఎంలాంటి మంత్రి పెద్దిరెడ్డి రాంచంద్రారెడ్డి గ‌త కొద్దిరోజులుగా క‌న‌ప‌డుట‌లేదు. దీనిపై సీఎం కానీ, ఆయ‌న మంత్రులు కానీ నోరు మెద‌ప‌టంలేదు. ఎందుకంటే ఆయ‌న ఢిల్లీ పెద్ద‌లు అప్ప‌గించిన టాస్కులో బిజీగా ఉన్నారు. ఇటీవ‌ల వైసీపీకి చెందిన కేసుల‌న్నీ ద‌ర్యాప్తు న‌త్త‌న‌డ‌క‌న న‌డ‌వ‌డం, ఎప్పుడు కావాలంటే అప్పుడు అప్పులు దొర‌క‌డం వంటి కార‌ణాల వెన‌క కేంద్ర బీజేపీ పెద్ద‌ల స‌హ‌కారం ఉంద‌నేది అంద‌రికీ తెలిసిన బ‌హిరంగ ర‌హ‌స్యం. బీజేపీ-వైసీపీ క్విడ్ ప్రోకోలో భాగంగా బాబాయ్ హ‌త్య‌కేసు, లిక్క‌ర్ కేసు వంటి వాటి నుంచి వెసులుబాట్లు ఇవ్వ‌డం కేంద్రం చేస్తే, క‌ర్ణాట‌క ఎన్నిక‌ల ఖ‌ర్చు మొత్తం వైకాపా భ‌రించేలా ఒప్పందం జ‌రిగింద‌ని రాజ‌కీయ విశ్లేష‌కులు చెబుతున్న మాట‌. క‌ర్ణాట‌క ఎన్నిక‌ల్లో బీజేపీ ఓట‌మి ఖాయం అని స‌ర్వేల‌న్నీ తేల్చేస్తున్నాయి. వేల‌కోట్లు ఖ‌ర్చు చేసినా బీజేపీ గ‌ట్టెక్కే అవ‌కాశంలేదంటున్నారు. ఈ నేప‌థ్యంలో కోట్ల మూట్ల సాయంతోపాటు పోలింగ్ మేనేజ్మెంట్ లోనూ వైకాపా సాయం బీజేపీ తీసుకుంద‌ని వార్త‌లు వ‌స్తున్నాయి. ఏపీలో ఎక్క‌డ ఉప ఎన్నిక‌లైనా పెద్దిరెడ్డి ఓట‌ర్లు, పెద్దిరెడ్డి టూరిస్టులు పెద్ద ఎత్తున దింపుతారు. ఈ ఎక్స్ పీరియ‌న్స్‌ని క‌ర్ణాట‌క ఎన్నిక‌ల్లో వాడుకునేందుకు పెద్దిరెడ్డిని బీజేపీ పెద్ద‌లు తీసుకెళ్లార‌ని స‌మాచారం. వేల‌కోట్ల డ‌బ్బుని త‌ర‌లించ‌డంతోపాటు దొంగ ఓట‌ర్ల‌ని త‌ర‌లించే బాధ్య‌త‌లు పెద్దిరెడ్డే చూస్తున్నార‌ని గుస‌గుస‌లు వినిపిస్తున్నాయి. కేంద్ర బీజేపీ ఆదేశాల‌తో క‌ర్ణాట‌క‌లో ప‌నిచేస్తున్న మంత్రి పెద్దిరెడ్డి చాలారోజులుగా ఏపీలో క‌న‌ప‌డ‌టంలేద‌ని ఆయ‌న పేషీకి వెళ్లిన వాళ్లు చెప్పే మాట‌.

