news

పార్టీ ఫిరాయింపుల పై గతంలో అనేక సార్లు ఉపరాష్ట్రపతి, రాజ్యసభ చైర్మన్‌ వెంక్యనాయుడు, ఘాటుగా స్పందించారు. పార్టీ ఫిరాయించే ధోరణి చూస్తుంటే బాధ కలుగుతుందని, దీని పై చట్ట సవరణ చేసి, వెంటనే నిర్ణయాలు తీసుకునేలా చెయ్యాలని పదే పదే తన ఆవేదన వ్యక్తం చేసారు. అనేక సార్లు ఈ ఫిరాయింపుల పై రాజకీయాల్లో నైతికత గురించి వెంకయ్య మాట్లాడుతూ వచ్చారు. గెలిచిన పార్టీ నుంచి రాజీనామా చెయ్యకుండా, వేరే పార్టీలోకి వెళ్ళటం మంచి సంప్రదాయం కాదని, అనేక సందర్భాల్లో చెప్తూ వచ్చారు. ఈ నేపధ్యంలో, నిన్న నలుగురు తెలుగుదేశం పార్టీ రాజ్యసభ సభ్యులు, పార్టీని ఫిరాయించి బీజేపీలో పార్టీలో చేరిన సంగతి తెలిసిందే. రాజ్యాంగంలోని పదో షెడ్యూలులోని 4వ పేరా ప్రకారం, మేము నలుగురు బీజేపీ పార్టీలో విలీనం అవుతున్నామని, సుజనా చౌదరి, గరికపాటి, సీఎం రమేశ్‌, టీజీ వెంకటేశ్‌ ప్రకటించారు.

అయితే, పదో షెడ్యూలులో ఈ విలీనం గురించి రాజ్యాంగ నిపుణుల్లో భిన్న అభిప్రాయలు ఉన్నాయి. మూల పార్టీ విలీనం కావాలని నిర్ణయం తీసుకుంటే తప్ప, వేరే పార్టీలో విలీనం కుదరదని వాదిస్తున్నారు. ఈ నేపధ్యంలో వెంకయ్య ఎలాంటి నిర్ణయం తీసుకొంటారో అనే సస్పెన్స్ నెలకొంది. అయితే వెంకయ్య మాత్రం, ఏ మాత్రం సంకొంచించకుండా, విలీన ప్రక్రియ పూర్తి చేసారు. తెలుగుదేశం పార్టీ విలీనం చేస్తునట్టు ఆ నలుగురు ఇచ్చిన లేఖ, ఆ వెంటనే విలీనం చేసుకుంటున్నామని, బీజేపీ అధ్యక్షుడు అమిత్ షా ఇచ్చిన లేఖ పరిగణలోకి తీసుకుని, బీజేపీలో తెలుగుదేశం రాజ్యసభ సభ్యులు విలీనం అయినట్టు వెంకయ్య నాయుడు ఆమోద ముద్ర ఎసారు. దీంతో ఈ రోజు నుంచి సుజనాచౌదరి, సీఎం రమేష్‌, టీజీ వెంకటేశ్‌, గరికపాటి మోహన్‌రావు, రాజ్యసభ రికార్డుల్లో, బీజేపీ నేతలుగా పరిగనించబడతారు. అయితే, వెంకయ్య ఈ ప్రక్రియ ఒప్పుకోరు అంటూ నిన్నటి నుంచి వాదిస్తున్న కొంత మందికి మాత్రం, ఇది ఇబ్బందికర పరిణామం.

నిన్న ఢిల్లీలో వన్ నేషన్ - వన్ ఎలక్షన్ పై, అఖిలపక్ష సమావేశం జరిగిన సంగతి తెలిసిందే. ఈ సందర్భంలో, పార్లమెంటు లోని లైబ్రరీ హాల్ సమీపంలో, నిన్న ఒక ఆసక్తికర ఘటన చోటు చేసుకుంది. ప్రధాని అధ్యక్షతన జరిగిన అఖిలపక్ష సమావేశం ముగిసిన తర్వాత, ప్రధాని మోదీ, ఇతర నాయకులు బయటకు వచ్చారు. అయితే, ఈ అఖిలపక్ష సమావేశానికి వివిధ పార్టీల అధ్యక్షులు తప్ప మిగిలిని వారికి ప్రవేశం లేదు. దీంతో జగన్ తో పాటు అక్కడకు వెళ్ళిన, వైసీపీ పార్టీలకు చెందిన ఎంపీలంతా పార్లమెంటు లోని లైబ్రరీ హాల్ సమీపంలో లాంజ్ లో కూర్చున్నారు. సమావేసం అనంతరం మోదీ బయటకు వస్తూ ఉండటంతో, ప్రధానిని చూసిన వైసీపీ ఎంపీలు ఆయన్ను చూసి లెగిసి నుంచుని, ఆయన దృష్టిలో పడేలా తాపత్రయ పడ్డారు. ఈ సందర్భంలో అక్కడే ఉన్న విజయసాయిరెడ్డిన చూసిన మోడీ, హాయ్ విజయ్ గారూ అంటూ పలకరించారు. దీంతో, మోడీ తమను గుర్తించి, ఏకంగా పేరు పెట్టి పిలవటంతో, విజయసాయి రెడ్డికి పట్టపగ్గాలు లేకుండా పోయాయి.

