కోలా గురువులు దురదృష్టానికి బ్రాండ్ అంబాసిడర్. ఇచ్చిన డబ్బు వసూలు చేసుకోలేని సత్తెకాలపు రాజకీయనేత. 2014 ఎన్నికల్లో వైసీపీ పెద్దలు తనని డబ్బు కోసం ఎలా పీల్చుకుతిన్నారో ఓ ఆడియో ఇప్పటికీ వైరల్ అవుతూనే ఉంది. ఎన్నికలకి ఎంత ఖర్చు పెడతావు అని జగన్ రెడ్డి బంధువులు అడిగేవారని 10 కోట్లు పెడతానంటే 20 కోట్లు అడిగేవారని, 20 కోట్లు రెడీ చేస్తే నలభై చూడమంటూ పీల్చుకుతిన్నారని ఆవేదన వ్యక్తం చేసిన రాజకీయ నేతే ఈ కోలా గురువులు. విశాఖపట్నం దక్షిణ నియోజకవర్గానికి చెందిన కోలా గురువులు మత్స్యకార సామాజికవర్గానికి చెందినవారు. ఆ ప్రాంతంలో మంచి పేరుంది. దీంతో రాజకీయరంగ ప్రవేశంచేసి 2009లో తొలిసారిగా ప్రజారాజ్యం పార్టీ తరఫున విశాఖపట్నం దక్షిణ నియోజకవర్గం నుంచి పోటీ చేసి 341 ఓట్ల తేడాతో ఓటమిపాలయ్యారు. ప్రజారాజ్యం పార్టీని కాంగ్రెస్ లో విలీనం చేయడంతో గురువులు జగన్ రెడ్డి వైసీపీలో చేరారు. 2014 ఎన్నికల్లో టిడిపి అభ్యర్థి వాసుపల్లి గణేష్ కుమార్ చేతిలో ఓడిపోయారు. 2019 ఎన్నికలకి ద్రోణంరాజు శ్రీనివాస్ కి టికెట్ ఇచ్చేశారు. ఆయనా ఓడిపోయారు. టిడిపి నుంచి గెలిచిన వాసుపల్లి గణేష్ కుమార్ వైసీపీలో చేరిపోయారు. ఏళ్లుగా కోలా గురువులుతో వైసీపీ కోసం కోట్లు ఖర్చుపెట్టించారు. ఒకసారి వైసీపీ టికెట్ పై ఓడిపోయారు. మరోసారి టికెట్ ఇవ్వలేదు. వచ్చేసారీ గురువులుకి టికెట్ అనుమానమే. దీంతోనే పాత బకాయిలు చెల్లు చేసేందుకు వైసీపీ అధికారంలోకి వచ్చిన తర్వాత మత్స్యకార అభివృద్ధి సంస్థ చైర్మన్ పదవిచ్చారు. దానికి నిధులూ లేవు, విధులు లేకపోవడంతో కోలా గురువులు గుర్రుగా ఉన్నారు. విశాఖలో నాలుగు నియోజకవర్గాలు టిడిపి చేతిలో ఉన్నాయి. మత్స్యకారుల ఓట్లు గణనీయంగా ఉన్నాయి. మత్స్యకారుల్లో మంచి ఫాలోయింగ్ ఉన్న గురువులు లాంటి వారు దూరమైతే మళ్లీ విశాఖలో ఓటమి తప్పదని గురువులుకి ఎమ్మెల్సీగా ఇస్తామన్నారు. వైసీపీ ఎమ్మెల్యేలు, టిడిపి నుంచి కొనుగోలు చేసిన నలుగురు, జనసేన నుంచి తీసుకొచ్చిన 1తో ఏడు ఎమ్మెల్సీ స్థానాలు కొట్టేయొచ్చనుకున్నారు. అయితే అనూహ్యంగా వైసీపీ నుంచి నలుగురు క్రాస్ ఓటింగ్ చేయడంతో కోలా గురువులు ఓడిపోయి, టిడిపి అభ్యర్థి పంచుమర్తి అనూరాధ ఎమ్మెల్సీగా గెలిచింది. దీంతో గురువులుకి మరోసారి అన్యాయం జరిగింది. ఎమ్మెల్యేగా గెలిచి అధ్యక్షా అనే అవకాశం కోసం చూస్తే అదీ దక్కలేదు. చివరికి ఎమ్మెల్సీగానైనా సభలో అడుగుపెట్టి అధ్యక్షా అందామంటే అదీ పాయే! వైసీపీ కోసం పెట్టిన కోట్లు వచ్చే దారి కనపడక గురువులు తీవ్ర ఆందోళనలో ఉన్నారు.
news
టిడిపి వరుస దెబ్బలతో, వైసీపీ ఫ్రస్టేషన్ పీక్స్..
