news

అధికారంలో ఉండే అహంకారంతో, ఏమి మాట్లాడుతున్నారో బీజేపీ నేతలకే అర్ధం కావటం లేదు. చివరకు బీజేపీ నేత విష్ణువర్థన్‌రెడ్డి లాంటి వాళ్ళు కూడా, ఇందిరా గాంధీ, రాజశేఖర్ రెడ్డి, మోడీ లాంటి వారితో పోరాడిన చంద్రబాబుకు వార్నింగ్ ఇస్తున్నాడు అంటే ఏమి చెప్పుకోవాలి. ప్రస్తుతం చంద్రబాబు విదేశీ పర్యటనలో ఉన్న సంగతి తెలిసిందే. అయితే చంద్రబాబు విదేశీ పర్యటన ముగించుకుని నుంచి వచ్చేసరికి టీడీపీ పార్టీ అనేది ఖాళీ అయిపోతుందని విష్ణువర్థన్‌రెడ్డివార్నింగ్ ఇస్తున్నారు. చంద్రబాబు యూరప్ పర్యటన ముగిసేలోపే ఆంధ్రప్రదేశ్ రాజకీయ ముఖచిత్రం మారిపోతుందని, ఆయనకు ఒక మంచి గిఫ్ట్ తో స్వాగతం పలుకుతామని అంటున్నారు. చాలా మంది టీడీపీ నేతలు, మాజీ ఎమ్మెల్యేలు, మాజీ మంత్రులు మా పార్టీలో చేరేందుకు సిద్ధంగా ఉన్నారని, ఆంధ్రప్రదేశ్ లో బీజేపీ ని ఆపే శక్తి ఎవరికీ లేదు అంటున్నారు. తెలుగుదేశం పార్టీ నేతల మెడల్లో పచ్చ కండువాలు తీసి, కాషాయ కండువా కప్పుతామని విష్ణు వర్ధన్ రెడ్డి అంటున్నారు.

ఈ రోజు చేరిన నలుగురు రాజ్యసభ ఎంపీలే కాదు, వచ్చే వారం రోజుల్లో, అసెంబ్లీలో 2/3 వంతు తెలుగుదేశం పార్టీ ఎమ్మల్యేలు బీజేపీలోకి రాబోతున్నారని, వాళ్ళని ఆపుకోండి అంటూ విష్ణువర్ధన్ రెడ్డి అన్నారు. ఎమ్మెల్యేలు ఒక్కరే కాదని, వారితో పాటు లోక్‌సభలో తెలుగుదేశం సభ్యులు కూడా బీజేపీలో చేరబోతున్నారన్నారు. రాయలసీమకు చెందిన ఎంతో మంది టీడీపీ కుటుంబాలు కూడా టచ్‌లో ఉన్నారని అన్నారు. ఇక మొన్నటి దాకా హడావిడి చేసిన, బీజేపీ ఎంపీ జీవీఎల్ నరసింహారావు కూడా లైన్ లోకి వచ్చారు. ఈ రోజు ఆయన మీడియాతో మాట్లాడుతూ చాలా మంది నాయకులు, బీజేపీ పార్టీ నేతలతో టచ్‌లో ఉన్నారని, వారి పేర్లు ఇప్పుడే బయటపెట్టబోమని అన్నారు. భారతీయ జనతాపార్టీని అన్ని రాష్ట్రాల్లో బలోపేతం చేయడానికి, అన్ని రాష్ట్రాల్లో ఇతర పార్టీల నాయకులను కూడా మా పార్టీలోకి ఆహ్వానిస్తామని గతంలో నేను చెప్పానని జీవీఎల్ అన్నారు.

ఒక పక్క నలుగురు రాజ్యసభ సభ్యులు, తెలుగుదేశం పార్టీని వీడి బీజేపీలో చేరుతున్నారు అంటూ, వార్తలు వస్తున్న టైంలో, ఇప్పుడు తెలుగుదేశం పార్టీకి ఇబ్బంది కలిగించే మరో వార్తా వెలుగులోకి వచ్చింది. తెలుగుదేశం పార్టీకి చెందినన, కాపు సామాజికవర్గానికి చెందిన కొంతమంది మాజీ ఎమ్మెల్యేలు, నేతలు కాకినాడలో రహస్యంగా భేటీ అయ్యారు. కాకినాడ రైల్వేస్టేషన్‌ దగ్గరలోని ఒక హోటల్‌లో వీరందరూ సమావేశమైనట్లు తెలుస్తోంది. తూర్పుగోదావరి జిల్లా రామచంద్రాపురంకు చెందిన మాజీ ఎమ్మెల్యే తోట త్రిమూర్తులు ఆధ్వర్యంలో ఈ భేటీ కొనసాగుతోంది. ఈ రోజు జరుగుతున్న ఈ సమావేశానికి కాపు సామాజిక వర్గానికి చెందిన 14 మంది తెలుగుదేశం నేతలు, మాజీ ఎమ్మెల్యేలు హాజరయ్యారు. రాజకీయంగా ఏ నిర్ణయం తీసుకోవాలి, భవిష్యత్‌ కార్యాచరణ పై ఈ భేటీలో ఒక నిర్ణయం తీసుకునే అవకాశముందని సమాచారం.

