news

తెలుగుదేశం పార్టీ అధినేత, ఆంధ్రప్రదేశ్ మాజీ ముఖ్యమంత్రి చంద్రబాబు నాయుడు, ఈ రోజు తనను గెలిపించిన కుప్పం ప్రజలకు కృతజ్ఞత చెప్పటానికి, ఈ రోజు కుప్పంలో పర్యటించారు. ఈ నేపధ్యంలో, స్థానిక నేతలు, కార్యకర్తలు, ప్రజలు చంద్రబాబుకు పెద్ద ఎత్తున స్వాగతం పలికారు. ఈ సందర్భంగా చంద్రబాబు మాట్లాడుతూ, భావోద్వేగానికి గురయ్యారు. కుప్పం ప్రజలకు జీవితాంతం రుణపడి ఉంటానని, ప్రచారానికి రాకపోయినా, ఏడు సార్లు తనను గెలిపించారని, ఇందుకు ఇక్కడ ప్రజలకు కృతజ్ఞత తెలుపుతున్నాని అన్నారు. గత 5 ఏళ్ళ కాలంలో, కుటుంబాన్ని కూడా పట్టించుకోకుండా, రాష్ట్ర అభివృద్ధి కోసం, రాష్ట్ర ప్రజల సంక్షేమం కోసమే పనిచేశానని చెప్పారు. తాను ఎక్కడా తప్పులు చేయలేదని, ప్రభుత్వంలో నీతివంతమైన పాలన అందించానని అన్నారు. ఎమ్మెల్యేగా చేసినా, ముఖ్యమంత్రిగా చేసినా, కుప్పం నియోజకవర్గ ప్రజల గౌరవాన్ని పెంచడానికే అనునిత్యం పని చేశానని చంద్రబాబు అన్నారు.

రాష్ట్ర విభజన జరిగిన తరువాతా, కట్టుబట్టలతో అమరావతికి వచ్చిన సమయంలో, అక్కడ కూర్చోడానికి కూడా స్థలంలేకపోయినా, ప్రజలకు ఇబ్బంది లేకుండా పరిపాలన చేసామని చంద్రబాబు అన్నారు. మన రాష్ట్రానికి, లోటు బడ్జెట్‌ ఉన్నా, ప్రజలకు ఏ ఇబ్బంది లేకుండా, సంక్షేమ కార్యక్రమాల అమలు చేసామని చెప్పారు. కుప్పం నియోజకవర్గానికి నీళ్లు వచ్చేంతవరకు నేను ప్రయత్నం చేస్తానని చంద్రబాబు అన్నారు. ఎన్నికల ఫలితాల పై సమీక్షలు చేస్తున్నామని, ఏ కారణాల వల్ల ఓడిపోయాం, మనం చేసిన తప్పులు పై విశ్లేషించుకుంటూన్నామని అన్నారు. కొన్ని బూత్‌లలో అర్థం కాకుండా ఫలితాలు వచ్చాయన్నారు. కార్యకర్తల పై దాడులు పెరిగిపోయాయి, వారిని ఆడుకోవాల్సిన బాధ్యత నా పై ఉంది, అందరినీ కాపాడుకుంటా అని చంద్రబాబు అన్నారు. తెలుగుదేశం పార్టీ పేదల కోసం పెట్టిన పార్టీ అని, తెలుగు జాతి కోసం పెట్టిన పార్టీ అని, ఈ పార్టీని కాపాడుకుని, మళ్ళీ ప్రజల ఆశీస్సులతో ముందకు తీసుకువెళ్లాలని చంద్రబాబు అన్నారు.

మా జీవితాలు నాశనం చెయ్యద్దు, మిమ్మల్ని నమ్ముకుని ఓటు వేసాం, నెల రోజుల్లోనే ఇలా చేస్తారా అంటూ, ఆరోగ్యమిత్రలు ఆందోళన చేస్తున్నారు. ఈ రోజు తాడేపల్లిలో ఉన్న జగన్‌ నివాసం దగ్గరకు వందలాదిగా వచ్చిన ఆరోగ్యమిత్రలు ఆందోళన చేస్తూ, తమ నిరసన తెలియచేసారు. జగన్ వస్తే తమ జీవితాలు మారతాయని ఓటు వేసి గెలిపించుకున్నామని, ఇప్పుడు అసలు తమ ఉద్యోగాలకే ఎసరు వచ్చిందని ఆందోళన వ్యక్తం చేసారు. తమకు ఉద్యోగ భద్రత కల్పించాలని నినాదాలు చేసారు. 11 ఏళ్లుగా మేము ఈ పని చేస్తున్నామని, ఇప్పుడు కొత్తగా పుట్టుకుచ్చిన వాలంటీర్లకు తమ విధులు అప్పగిస్తారన్న సమాచారం ఉందని, ఇలా చేస్తే మేము ఏమి చెయ్యాలి అంటూ ఆందోళన వ్యక్తం చేసారు. ఈ నిరసనలో 13 జిల్లాల నుంచి వచ్చిన మహిళలు పాల్గొన్నారు. మాకు జీతం ఇవ్వరని, కమీషన్ ప్రాతిపదికన పని చేస్తామని, అయినా సారే ఎలాగోలా నేట్టుకోస్తుంటే, ఇప్పుడు ఇది కూడా లేకుండా చేస్తారా, మా పని వాలంటీర్లుకు ఇస్తే, మా కమీషన్ తగ్గిపోదా అని నిలదీశారు.