గ‌త కొద్దిరోజులుగా బాలినేని, వైకాపా అధిష్టానంపై కోపంగా ఉన్నారు. త‌న బావ అయిన సుబ్బారెడ్డి త‌న‌కి జిల్లాలోనూ, పార్టీలోనూ చెక్ పెడుతున్నార‌నే కోపంతో ఉన్నారు. ఈ నేప‌థ్యంలో వైకాపా అధిష్టానాన్ని బెదిరించేందుకు రాజీనామా అస్త్రం ప్ర‌యోగించారు. అయినా వైకాపా పెద్ద‌లు లొంగ‌లేదు. సరిక‌దా బాలినేని శ్రీనివాస‌రెడ్డిని పార్టీ నుంచి వెళ్ల‌గొట్టే ప్ర‌య‌త్నాలు ఆరంభించారు. వైఎస్ రాజ‌శేఖ‌ర్ రెడ్డికి బాగా ద‌గ్గ‌రైన తెలంగాణ‌కి చెందిన గోనె ప్ర‌కాశ్ రావుతో బాలినేనిపై ఆరోప‌ణ‌లు గుప్పిస్తున్నారు. ఆయ‌న సుబ్బారెడ్డిని వెన‌కేసుకొస్తూ బాలినేని అవినీతిప‌రుడంటూ రోజూ మీడియాకి ఎక్కుతున్నారు. త‌మ పార్టీ కాదు, త‌న‌కేం సంబంధంలేని గోనె ప్ర‌కాశ్ రావు త‌న‌ని టార్గెట్ చేయ‌డం వెనుక త‌న బావ సుబ్బారెడ్డి ఉన్నార‌ని బాలినేని అనుమానిస్తున్నారు.  వైవీ సుబ్బారెడ్డి టార్గెట్‌గా బాలినేని పరోక్ష విమర్శలు చేశారు. త‌న‌పై పార్టీలో కొంద‌రు వేస్తున్న నిందలు, ఆరోపణలు భరించలేకపోతున్నాన‌ని కంటతడి పెట్టారు. వైకాపా ఆవిర్భావం నుంచి నేను కీలకనేతగా వ్యవహరిస్తున్న నాపై గొనె ప్రకాశ్‌రావుకు  తీవ్ర ఆరోప‌ణ‌లు చేస్తున్నార‌ని, ఆయ‌న‌ని కావాలనే మాట్లాడిస్తున్నట్లు కనిపిస్తోంద‌ని ఆవేద‌న వ్య‌క్తం చేశారు. త‌న‌పై ఎమ్మెల్యేలతో సీఎంకు ఫిర్యాదు చేయిస్తున్నార‌ని వాపోయారు. పార్టీ మారుతున్నారంటూ కూడా ప్రచారం చేస్తున్నార‌ని,  ఇవన్ని ఎవరూ చేస్తున్నారో అందరికీ తెలుసు అని, త‌న బావ వైవీ సుబ్బారెడ్డిపై అక్క‌సు వెళ్ల‌గ‌క్కారు బాలినేని శ్రీనివాస‌రెడ్డి.

ఇటీవ‌ల వ‌ర‌కూ ముఖ్య‌మంత్రి ఏ స‌భ‌లో పాల్గొన్నా, ఏ స‌మీక్ష‌కి హాజ‌రైనా ఒక‌టే మంత్రం జ‌పించేవారు. అదే వైనాట్ 175. అది త‌న పార్టీ నేత‌లు, కార్య‌క‌ర్త‌ల‌కి ఉత్సాహం ఇచ్చే స్లోగ‌న్ అని సీఎంకి తెలుసు. వాస్త‌వంలోకి వ‌స్తే, పార్టీలో కోర్ టీములో వాళ్లుంటారో, ఉండ‌రో తెలియ‌ని గంద‌ర‌గోళ ప‌రిస్థితి. ముఖ్య‌మంత్రి జ‌గ‌న్ మోహ‌న్ రెడ్డికి వెన్నుద‌న్నుగా నిలిచే ఆయ‌న సామాజిక‌వ‌ర్గం ఎమ్మెల్యేలు, కీల‌క నేత‌లు దూరం అవుతూ వ‌స్తున్నారు. నెల్లూరు రూర‌ల్ ఎమ్మెల్యే కోటం రెడ్డి శ్రీధ‌ర్ రెడ్డి, వెంక‌ట‌గిరి ఎమ్మెల్యే ఆనం రాంనారాయ‌ణ‌రెడ్డి, ఉద‌య‌గిరి ఎమ్మెల్యే మేకపాటి చంద్ర‌శేఖ‌ర్ రెడ్డి పార్టీపై తిరుగుబాటు జెండా ఎగుర‌వేశారు. పార్టీలో నెంబ‌ర్‌2గా చెలామ‌ణి అయ్యే విజ‌య‌సాయిరెడ్డి చాలా రోజులుగా పార్టీ వ్య‌వ‌హారాల‌కు దూరంగా ఉంటున్నారు. జ‌గ‌న్ రెడ్డి ద‌గ్గ‌ర బంధువు బాలినేని శ్రీనివాస‌రెడ్డి ప్రాంతీయ స‌మ‌న్వ‌య‌క‌ర్త‌గా ఉండ‌లేనంటూ రాజీనామా చేశారు. వీరంతా దాదాపు వైకాపాకి దూరం అయిన‌ట్టే. వైకాపా నుంచి గెలిచిన ఎంపీ ర‌ఘురామ‌కృష్ణంరాజు చాలా రోజులుగా వైకాపా చెవిలో జోరీగ‌లా త‌యార‌య్యారు. తాడికొండ ఎమ్మెల్యే శ్రీదేవి క్రాస్ ఓటింగ్ పేరుతో దూరం పెట్ట‌గా..మ‌రో 18 మంది ఎమ్మెల్యేలు, ముగ్గురు ఎంపీలు టిడిపికి ట‌చ్‌లోకి వెళ్లార‌నే వార్త‌లు వ‌స్తున్నాయి. ఎన్నిక‌ల్లో 175 సీట్లు గెల‌వ‌డం అటుంచి ఇప్పుడున్న 151 మందిలో ఎంత‌మంది ఎన్నిక‌ల వ‌ర‌కూ జ‌గ‌న్ రెడ్డితో ఉంటార‌నేది ఇప్పుడు వైకాపాలో హాట్ టాపిక్‌గా న‌డుస్తోంది.

Advertisements

Latest Articles

Most Read