news

తెలుగుదేశం పార్టీ, రేపల్లె ఎమ్మెల్యే అనగాని సత్యప్రసాద్ బీజేపీ పార్టీలోకి వెళ్తున్నారు అంటూ, ప్రచారం జోరుగా సాగింది. నాలుగు, అయుదు గంటలుగా ప్రచారం జరుగుతున్నా, అనగాని ఈ విషయం పై స్పందించక పోవటంతో, అందరూ నిజమే అని అనుకున్నారు. ఈ రోజు ఆయన గరికిపాటిని కలవటంతో, ఈ ఊహాగానాలు ఊపందుకున్నాయి. ఆయన అమిత్ షా ని కలిసారని, బీజేపీలో చేరిపోయారని, కొద్ది సేపటి నుంచి వార్తలు వచ్చాయి. ఈ మొత్తం వ్యవహారం పై మీడియా ముందుకు వచ్చారు అనగాని. తాను బీజేపీలో చేరుతున్నట్లు వస్తున్న వార్తల్లో ఎంత మాత్రం నిజంలేదని అనగాని సత్యప్రసాద్ అన్నారు. తాను వ్యక్తిగత పని మీద ఢిల్లీ వచ్చానని చెప్పారు. ఈ విషయం తమ అధినేత చంద్రబాబుకు కూడా చెప్పే ఢిల్లీ వచ్చానని ఆయన స్పష్టం చేశారు. గరికపాటిని కలవటం పై స్పందిస్తూ, గరికపాటి తమ కుటుంబానికి మొదటి నుంచి మంచి మిత్రుడని, ఆయన గత వారం రోజులుగా ఒంట్లో బాగోలేదు అని తెలియటంతో, ఆయన్నికలిసేందుకు వచ్చానని చెప్పారు.

తాను అమిత్‌షాను కలిసినట్టు వస్తున్న వార్తలతో నిజం లేదని చెప్పారు. తనకు అమిత్ షా ను కలవాల్సిన అవసరం లేదని చెప్పారు. ఒక పక్క గరికపాటి నడవలేని స్థితిలో ఉంటే, ఆయనతో కలిసి అమిత్ షా ను కలిసానని, వార్తలు వస్తుంటే, ఇంకా ఈ విషయం పై నేనేమి చెప్పను అంటూ మీడియాను ప్రశ్నించారు. ప్రస్తుత పరిస్థితుల్లో తెలుగుదేశం నుంచి గెలిచిన ఎమ్మెల్యేలు కాని, సీనియర్ నాయకులు కాని, ఢిల్లీకి వెళ్తున్నారు అంటేనే ఎదో పాపం చేసినట్టు చూస్తున్నారని అన్నారు. తన పై ఎవరూ ఒత్తిడి తేలేరని, తనను ఎవరూ ఒత్తిడి చెయ్యలేరని, నేను వ్యాపారవేత్తను కాదని సత్యప్రసాద్‌ తెలిపారు. తెలుగుదేశం పార్టీతో రాజకీయ ప్రస్థానం మొదలైంది అని, చంద్రబాబు ఎన్నో అవకాశాలు ఇచ్చారని, తెలుగుదేశం పార్టీని వీడి ఎక్కడికీ వెళ్లనని స్పష్టం చేసారు. అలాగే తెలుగుదేశం పార్టీకి చెందిన ఏ ఒక్క ఎమ్మల్యే కూడా పార్టీ మారారని, అందరూ టచ్ లోనే ఉన్నారని అనగాని స్పష్టం చేసారు.

తెలుగుదేశం పార్టీ పై బీజేపీ తన పగ తీర్చుకుంటుంది. ఎన్నికల ముందు వరకు రాష్ట్ర హక్కుల కోసం, చంద్రబాబు దేశ వ్యాప్తంగా తిరిగి, మోడీ పరువు తీసారు. ఆయన ఆంధ్రప్రదేశ్ రాష్ట్రానికి చేసిన అన్యాయాన్ని దేశమంతా తిరిగి చెప్పారు. దీంతో ఎలా అయినా చంద్రబాబుని ఓడించాలాని ప్లాన్ చేసి, జగన్ కు మద్దతు ఇచ్చి, అన్ని వ్యవస్థలు తమ ఆధీనంలో ఉండటంతో, చంద్రబాబుని ఓడించి, జగన్ ను గెలిపించారు. ఇప్పుడు తెలుగుదేశం బలహీనంగా ఉండటంతో, ఇదే అదనుగా, పార్టీలోని నాయకులు అందరినీ లాగేసే ఎత్తు వేసింది బీజేపీ... ఆంధ్రప్రదేశ్ లో అడుగు పెట్టటానికి ఇదే కరెక్ట్ టైం అనుకుని, వైసీపీ జోలికి వెళ్ళకుండా, తెలుగుదేశం నాయకులను లాగి, బలపడాలని చూస్తుంది. ఇందులో భాగంగా, తెలుగుదేశం పార్టీ నేతల్ని ఒక్కొక్కరిగా తమవైపు తిప్పుకుంటుంది. పోయిన వారం నలుగురు రాజ్యసభ ఎంపీలని లాక్కొన్ని, రాజ్యసభలో బలం పెంచుకుంది. తాజాగా తెలుగుదేశం పార్టీ నుంచి ఎన్నికైన ఎమ్మెల్యేలను కూడా తమ వైపు లాక్కునే ప్లాన్ వేసింది.