తెలుగుదేశం పార్టీని వీడి బీజేపీ లేదా వైఎస్ఆర్ కాంగ్రెస్ పార్టీలో చేరే విషయమై వీరంతా సమాలోచనలు జరిపినట్టు తెలుస్తుంది. ఈ 14 మందిలో, మాజీ ఎమ్మెల్యేలు బూరగడ్డ వేదవ్యాస్‌, బొండా ఉమా, వరుపుల రాజా, బడేటి బుజ్జి, కదిరి బాబూరావు, చెంగళ్రాయుడు, బండారు మాధవనాయుడు, పంచకర్ల రమేష్ బాబు, జ్యోతుల నెహ్రూ, వరుపుల రాజా, మీసాల గీత, కేఏ నాయుడు తదితరులు ఉన్నారు. ఇది ఇలా ఉంటే, తాము తెదేపాను వీడేది లేదని బొండా ఉమా, తోట త్రిమూర్తులు, జ్యోతుల నెహ్రూ స్పష్టం చేశారు. ఎన్నికల్లో ఎందుకు ఓడిపోయాం, పార్టీ ఎలా బలపడాలి లాంటి విషయాలు చర్చించామని చెప్తున్నారు. మరో పక్క బీజేపీ పార్టీ నేతలు మాత్రం, చంద్రబాబు విదేశాల నుంచి వచ్చే సరికి, తెలుగుదేశం పార్టీ అనేది లేకుండా చేస్తామని అంటున్నారు. ఈ పరిణామాలు గమనిస్తున్న తెలుగుదేశం క్యాడర్ మాత్రం, ఇలాంటివి ఎన్నో చూసామని, నాయకులు ఎంత మంది పోయినా, పార్టీ కార్యకర్తలతో ఇలాగే ఉంటుంది అని అంటున్నారు.

మొన్నటి ఎన్నికల్లో తెలుగుదేశం పార్టీ ఓటమి పాలు కావటంతో, ఆ పార్టీ నుంచి కొంత మంది నేతలు, అధికార పార్టీలో చేరుతున్నారు. ముఖ్యంగా బీజేపీ పార్టీ అన్ని ప్రాంతీయ పార్టీలను నాశనం చెయ్యాలనే ఉద్దేశంతో, అతి పెద్ద ఆపరేషన్ మొదలు పెట్టిన సంగతి తెలిసిందే. ఇందులో భాగంగా ఇప్పుడు తెలుగుదేశం పార్టీ మీద పడ్డారు. ఆ పార్టీకి చెందిన నలుగురు రాజ్యసభ సభ్యులను తమదైన శైలిలో వ్యవహరించి, తమ వైపు లాక్కున్నారు. ఈ మేరకు పార్టీ వీడుతున్నట్టు, ఎంపీలు సీఎం రమేశ్‌, సుజనా చౌదరి, గరికపాటి మోహన్‌రావు, టీజీ వెంకటేశ్‌ ప్రకటించారు. అంతే కాదు, రాజ్యసభ ఛైర్మన్‌కు లేఖ రాసి, తమను వేరే గ్రూప్ గా పరిగణించాలని కోరారు. మరో పక్క కాకినాడలో కొంత మంది నేతలు, రహస్య సమావేశం అవ్వటం కూడా సంచలనం సృష్టించింది. ఈ పరిణామాల అన్నిటి పై చంద్రబాబు స్పందించారు.

చంద్రబాబు కుటుంబ సమేతంగా విదేశీ పర్యటనలో ఉన్న సంగతి తెలిసిందే. అయితే పార్టీ నుంచి నేతలు పార్టీ మారుతున్న విషయం తెలుసుకున్న చంద్రబాబు టీడీపీ సీనియర్ నేతలతో ఫోన్‌లో మాట్లాడి, కార్యకర్తలు ధైర్యంగా ఉండాలని సందేశం ఇచ్చారు. కష్ట కాలంలో తెలుగుదేశం కార్యకర్తలు అధైర్యపడొద్దని చంద్రబాబు అభయమిచ్చారు. నేతలు పార్టీని వీడటం, మన పార్టీ పై సంక్షోభం సృష్టించడం టీడీపీకి కొత్తకాదని చంద్రబాబు అన్నారు. స్వార్థ రాజకీయం కోసం , వారి భవిషత్తు కోసం నేతలు పార్టీ మారితే తెలుగుదేశం పార్టీకి వచ్చే నష్టం ఏమీ లేదని చంద్రబాబు తేల్చిచెప్పారు. ఆంధ్రప్రదేశ్ రాష్ట్ర ప్రయోజనాల కోసం తెలుగుదేశం పార్టీ తమ పోరు కొనసాగిస్తుందని ఈ సందర్భంగా చంద్రబాబు వెల్లడించారు.