నారా లోకేష్ గేమ్ ఛేంజర్. ఇప్పుడు ఇదే మాట తెలుగుదేశంలోనా, వైసీపీలోనా వినిపిస్తోంది. యువగళం పాదయాత్ర ఆరంభంలో జనం రావడంలేదని ట్రోల్ చేసే వైసీపీ నేతలు ఇప్పుడు ఏ నియోజకవర్గంలో, ఏ వైసీపీ ఎమ్మెల్యే అవినీతి బండారం బయటపెడతాడోననే ఆందోళనలో ఉంటున్నారు. పాదయాత్ర పూర్తయ్యే నియోజకవర్గంలో జరిగే యువగళం సభలో అక్కడి అధికార పార్టీ ఎమ్మెల్యే లేదా నేత అవినీతి చిట్టా ఆధారాలతో సహా బయటపెట్టేస్తున్నారు. పాదయాత్రలో వైసీపీ నేతల దోపిడీని సెల్ఫీ చాలెంజులతో ఎండగడుతున్న లోకేష్, బహిరంగసభలో అవినీతి ఆధారాలు బయటపెడుతున్నారు. అధికార వైసీపీ ఎమ్మెల్యేల కరెప్షన్ కథలన్నీ జనం మధ్య పెట్టేస్తున్న లోకేష్ ఆటని ఒక్కసారిగా మార్చేశారు. అనంతపురం జిల్లాలో పాదయాత్ర ప్రవేశించాక పుట్టపర్తి ఎమ్మెల్యే దుద్దికుంట శ్రీధర్ రెడ్డిని దోపిడీకుంట శ్రీధర్ రెడ్డి అంటూనే ..ఎక్కడెక్కడ ఎంత వసూలు చేశాడో వెల్లడించారు లోకేష్, పెనుగొండ, రాప్తాడు, ధర్మవరం ఎమ్మెల్యేల బండార బయటపెట్టడంలో లోకేష్ అధికార పార్టీనే సందిగ్దంలో పడేశారు. ఇన్నాల్లూ యూట్యూబ్ షార్ట్స్, ఇన్ స్టా రీల్స్లో హల్ చల్ చేసే ధర్మవరం వైసీపీ ఎమ్మెల్యే కేతిరెడ్డి వెంకటరామిరెడ్డి నిజస్వరూపాన్ని అవినీతి అనకొండ రూపాన్ని ప్రజల ముందుంచడంలో లోకేష్ తెగువని అందరూ ప్రశంసిస్తున్నారు.
news
జగన్ పై ఆ వ్యాఖ్యలు మోడీ ఎందుకు చేసారు ? అన్నీ తెలిసి, ఏమిటీ డబుల్ గేం ?
ఏపీని మరో పంజాబ్లా చేశారని వైఎస్ జగన్ ప్రభుత్వంపై ప్రధాని మోదీ కీలక వ్యాఖ్యలు చేశారని టిడిపి ఎంపీ (రాజ్యసభ) కనకమేడల రవీంద్రకుమార్ వెల్లడించారు. కుటుంబంతో కలిసి ప్రధాని నరేంద్రమోదీని కలిసిన సందర్భంగా ఆయన ఈ వ్యాఖ్యలు చేశారని ఎంపీ మీడియాకి చెప్పారు. పంజాబ్ లాగా ఏపీలో అరాచకం రాజ్యమేలుతోందని ఆందోళన వ్యక్తం చేసిన మోదీ, ఏపీలో శాంతిభద్రతలు రోజురోజుకు క్షీణిస్తున్నాయన్నారని ఆవేదన వ్యక్తం చేసిన ప్రధాని, అసలు ఏపీలో ఈ అరాచకం ప్రబలడానికి అన్నివిధాలుగా అండగా నిలుస్తూ వస్తున్నది బీజేపీ పెద్దలేనన్నది సుస్పష్టం. అన్ని రాష్ట్రాలకీ అప్పుల కోసం ఆంక్షలు విధించిన కేంద్రం, ఏపీ ఎప్పుడు కావాలంటే అప్పుడు అప్పు తెచ్చుకోవచ్చు..కలెక్టరేట్లు, తహసీల్దారు కార్యాలయాలే కాదు ఏకంగా తాగుబోతుల్ని కూడా తాకట్టు పెట్టి అప్పు తెచ్చుకునే వెసులుబాటు కల్పించింది మోదీ సారే కదా.. లిక్కర్ స్కాం అంటూ కవిత, శరత్ చంద్రారెడ్డి, మాగుంట రాఘవపై కేసులు పెట్టిన కేంద్ర సర్కారు, దేశంలోనే అతి పెద్ద లిక్కర్ స్కామ్లో ఏపీలో జరుగుతుంటే కనీసం కన్నెత్తి కూడా చూడటంలేదు. ఏపీలో అరాచకాలు సాగడానికి, పంజాబ్ లా జగన్ రెడ్డి మార్చేయడానికి అసలు కారకులు ఎవరో అందరికీ తెలుసు. అప్పులు, అరాచకాలు, అవినీతి ఏపీలో పెచ్చరిల్లి బీహార్ ని మించిపోయేలా, పంజాబ్ కంటే ఘోరంగా తయారు చేసింది జగనే అయినా, ఆయన వెనుకున్నది ఎవరో నెలలో రెండు అపాయింట్మెంట్లు ఇస్తున్న ఏలికలకి తెలియదా?