ఇదే విషయాన్ని ట్విట్టర్ ద్వారా విజయసాయిరెడ్డి పోస్ట్ చేసారు. అఖిల పక్ష సమావేశం అనంతరం, జగన్ కోసం నిరీక్షిస్తున్న తనను చూసి, తన వైపు వచ్చి, పేరు పెట్టి పిలిచి, తనకు మోదీ షేక్ హ్యాండ్ ఇచ్చారని తెలిపారు. తన జీవితంలో ఇదొక మధుర జ్ఞాపకమని అంటూ విజయసాయి రెడ్డి ట్వీట్ చేసారు. అయితే, దీని పై భిన్న వాదనలు కూడా వినిపిస్తున్నాయి. తనకు ప్రధాని షేక్ హ్యాండ్ ఇవ్వటం, తన జీవితంలో మధుర జ్ఞాపకం అయితే, ఆంధప్రదేశ్ ప్రజలకు ఒరిగింది ఏంటి అంటూ ప్రశ్నిస్తున్నారు. రాష్ట్రానికి ప్రత్యేక హోదా, పోలవరానికి నిధులు , విభజన హామీలు లాంటివి సాధించుకు వస్తే, అది మదుర క్షణం అవ్వాలి కాని, ఇలా ప్రధాని దృష్టిలో పడటానికి పాట్లు పడుతూ, ఆయన చేయి తగలగానే, అల్పానందం పొండి, అదేదో ప్రధాని నుంచి షేక్ హ్యాండ్ తీసుకోవటమే గొప్ప అన్నట్టు, వైసీపీ చేస్తున్న హడవిడిని ప్రశ్నిస్తున్నారు.

ప్రస్తుతం తెలుగుదేశం పార్టీ నుంచి, నాయకులను లాక్కునే పనిలో బీజేపీ బిజీగా ఉంది. నిన్న సడన్ గా, నలుగురు రాజ్యసభ ఎంపీలను లాక్కుని, పార్టీలో ఒక కుదుపు వచ్చేలా చేసారు. దీంతో తెలుగుదేశం పార్టీలో ఎదో జరిగిపోతుంది అని, పెద్ద సంక్షోభం వచ్చేస్తుంది అంటూ ప్రత్యర్ధులు హడావిడి మొదలు పెట్టారు. ఓటమితో డీలా పడిన కార్యకర్తలు కూడా, ఈ వార్తలతో కొంత ఆందోళన చెందారు. ఈ పరిణామాల అన్నిటి పై తెలుగుదేశం పార్టీ అధినేత, మాజీ ముఖ్యమంత్రి చంద్రబాబు నాయుడు, ట్విట్టర్ లో స్పందించారు. ప్రస్తుతం యూరప్ పర్యటనలో ఉన్న చంద్రబాబు, తన ట్విట్టర్ ద్వారా ట్వీట్లు పెడుతూ, కార్యకర్తలకు సందేశం ఇచ్చారు. ఇలాంటి సంక్షోభాలు తెలుగుదేశం పార్టీకి కొత్త కాదని చంద్రబాబు అన్నారు. ప్రతి సంక్షోభం నుంచి తెలుగుదేశం పార్టీ ఎంతో ధీటుగా ఎదిగింది అని గుర్తు చేసారు. ఇలాంటి క్లిష్ట పరిస్థితుల్లో ప్రజలు, కార్యకర్తలు పార్టీకి అండగా ఉంటూ వస్తున్నారని, ఇదే పార్టీకి బలమే అని చంద్రబాబు అన్నారు.

బీజేపీ చేస్తున్న అవకాశవాద రాజకీయాల్లో ఇలాంటి నాయకులు పావులుగా మారి పార్టీని వీడినా, కార్యకర్తలు, ప్రజల అండదండలు ఎప్పుడూ మనతోనే ఉంటాయని అన్నారు. నాడు బీజేపీకి దూరమయ్యింది రాష్ట్ర ప్రయోజనాల కోసమే అని, రాజకీయంగా నష్ట పోతాం అని తెలిసినా, రాష్ట్రం కోసం మోడీతో పోరాడమని అన్నారు. మోడీని ఎవరూ ఎదుర్కొని టైంలో, రాష్ట్ర ప్రయోజనాల కోసం పోరాడామని, అదే బీజేపీతో కాంప్రోమైజ్ అయ్యి ఉంటే, రాజకీయంగా పార్టీ పరిస్థితి నేడు చాలా మెరుగ్గా ఉండేదని అభిప్రాయపడ్డారు. కాని పార్టీ బాగు కన్నా, కోట్లాది మంది ప్రజల భవిష్యత్తు కోసం, పార్టీని పణంగా పెట్టి పోరాటం చేశామన్నారు. పార్టీని వదిలి వెళ్లిన వారికి, వారి వారి వ్యక్తిగత ప్రయోజనాలు ఉన్నాయని అన్నారు. తెలుగుదేశం పార్టీకి, తనకు ఇలాంటి సంక్షోభాలు కొత్త కాదని, గతంలోనూ తెలుగుదేశం చచ్చిపోయిందని, పూడ్చి పెట్టామని కొందరు ప్రగల్భాలు పలికారని, ప్రజలు, కార్యకర్తల బలంతో ఆ స్థితి నుంచి కూడా పోరాడి మళ్ళీ అధికారాన్ని పొందామని గుర్తు చేశారు.