జగన్ రెడ్డికి రహస్య స్నేహితుడు. బీజేపీలో కీలక నేత. ఒకప్పుడు ఏపీ చీఫ్ సెక్రటరీ. తెలుగుదేశం పార్టీ అన్నా, చంద్రబాబు అన్నా ఒంటికాలిపై లేస్తాడు. ఆయన ఐవైఆర్ కృష్ణారావు. భోగాపురం ఎయిర్ పోర్టుకి రెండోసారి శంకుస్థాపన చేసిన జగన్ రెడ్డి..శంషాబాద్ ఎయిర్ పోర్టు ఘనత తన తండ్రిదని..ఇది తనదని ఒక రేంజులో ప్రచారం చేసుకున్నారు. దీనిపై తెలుగుదేశం పార్టీ తేదీలు, నిర్మాణాలు, ఫోటోలు, వీడియోలతో గట్టిగానే కౌంటర్లు ఇచ్చింది. అయితే టిడిపి అధికారంలో ఉన్నప్పుడు చీఫ్ సెక్రటరీగా పనిచేసిన ఐవైఆర్ కృష్ణారావు, టిడిపి ఆగర్భ శత్రువుగా భావిస్తారు. టిడిపి ప్రతీ నిర్ణయాన్ని తప్పుబట్టడంలోనూ ముందుంటారు. అనూహ్యంగా ఎయిర్ పోర్టుల విషయంలో వైకాపా ప్రచారానికి ఐవైఆర్ గట్టి కౌంటర్ ఇచ్చారు. నాటి శంషాబాద్ అయినా, నేటి భోగాపురం ఎయిర్ పోర్టుల నిర్మాణమైనా చంద్రబాబు కృషి విస్మరించలేనిదని ట్విట్టర్లో ఇచ్చిన ఘాటు రిప్లయి వైకాపాకి గట్టిగా తగిలింది.
news
రాష్ట్ర ప్రభుత్వ అధికారుల పై సంచలన వ్యాఖ్యలు చేసిన హైకోర్టు..
యథారాజా తథా ప్రజా అన్న చందంగా ఉంది ఏపీలో పరిస్థితి. ముప్పయికి పైగా కేసులున్న సీఎం కోర్టు వాయిదాలకి హాజరు కాకుండా ఎలా తప్పించుకుంటున్నారో, అధికారులూ కోర్టుల ఆదేశాలు అమలు నుంచి అలాగే తప్పించుకుంటున్నారు. అయితే హైకోర్టు ఈ సారి మరింత ఘాటుగా స్పందించింది. ఇప్పటివరకూ కోర్టులో సంబంధిత అధికారుల హాజరుకి ఆదేశించిన కోర్టు, తొలిసారిగా కోర్టు ధిక్కరణకి పాల్పడిన విద్యాశాఖాధికారులను జైలుకి పంపుతామని హెచ్చరించింది. ప్రైవేటు విద్యాసంస్థల్లో 25 శాతం సీట్లు పేద విద్యార్థులకు కేటాయించాలని గతేడాది ఏపీ హైకోర్టు ఆదేశాలు ఇచ్చింది. ఈ ఆదేశాలను అమలు చేయలేదని కోర్టు ధిక్కరణ పిటిషన్ దాఖలైంది. ఈ ఏడాది 90 వేల సీట్లలో 9,064 సీట్లు మాత్రమే పేదలకు కేటాయించారని తన పిటిషన్ న్యాయవాది వివరించారు. కోర్టు ధిక్కరణ పిటిషన్ పై విచారణ చేపట్టిన హైకోర్టు తమ ఉత్తర్వులు అమలు చేయకపోతే జైలుకు పంపుతామని రాష్ట్ర విద్యాశాఖ అధికారులను హెచ్చరించింది. 25 శాతం కోటా కింద ప్రైవేటు సంస్థల్లో ఎంతమందికి ప్రవేశాలు కల్పించారో చెప్పాలని నిలదీసింది. కేటాయించిన సీట్ల వివరాలను తమ ముందుంచాలని ఆదేశిస్తూ తదుపరి విచారణను జూన్ 27కి వాయిదా వేసింది.