జగన్ ఓటమిని హైదరాబాద్ లో వైసీపీ ఎమ్మెల్యేలు సెలబ్రేట్ చేసుకున్నారా ? సంచలన విషయం బయటకు...
ఉరవకొండ సభలో నారా లోకేష్ కొత్త విషయాలు వెల్లడించారు. లోకేష్ చేసిన సెన్సేషన్ కామెంట్స్తో వైసీపీ వైనాట్ 175 కాదు, ఉన్న 151 మందిలో ఎంత మంది జగన్ రెడ్డితో ఉంటారో అనే సందేహాలు వెల్లువెత్తుతున్నాయి. ఉరవకొండ సభలో లోకేష్ తన ప్రసంగం తీరుని మార్చి వైసీపీ అంతర్గత రాజకీయాలని టార్గెట్ చేశారు. ఇటీవల వైసీపీ ఎమ్మెల్సీలు ఓడిపోవడాన్ని జగన్ రెడ్డి ఓటమిగా భావిస్తూ వైసీపీ ఎంపీ, ఎమ్మెల్యేలు హైదరాబాద్లో గ్రాండ్ పార్టీ చేసుకున్నారని సంచలన విషయాలను లోకేష్ వెల్లడించారు. పట్టభద్రుల ఎమ్మెల్సీ ఎన్నికల్లో వైసీపీ మూడుస్థానాల్లో ఓడిపోవడంతో వైసీపీ నేతలే సంబరాలు చేసుకున్నారనే ది ప్రచారం కాదని, నిజమేనని లోకేష్ వ్యాఖ్యలతో తేలిపోయింది. జగన్ రెడ్డి ఓటమిని సెలబ్రేట్ చేసుకున్నది సాదాసీదా మండల నేతలు కాదు. ఇద్దరు ఎంపీలు, 17 మంది వైసీపీకి చెందిన ఎమ్మెల్యేలు ఈ పార్టీలో ఉన్నారని ప్రచారం సాగుతోంది. వైసీపీకి చెందిన ఓ ఎంపీ రిసార్ట్లో రాత్రి ఆరంభమైన రాత్రి తెల్లార్లూ రంజుగా సాగిందట. మందు, విందు, చిందు, వినోదాలతో తేలియాడిన ఎంపీ, ఎమ్మెల్యేలు తమ పార్టీ అధినేత జగన్ రెడ్డికి పట్టభద్రులు సరైన గుణపాఠం చెప్పారని గెంతులు వేశారట. రిసార్ట్ పార్టీకి హాజరైన వారిలో ఎక్కువమంది జగన్ రెడ్డి సామాజికవర్గీయులు ఉండటం మరో ట్విస్ట్. పార్టీ కోసం తామెంతో శ్రమిస్తే ..గడ్డిపోచల్లా తీసి పారేసిన తమ అధినేతకి టిడిపి మంచిగా గుణపాఠం చెప్పిందని పార్టీలోనే కేకలు వేశారట ఎంపీలు. ఇప్పటికే అసమ్మతిలో బయటపడిన కోటంరెడ్డి శ్రీధర్ రెడ్డి, ఆనం రామనారాయణరెడ్డి, మేకపాటి చంద్రశేఖర్ రెడ్డి, ఉండవల్లి శ్రీదేవితోపాటు 17 మంది ఎమ్మెల్యేలు, ఇద్దరు ఎంపీలపైనా నిఘా తీవ్రతరం చేశారని తెలుస్తోంది.