గ్రామ వాలంటీర్ల వ్యవస్థ రాగానే, తమను తీసేస్తారనే ప్రచారం జరుగుతోందని, దీని పై జగన్ క్లారిటీ ఇవ్వాలని, ఉద్యోగాలకు భరోసా ఇవ్వాలని కోరారు. పోలీసులు ఎంత వారించినా వినకపోవటంతో, నిరసన చేస్తున్న మహిళలతో పోలీసులు వాగ్వాదానికి దిగారు. పోలీసుల వ్యవహరించిన తీరు పై మహిళలు తీవ్ర ఆగ్రహం వ్యక్తం చేశారు. ఓట్లు వేసిన మాకు, ఇదేనా చేసే న్యాయం అంటూ నినాదాలు చేసారు. రాష్ట్రంలో ఆరోగ్య పధకాలు అమలు చెయ్యటం వీరి పని. ఆరోగ్య పధకలాను ప్రజల్లోకి తీసుకు వెళ్లి, రోగికి వైద్య సహాయం అందిచటం, పధకాల గురించి అవగాహన, శస్త్ర చికిత్స జరిగిన సమయంలో బాగోగులు, తిరిగి ఇంటికొచ్చిన తరువాత మందులు తీసుకునేలా చైతన్య పరచడం, చికిత్స జరిగిన విధానంలోని అభిప్రాయాలు, ఫిర్యాదుల నమోదు, వైద్యశిబిరాలు నిర్వహించడం ఇంకా ఎన్నో వీరి విధులు. ప్రభుత్వానికి, ప్రజలకు వైద్య మరియు ఆరోగ్య సలహాలు అందించే ఓ వారధి అని చెప్పవచ్చు.ఇన్ని కార్యక్రమాలు చేస్తున్న ఆరోగ్యమిత్రలను తీసేసి, వాలంటీర్లు బాధ్యత అప్పగిస్తారని, రాష్ట్ర ఉన్న 18 వేల మంది ఆరోగ్య మిత్రల భ్యవిషత్తు నాశనం చెయ్యవద్దని జగన్ ని కోరుతున్నారు.

వైసీపీ నేత లక్ష్మీ పార్వతి పై లైంగిక ఆరోపణలు చేసిన కోటి, నిన్న బీజేపీ పార్టీలో చేరారు. ఏకంగా ఏపి బీజేపీ అధ్యక్షుడు కన్నా లక్ష్మీ నారాయణ, కోటిని కండువా కప్పి పార్టీలోకి ఆహ్వానించారు. అయితే ఈ పరిణామం పై, బీజేపీ అనధికార మిత్రపక్షం వైసీపీ, బీజేపీ పై అసహనం వ్యక్తం చేసింది. మా పార్టీ నేత పై లైంగిక ఆరోపణలు చేసిన కోటిని, మీ అధ్యక్షుడే పార్టీలో చేర్చుకున్నారు అంటే, మమ్మల్ని అవమానించనట్టె కదా అంటూ ఆక్షేపించారు. అలాగే సోషల్ మీడియాలో కూడా వైసీపీ కార్యకర్తలు, ఈ విషయం పై బీజేపీ పై విమర్శలు గుప్పించారు. కోటికి, మేడలో కాషాయం కండువా కప్పుతున్న కన్నా ఫోటో, సోషల్ మీడియాలో నిన్నటి నుంచి బాగా వైరల్ అయ్యింది. కోటి పై విమర్శలు చేస్తూ, లక్ష్మీపార్వతి కోటీ పై సిబిఐ విచారణ కోరుతున్నారని, అందుకే సిబిఐ విచారణ తప్పించుకోటానికి కోటి బీజేపీలోకి చేరారని, చేసిన తప్పులు బీజేపీలో చేరితే పోతాయా అని ? బీజేపీ పార్టీ పై సోషల్ మీడియాలో పోస్ట్ లు పెడుతున్నారు. దీంతో బీజేపీ ఆత్మరక్షణలో పడిపోయింది.

ఈ పరిణామాల పై ఆంధ్రప్రదేశ్ బీజేపీ అలెర్ట్ అయ్యింది. కోటిని బీజేపీలో చేర్చుకుంటే వైసీపీ దూరం అవుతుందని భావించిన నేతలు, కోటి చెరక పై వివరణ ఇచ్చుకున్నారు. కోటి బీజేపీలో చేరడం అనుకోకుండా జరిగిపోయిందని, అతని గురించి, స్థానిక పార్టీ నేతలకు సరైన సమాచారం ఇవ్వకుండా అతడు బీజేపీలో చేరారని ఏపీ బీజేపీ వివరణ ఇచ్చింది. అతను ఎవరో కూడా సరిగ్గా తెలియదని, కొంచెం కమ్యునికేషన్ గ్యాప్ ఉండటం వల్ల, కన్నా లక్ష్మీనారాయణ కూడా కండువా వేసారని చెప్పింది. బీజేపీలో కోటికి సభ్యత్వం ఇంకా ఇవ్వలేదని, అతడికీ బీజేపీకి ఎలాంటి సంభందం లేదని, అతడు బీజేపీ సభ్యుడు కాదని ఏపి బీజేపీ క్లారిటీ ఇచ్చింది. ఇందుకు సంబంధించి మీడియాకు ప్రకటన విడుదల చేసింది. మరి ఇప్పటికైనా వైసీపీ నేతలు శాంతిస్తారో లేదో చూడాలి.