టిడిపిని క్లీన్ స్వీప్ చేస్తానని ..క్లీన్ బౌల్డ్ అయిన బాలినేని
ప్రకాశం జిల్లాలో టిడిపియే లేకుండా చేస్తానని ప్రగల్భాలు పలికిన మాజీ మంత్రి బాలినేని శ్రీనివాసరెడ్డి అసలు తానే వైసీపీలో ఉంటాడో లేదో అన్న చందంగా తయారైంది పరిస్థితి. మంత్రిగా ఉన్నప్పుడు మాటలు కోటలు దాటేలా ప్రవర్తించిన బాలినేని ఇప్పుడు వైరాగ్యం ప్రవచిస్తున్నారు. వచ్చే అసెంబ్లీ ఎన్నికల్లో ఉమ్మడి ప్రకాశం జిల్లాలోని 12 నియోజకవర్గాల్లో వైఎస్సార్ కాంగ్రెస్ పార్టీ అభ్యర్థులను గెలిపిస్తానని ఆ పార్టీ జిల్లా అధ్యక్షుడు,మాజీ మంత్రి బాలినేని శ్రీనివాసరెడ్డి అప్పట్లో ప్రకటించారు. ఇప్పుడు జిల్లాలో ఉన్న నాలుగు టిడిపి స్థానాలు వైసీపీ ఖాతాలో పడేసి, క్లీన్ స్వీప్ చేసి చూపిస్తానంటూ శపథం చేశారు. అనంతరకాలంలో మంత్రి పదవి ఊడబీకేశారు. ప్రాంతీయ సమన్వకర్త పదవి ఇచ్చారు. అది కూడా నామ్ కే వాస్తే చేయడంతో బాలినేని ఏకంగా పార్టీ నుంచే బయటకెళ్లే ప్రయత్నాల్లో ఉన్నారు. చాలా రోజులుగా అధిష్టానంపై అసంతృప్తిగా ఉన్న బాలినేని ఇటీవల జిల్లా పర్యటనకి వచ్చినప్పుడు అలిగారు. అయితే బాలినేనితో బటన్ నొక్కించి కూల్ చేసిన సీఎం, మనసులో అసంతృప్తిని చల్లార్చలేకపోయారు. తాజాగా సమన్వయకర్త పదవికి రాజీనామా చేసిన సందర్భంగా సీఎం పిలిచి మాట్లాడారు. తన బావ వైవీ సుబ్బారెడ్డి తనను ఎలా ఇబ్బందులు పెడుతున్నదీ బాలినేని సీఎంకి వివరించారు. సొంత జిల్లాలో తనకి ప్రాధాన్యత తగ్గించడంపై బాలినేని అధిష్టానానికి వివరించినా అటు నుంచి ఎటువంటి స్పందన లేకపోవడంతో ఇక తెగతెంపులేనని తేలిపోయింది. చాలారోజులుగా బాలినేని జనసేనతో టచ్లోకి వెళ్లారనే వార్తలు వస్తున్నాయి. అయితే సీఎం జగన్ రెడ్డి కరెప్షన్ అంతా సెంట్రలైజ్ చేశాక, ఆయనకి తెలియకుండా తన వియ్యంకుడి భాస్కర్రెడ్డితో కలిసి వేలకోట్ల దందాలు చేస్తున్నారని తాడేపల్లి ప్యాలెస్ పెద్దలకి అనుమానాలు పొడసూపాయి. జాతీయ, అంతర్జాతీయ డీలింగ్స్, మంత్రిగా రష్యా పర్యటన, చెన్నైలో హవాలా సొమ్ముకోట్లు పట్టుబడటం, ట్రమడాల్ తయారీ సేఫ్ ఫార్మాలోనూ వాటాలు, మైత్రి మూవీ మేకర్స్లో పెట్టుబడులు ఇలా చాలా పెద్ద అవినీతి సామ్రాజ్యమే జగన్ రెడ్డికి విజిలెన్ష్కి దొరక్కుండా నిర్మించుకున్నారని జగన్ రెడ్డి అక్కసుతో ఉన్నారని సమాచారం. ఏపీలో దోచిన వేలకోట్లు జాతీయ అంతర్జాతీయ స్థాయిలో లావాదేవీలతో తమని మించిపోయారనే కోపంతో ఉన్న జగన్ రెడ్డి చివరికి బాలినేనిని పొమ్మనకుండా పొగబెట్టారని తెలుస్తోంది.
కేసు కొట్టేసారు సరే, మరి తుని రైలు ఎవరు తగలబెట్టారు ?