వైసీపీలో సీఎం నుంచి వార్డు వాలంటీర్ వరకూ అందరిలోనూ ఫ్రస్టేషన్ పీక్స్కి చేరింది. ఎమ్మెల్సీ ఎన్నికల ఓటమి తరువాత ఇది మరింత పెరిగిపోయింది. వైసీపీ అధికారంలోకి వచ్చిన నుంచీ ప్రశ్నించే వాళ్లని నానా హింసలు పెడుతూనే ఉన్నారు. ఏకంగా ప్రతిపక్షనేత చంద్రబాబు ఇంటిపైకి రౌడీలు ఎటాక్ చేశారు. టిడిపి కేంద్ర కార్యాలయాన్ని ధ్వంసం చేశారు. మాజీమంత్రులు చాలా మందిని అక్రమ కేసుల్లో అరెస్టులు చేశారు. ఈ అరాచక పాలన నాలుగేళ్లుగా సాగుతోంది. తాజాగా ఎమ్మెల్సీ ఎన్నికల ఫలితాలలో మూడు చోట్ల పట్టభద్రుల స్థానాలు కోల్పోయింది. ఆ తరువాత ఎమ్మెల్యే కోటా ఎమ్మెల్సీ స్థానం ఒక్కటి, అది కూడా తనది కానిది వైసీపీ ఓడిపోయింది. ఈ ఫ్రస్టేషన్లో ఉన్న వైసీపీ అధినేతకి బాబాయ్ హ-త్య కేసు, ఢిల్లీ లిక్కర్ కేసు మెడకి చుట్టుకున్నాయి. దీంతో తీవ్రమైన అసహనంలో ఉన్నారు. అన్ని జిల్లాల్లోనూ విపక్షాలపై ఎటాక్స్కి వైకాపా శ్రేణులు దిగుతున్నాయి. అమరావతి ఉద్యమం 1200 రోజులకు చేరుకున్న సందర్భంగా వివిద రాజకీయ పార్టీలు సంఘీభావం తెలిపాయి. వారిపై డైరెక్ట్ ఎటాక్కి దిగింది వైసీపీ. తెనాలిలో టిడిపి కౌన్సిలర్ యుగంధర్ పై కౌన్సిల్ హాలులోనే వైకాపా నేతలు దా-డి-కి దిగారు. పుట్టపర్తిలో టిడిపికి చెందిన మాజీ మంత్రి పల్లె రఘునాథరెడ్డి కారును ధ్వంసం చేశారు. రాళ్లు, కర్రలతో వైసీపీ శ్రేణులు విధ్వంసం సృష్టించాయి. చూస్తుంటే, వైసీపీ రాష్ట్రవ్యాప్తంగా హింసాత్మక ఘటనలకి పాల్పడి అశాంతి వాతావరణం నెలకొనేలా చేసేందుకు ప్లాన్ చేస్తున్నట్టే ఉన్నాయి పరిస్థితులు. గన్నవరంలో పట్టాభిపై దా-డి రాష్ట్రమంతా చూసింది. సోషల్ మీడియాలో యాక్టివ్గా పోస్టులు పెట్టి ప్రభుత్వాన్ని ప్రశ్నించిన అంజన్ ని అక్రమంగా అరెస్టు చేసి గే అంటూ ముద్రవేశారు. టిడిపి సోషల్ మీడియాకి పనిచేస్తున్న అజయ్ అమృత్ కారులో గంజాయి పెట్టి అరెస్టు చేశారనే ఆరోపణలున్నాయి. మాజీ మంత్రి బాలినేని శ్రీనివాసరెడ్డి అవినీతి ప్రశ్నించారని సుబ్బారావు గుప్తాపై ఇప్పటివరకూ చాలాసార్లు దా-డి చేశారు. తాజాగా ఆయన కారులో గంజాయి పెట్టి అరెస్ట్ చేయించారు. ఇవన్నీ చూస్తుంటే ఓటమి భయంతోనే వైకాపా చేయిస్తోందని అర్థం అవుతోంది.
ధర్మాన నోటిదూలపై జగన్ కన్నెర్ర.. మినిస్టర్ టు స్పీకర్ ?