జగన్ రెడ్డి కాలు బెణకడం వెనుక ఇంత స్టొరీ ఉందా ?
ముందు రోజు జగన్ రెడ్డి కాలి నొప్పి, తరువాత రోజుకే మాయం కావడంతో నాలుగేళ్ల క్రితం కోడికత్తి డ్రామాని గుర్తుకి తెచ్చిందని టిడిపి నేతలు ఆరోపించారు. టిడిపి ఆరోపణలు పక్కనపెడితే, తీవ్రమైన కాలునొప్పితో అసలు నడవడానికి కూడా వీలు కావడంలేదని, అందుకే ఒంటిమిట్ట సీతారామచంద్రమూర్తి కళ్యాణోత్సవానికి హాజరయ్యే పర్యటన రద్దు చేస్తున్నట్లు ముందు రోజు సీఎంవో ప్రకటన విడుదల చేసింది. మరుసటి రోజే చిలకలూరి పేటలో జరిగిన ఫ్యామిలీ డాక్టర్ కార్యక్రమానికి ముఖ్యమంత్రి హాజరై బెణికిన కాలుతోనే వేదికపై చెంగు చెంగున ఎగురుతూ కేడర్ని ఉత్సాహంలో నింపారు. ఒంటిమిట్ట హెలికాప్టర్లో వెళ్లేందుకు సహకరించని కాలు నొప్పి, చిలకలూరిపేట విడదల రజిని నియోజకవర్గంలో కార్యక్రమానికి మాత్రం ఒక్కసారిగా మంత్రమేసి కాలు బెణుకు తగ్గించినట్టు తగ్గిపోయిందా అని టిడిపి నేతలు ప్రశ్నిస్తున్నారు. మంగళవారం ఉదయం సీఎం జగన్ వ్యాయామం చేస్తుండగా ఆయన కాలు బెణికిందని, సాయంత్రానికి నొప్పి ఎక్కువైందని వైద్యుల సూచన మేరకు అధికారులు ఆయన ప్రయాణాలు రద్దు చేసుకున్నారని విడుదల చేసిన ప్రకటన పత్రికలలో అచ్చయ్యి ఇళ్లకు వచ్చేసరికి సీఎం షిక్కటి షిరునవ్వులతో గురువారం విడుదల రజని ఆధ్వర్యంలో ఏర్పాటైన సభలో చలాకీగా తిరుగతూ అందరినీ సంభ్రమాశ్చర్యాల్లో పడేశారు. టీటీడీ ఆధ్వర్యంలో ఏప్రిల్ 5న ఒంటిమిట్టలో కోదండ రాముడి కళ్యాణోత్సవాలు నిర్వహణకి పదిహేను రోజుల ముందు నుంచే ఏర్పాట్లు జరిగాయి. రాష్ట్ర ప్రభుత్వం తరపున ముఖ్యమంత్రి ముత్యాల తలంబ్రాలు, పట్టువస్త్రాలు సమర్పించడం ఆనవాయితీ. సీఎం జగన్ రెడ్డి కూడా ఏప్రిల్ 4వ తేదీ సాయంత్రం బయలుదేరుతున్నారని ఆయన మీడియా హడావిడి చేసిన అరగంటకే కాలు బెణుకు బ్రేకింగ్ వదిలారు. జగన్మోహన్ రెడ్డి ఉద్దేశ పూర్వకంగానే ఒంటిమిట్ట పర్యటన రద్దు చేసుకొన్నారని, అన్యమతస్థులు ప్రాపకం కోసమే ఉద్దేశపూర్వకంగా ఒంటిమిట్ట పర్యటన ఎగ్గొట్టారని బీజేపీ నేతలు ఆరోపించారు. కాలు నొప్పితో ఒంటిమిట్ట పర్యటన రద్దుచేసుకుని, తరువాతి రోజే చిలకలూరిపేట కార్యక్రమానికి వెళ్లడం..ఇది మరో కోడికత్తి డ్రామా అని ఎద్దేవ చేశారు.