ఇందులో భాగంగా, గుంటూరు జిల్లా రేపల్లెకు చెందిన తెలుగుదేశం ఎమ్మెల్యే అనగాని సత్యప్రసాద్ బీజేపీలో చేరేందుకు రెడీ అయ్యారు. ఆయనతో పాటూ పార్టీ అధికార ప్రతినిధి వ్యవహరిస్తున్న లంకా దినకర్‌ కూడా బీజేపీలోకి వెళ్తునట్టు సమాచారం. వీరు ఇద్దరూ, ఢిల్లీలో బీజేపీ పెద్దలతో సంప్రదింపులు జరుపుతున్నారు. ఇటీవల టీడీపీని వీడిన ఎంపీ గరికపాటితో, వీరిద్దరినీ బీజేపీ పెద్దలు దగ్గరకు తీసుకువెళ్ళి డీల్ సెట్ చేసినట్టు సమాచారం. అనగాని సత్యప్రసాద్ రేపల్లె నంచి ఎమ్మెల్యేగా తెలుగుదేశం పార్టీ తరపున గెలిచారు. 2014లో కూడా సత్యప్రసాద్‌కు టీడీపీ తరపున, రేపల్లె టికెట్ కేటాయించారు. అప్పుడు కూడా మాజీ మంత్రి మోపిదేవి వెంకటరమణను ఓడించారు. 2019లో కూడా తిరిగి రేపల్లె నియోజకవర్గం నుంచి పోటీచేసి, మళ్లీ మోపిదేవిపై గెలిచారు. సినీ నటి సామంత కూడా ఈయన తరుపున సోషల్ మీడియాలో ప్రచారం చేసారు. అయితే వీరు పార్టీ మారితే, అన్ని నీతులు చెప్పిన జగన్, స్పీకర్ చేత వీరి పై అనర్హత వేటు వేస్తారో, లేక బీజేపీ నుంచి వచ్చే ఆదేశాలకు తల వంచేస్తారో తెలిసి పోతుంది.

ఈ రోజు మధ్యానం నుంచి టీవీ చానల్స్ లో, తెలుగుదేశం నుంచి గన్నవరం శాసనసభ్యుడిగా ఎన్నికైన వల్లభనేని వంశీ, పార్టీ మారుతున్నారని, ఆయన బీజేపీలో చేరుతున్నారని, పెద్ద ఎత్తున టీవీ చానల్స్ లో ప్రచారం జరిగింది. ఈ రోజు చంద్రబాబుతో జరిగిన సమావేశానికి, కొన్ని కారణాల వల్ల వంశీ రాకపోవటంతో, ఆయన పార్టీ మారుతున్నారు అంటూ ప్రచారం మొదలు పెట్టారు. అయితే, ఈ విషయం పై వల్లభనేని వంశీ క్లారిటీ ఇచ్చారు. తాను తెలుగుదేశం పార్టీ వీడుతున్నాను అంటూ వచ్చే వార్తలు అన్నీ అవాస్తవం అని అన్నారు. తాను తెలుగుదేశం పార్టీని వీడే ప్రసక్తే లేదని తేల్చి చెప్పారు. సుజనా చౌదరితో తాను మాట్లాడి, బీజేపీ లో చేరుతున్నాని ప్రచారం చేస్తున్నారని, తాను అసలు సుజనాతో టచ్ లో లేరని చెప్పారు. ఆయనతో బంధుత్వం ఉన్న మాట వాస్తవమే కాని, అంత మాత్రం, పార్టీ మారిపోతారని ఎలా అనుకుంటారని వంశీ అన్నారు. ఇలాంటి వార్తలు చూసి కార్యకర్తల ఆందోళన చెందాల్సిన అవసరం లేదని వంశీ అన్నారు.

16 మంది ఎమ్మెల్యేలు తెలుగుదేశం పార్టీని వీడుతున్నారని జరుగుతున్న ప్రచారం అంతా, వైసీపీ, బీజేపీ పార్టీల మైండ్‌ గేమ్‌ అని వంశీ కొట్టిపారేశారు. తాను ఎప్పటికప్పుడు చంద్రబాబుతో, టీడీపీ ఎమ్మెల్యేలతో టచ్‌లో ఉన్నానని, ఎవరూ పార్టీ మారే ఆలోచన లేదన్నారు. ఆ 16 మంది పేర్లు ఏమిటో, వైసీపీ, బీజేపీ చెప్పచ్చు కదా అని వంశీ డిమాండ్ చేసారు. మరో పక్క, పార్టీ మార్పు పై వస్తున్న వార్తల పై తెలుగుదేశం పార్టీకి చెందిన మాజీ మంత్రి, విశాఖ ఉత్తర ఎమ్మెల్యే గంటా శ్రీనివాసరావు కూడా స్పందించారు. తాను పార్టీ మారుతున్నట్టు వస్తున్న వార్తలు అన్నీ అవాస్తవం అని అన్నారు. నిన్న విశాఖ ఉత్తర నియోజకవర్గ సమన్వయ కమిటీ సమావేశాన్ని నిర్వహించారు. ఈ సందర్భంగా గంటా మాట్లాడుతూ ఎన్నికల ముందు, ఫలితాలు వచ్చిన తరువాత కూడా ఇలాంటి వార్తలు వచ్చాయని, ఇవన్నీ అవాస్తవం అని అన్నారు. తాను కొలంబోలో క్యాంప్ పెట్టాను అంటూ తప్పుడు ప్రచారం చేసారని, తాను కొలంబో వెళ్ళింది అక్కడ శక్తి పీఠాన్ని దర్శించుకోవడం కోసమని, నాతొ పాటు ఏ ఎమ్మల్యే రాలేదని, ఇలాంటి వార్తలు నమ్మవద్దని గంటా అన్నారు.