తునిలో రైలు దహనం కేసుని కోర్టు కొట్టేసింది. రత్నాచల్ ఎక్స్ ప్రెస్ దహనం వెనుక ఎవరున్నారో అందరికీ తెలుసు. కానీ ఈ కేసు ఆధారాలు లేని కారణంగా కోర్టులో కొట్టివేయబడింది. ప్రభుత్వం నుంచి ఈ కేసు విచారణకి సంబంధించిన సాక్ష్యాలు, ఆధారాలు అందకపోవడం వల్లే ఈ కేసు పోయిందని న్యాయనిపుణుల విశ్లేషణ. వైసీపీ ప్రభుత్వం, ఈ కేసులో ఆధారాలు ఎందుకు ఇవ్వలేక పోయింది? అనేది అందరికీ తెలిసిన బహిరంగ రహస్యం. తుని రైలు దహనం కేసుని కొట్టేస్తూ విజయవాడ రైల్వే కోర్టు కీలక తీర్పు వెలువరించింది. ఈ కేసులో 24 మంది సాక్షుల్లో 20 మందిని విచారించిన న్యాయస్థానం ఈ మేరకు తీర్పు వెలువరించింది. రైలు దహనం ఘటనలో ముద్రగడ, దాడిశెట్టి రాజా, నటుడు జీవీ సహా 41 మందిపై అప్పట్లో కేసులు నమోదు అయ్యాయి. టిడిపి ప్రభుత్వ హయాంలో కాపులకు రిజర్వేషన్లు కల్పించాలని కోరుతూ ముద్రగడ పద్మనాభం నాయకత్వంలో ఉద్యమం ఆరంభించారు. ఈ ఉద్యమం వెనుక వైకాపా రహస్య అజెండా ఉందని అప్పట్లో విమర్శలు వినిపించాయి. దీనికి ఊతం ఇచ్చేలా ఆ తరువాత పరిణామాలు స్పష్టం చేశాయి. 2016 జనవరిలో ఆందోళనకారులు తుని సమీపంలో రత్నాచల్ ఎక్స్ ప్రెస్కి నిప్పుపెట్టారు. అప్పట్లో 41 మందిపై రైల్వే పోలీసులు కేసులు నమోదు చేశారు. పోలీసు విభాగం, గవర్నమెంట్ రైల్వే పోలీసులు నమోదు చేసిన పలు కేసులను రాష్ట్ర ప్రభుత్వం ఎత్తివేసింది. ఆర్పీఎఫ్ కేసు పెండింగ్లో ఉంది. రైల్వే చట్టంలోని సెక్షన్లు 146, 147, 153, 174 (ఎ), (సి) కింద అప్పట్లో కేసులు నమోదు చేశారు. వీటిపై విచారణ చేపట్టిన రైల్వే కోర్టు తాజాగా కేసును కొట్టివేసింది. ఈ కేసులు కొట్టేసినా, ఎత్తేసిన తీరు చూస్తే వైసీపీ హస్తం దీని వెనుక ఉందనేది క్రిస్టల్ క్లియర్గా తెలిసిపోతోంది. కాపు రిజర్వేషన్లు కోసమే ఇదంతా జరిగిందనుకోవడానికి ఆస్కారమే లేనట్టు, వైసీపీ అధికారంలోకి వచ్చిన వెంటనే కాపు ఉద్యమంని ముద్రగడ ఆపేశారు. కాపులకు ఈబీసీ నుంచి 5 శాతం టిడిపి ఇచ్చిన రిజర్వేషన్ని వైసీపీ ఎత్తేసినా ముద్రగడ నోరెత్తలేదు. రైళ్లు తగలబడలేదు. ఈ పరిణామాలన్నీ గుదిగుచ్చి చూస్తే వైసీపీ కోసం వైసీపీ చేయించిన పెయిడ్ ఉద్యమం అని తేలిపోతోంది. టిడిపిని దింపడానికే రత్నాచల్ తగలబెట్టడం, కాపు రిజర్వేషన్ ఉద్యమం పేరుతో ముద్రగడ డ్రామా ఆడారని.. టిడిపి ఓటమి-వైకాపా గద్దెనెక్కించే తన లక్ష్యం నెరవేరటంతో కాపు రిజర్వేషన్ ఉద్యమాన్ని అటకెక్కించేశారని కాపులే తీవ్ర ఆందోళనలో ఉన్నారు.