ఇటీవల కాలంలో మంత్రి ధర్మాన ప్రసాదరావు ప్రతీ రోజూ ఏదో ఒక వివాదాస్పద వ్యాఖ్యలు చేస్తూనే ఉన్నారు. అయితే ఆ వ్యాఖ్యలన్నీ తమ ప్రభుత్వంపైకే తిరిగి వస్తున్నాయని, తెలివిగా వైసీపీ సర్కారుని ఇరకాటంలో పెట్టేలా ధర్మాన తన తెలివిని ప్రదర్శిస్తున్నారని వైకాపా పెద్దలు గుర్తించారు. అన్న ధర్మాన కృష్ణదాస్ని కాదని మరీ మంత్రిని చేస్తే ప్రభుత్వాన్ని బద్నాం చేసేలా రోజూ ఏదో ఒక స్టేట్మెంట్ ఇస్తోన్న ధర్మానపై సీఎం జగన్ రెడ్డి సీరియస్గా ఉన్నారట. మంత్రివర్గ మార్పులు-చేర్పుల నేపథ్యంలో స్పీకర్ తమ్మినేని సీతారాంని మంత్రిని చేయనున్నారని సమాచారం. ధర్మాన ప్రసాదరావుని మినిస్టర్గా తప్పించి స్పీకర్గా చేయాలనుకుంటున్నారని విశ్వసనీయ సమాచారం. గతంలోనూ స్పీకర్ పదవికి ధర్మాన ప్రసాదరావు పేరు ప్రతిపాదిస్తే ఆయన వ్యతిరేకించి తీసుకోలేదు. ఇటీవల ఎమ్మెల్సీ ఫలితాలు మూడు రాజధానులకి రిఫరెండం అని ప్రకటించి అధిష్టానం ఆగ్రహానికి గురయ్యాడు ధర్మాన. స్థానిక ఎమ్మెల్సీ కోటాలో తన అనుచరుడిని దింపి ఏకగ్రీవం చేసుకోకపోవడం, పట్టభద్రుల ఎన్నికల్లో వైకాపా అబ్యర్థి ఓడిపోవడం వంటివన్నీ ధర్మాన మెడకు చుట్టుకున్నాయి. దీంతో మూడేళ్ల తరువాత వచ్చిన మంత్రి పదవి మూణ్ణాళ్ల ముచ్చటయ్యేలా ఉందని ఆయన అభిమానులు ఆవేదనలో ఉన్నారు.
తమ్మినేని, కొడాలి నానికి జగన్ బంపర్ ఆఫర్
జగన్ రెడ్డి కేబినెట్లో మంత్రిగా కొడాలి నాని లేని లోటు చాలా స్పష్టంగా కనపడుతోందని వైసీపీ పెద్దలు అభిప్రాయపడుతున్నారు. కొడాలి నాని ప్లేస్ ని ఆయనని మించే నోరున్న తమ్మినేని సీతారాంతో భర్తీ చేయాలని డిసైడ్ అయ్యారని తెలుస్తోంది. తమ్మినేని సీతారాం రాజ్యాంగబద్ధమైన, గౌరవనీయమైన స్పీకర్ పదవిలో ఉంటూ చాలా దారుణమైన భాషలో మాట్లాడడం, అసెంబ్లీలో ప్రతిపక్ష టిడిపిపై అధికార వైసీపీ ఎమ్మెల్యేల కంటే ముందుగానే స్పీకర్ తమ్మినేని మాటలతో టార్గెట్ చేయడం చూసిన జగన్ రెడ్డి ఆయనని మంత్రిని చేయాలని డిసైడ్ అయ్యారట.
కొడాలి నాని ప్లేస్ భర్తీ చేయడంతోపాటు, కాళింగులకు మంత్రి పదవి లేదని, తమ్మినేనిని మంత్రిని చేసి వారి ఓట్లకు గాలం వేయొచ్చనేది వైకాపా వ్యూహం అని అంటున్నారు. కేబినెట్ విస్తరణ దిశగా ముఖ్యమంత్రి జగన్ నిర్ణయాలు తీసుకోవచ్చని వైకాపా ఆశావహులు ఎదురుచూస్తున్నారు. మంత్రి పదవులు కోల్పోయేవారు, ఆశిస్తున్నవారు వరసగా సీఎంని కలుస్తున్నారు. తమ్మినేని సీతారాం సీఎం జగన్ రెడ్డిని తాడేపల్లి క్యాంప్ కార్యాలయంలో కలవడంతో బెర్త్ ఖాయమని గుసగుసలు బయటకొచ్చాయి. మొత్తానికి మంత్రివర్గంలో కొడాలి నానీని తమ్మినేని సీతారాంతో రీప్లేస్ చేయాలని సంచలన నిర్ణయం వైకాపాలో జోష్ నింపుతోంది.