news

రాయలసీమ సీనియర్ నేత, మాజీ మంత్రి మైసూరారెడ్డి మళ్లీ టీడీపీలో చేరబోతున్నారనే వార్తలు వినిపిస్తున్నాయి. విశ్వసనీయ సమాచారం ప్రకారం మంత్రి సోమిరెడ్డి చంద్రమోహన్ రెడ్డితో ఆయన భేటీ అయ్యారు. పలు విషయాలపై వీరు చర్చించారని సమాచారం. ఒకవేళ ఇదే నిజం అయితే... టీడీపీలో మైసూరా చేరడం ఖాయమని చెబుతున్నారు. జులై మొదటి వారంలో ఆయన సైకిల్ ఎక్కే అవకాశం ఉందని అంటున్నారు. ప్రస్తుతం ఈ వార్త టీడీపీలో చర్చనీయాంశంగా మారింది. తన రాజకీయ ప్రస్థానంలో టీడీపీ, కాంగ్రెస్, వైసీపీల్లో మైసూరా ఉన్నారు.

25 ఏళ్ల‌పాటు కాంగ్రెస్ లో ప‌నిచేసిన మైసూరా, జిల్లా రాజ‌కీయాల్లో వైఎస్సార్ తో విభేదాలు తారాస్థాయికి చేరుకోవ‌డంతో 2004లో కాంగ్రెస్ పార్టీకి రాజీనామా చేసి టీడీపీలో చేరారు. 2004 ఎన్నిక‌ల్లో క‌డ‌ప పార్ల‌మెంట్ కు టీడీపీ త‌ర‌పున పోటీ చేసి ఓట‌మిపాల‌య్యారు. 2006లో మైసూరారెడ్డిని రాజ్య‌స‌భ‌కు పంపింది టీడీపీ. అయితే, జ‌గ‌న్ జైలుకు వెళ్లే రెండు రోజుల ముందు టీడీపీకి గుడ్ బై చెప్పి, వైఎస్సార్ కాంగ్రెస్ పార్టీలో చేరారు మైసూరారెడ్డి. జ‌గ‌న్ జైళ్లో ఉన్న‌స‌మ‌యంలో వైసీపీకి వెన్నుద‌న్నుగా నిలిచారు.

కొంత‌కాలం త‌ర్వాత పార్టీలో ప్రాధాన్య‌త త‌గ్గింద‌ని,జ‌గ‌న్ ఒంటెద్దుపోక‌డ త‌న‌కు న‌చ్చ‌డం లేదంటూ వైసీపీకి గుడ్ బై చెప్పేసి ప్ర‌స్తుతం త‌ట‌స్థంగా ఉంటున్నారు. వ‌చ్చే సాధార‌ణ ఎన్నిక‌ల నేప‌థ్యంలో ఆయ‌న రాజ‌కీయంగా తిరిగి యాక్టివ్ అవ్వాల‌నుకుంటున్న‌ట్టు తెలుస్తోంది. ఆయ‌న పొలిటిక‌ల్ రీ ఎంట్రీ తిరిగి టీడీపీతోనే స్టార్ట్ అవుతుంద‌ని విశ్వ‌స‌నీయ‌వ‌ర్గాల స‌మాచారం ద్వారా తెలుస్తోంది. తాజాగా మంత్రి సోమిరెడ్డితో భేటీకావ‌డంతో మైసూరా మ‌ళ్లీ టీడీపీలో చేర‌బోతున్నారంటూ ప్ర‌చారం జ‌రుగుతుంది. జులై మొదటి వారంలో మైసూరా టీడీపీ తీర్థతం పుచ్చుకొంటారని తెలుస్తోంది.

నిన్నటి వరకు ఏసీబీ డీజీ ఆర్.పి.ఠాకూర్, ఆయన ఏసీబీ డీజీగా ఉన్న చివరి రోజుల్లో చేసిన పనితో, అవినీతి పరులు వణికిపోతున్నారు. ప్రభుత్వ ఉద్యోగాన్ని అడ్డుపెట్టుకొని అందినకాడికి దోచుకున్నారు. ముందు మూడు తరాలు కూర్చొని తిన్నా తరగనంత ఆస్తిని పోగేశారు. కథ అడ్డం తిరగడంతో ఏసీబీకి చిక్కారు. ఆ ఏముందిలే.. ఏసీబీకి చిక్కినా మనం పోగేసిన ఆస్తికి డోకా లేదనే ధీమాతో ఉన్న అక్రమార్కుల వెన్నులో ఇప్పుడు కొత్త చట్టం వణుకుపుట్టిస్తోంది. గత నెల 11 నుంచి అమలులోకి వచ్చిన కొత్త చట్టం ప్రకారం.. అక్రమాస్తులన్నీ ప్రభుత్వ పరం కానున్నాయి. గతేడాది విశాఖపట్టణం రేంజ్ ఏసీబీ అధికారులు కేసు నమోదు చేసిన సర్వే ఇన్స్పెక్టర్ జీ.ఎల్.గణేశ్వరరావును కొత్త చట్టం కింద తొలికేసుగా తీసుకున్నారు. మరో మూడు అవినీతి తిమింగళాలను కొత్త చట్టం పరిధిలోకి తేనున్నట్టు ఏసీబీ చేసిన ప్రకటన ఇప్పుడు ప్రకంపనలు సృష్టిస్తోంది.

కొత్త చట్టం పరిధిలోకి వెళ్లడం ఖాయమని తెలిసినప్పటికీ.. ఇప్పుడా ముగ్గురు ఎవరనే దానిపైనే విస్తృతంగా చర్చ సాగుతోంది. 2017లో అక్రమాస్తుల కేసులు భారీగా నమోదయ్యాయి. ప్రజారోగ్య శాఖలో పని చేసిన పాము పాండురంగారావు, రాష్ట్రపట్టణ ప్రణాళిక డైరెక్టర్ జీ.రఘు, రహదార్లు, భవనాల శాఖ చీఫ్ ఇంజనీర్ ఎం.గంగాధర్, రాష్ట్రపరిశ్రమల శాఖ అదనపు డైరెక్టర్ సురేష్ బాబు సహా 11 భారీ కేసులు నమోదయ్యాయి. ఈ కేసుల్లో పట్టుబడిన అక్రమ సంపాదన రూ.2500 నుంచి రూ.3వేల కోట్ల వరకు ఉండొచ్చని అప్పట్లోనే అధికారులు నిర్ధారించారు. రఘు, పాండు రంగారావు కేసుల్లోనే రూ.వెయ్యి కోట్ల వరకు అక్రమాస్తులను అధికారులు సీజ్ చేశారు. ఆదాయానికి మించిన ఆస్తుల కేసులను ప్రత్యేక కోర్టు చట్టం-2016 పరిధిలోకి తెచ్చేందుకు ఏసీబీ ఉన్నతాధికారులు నిర్ణయించారు.

పోయిన నెల 11 నుంచి అమలులోకి వచ్చిన కొత్త చట్టం ప్రకారం అక్రమార్కుల నుంచి స్వాధీనం చేసుకున్న ఆస్తులను నెల రోజుల్లోగా ప్రభుత్వపరం చేస్తారు. చరాస్తులను కోర్టు కస్టడీలో పెట్టి స్థిరాస్తుల పై వచ్చే ఆదాయాన్ని ప్రభుత్వ ఖజానాకు జమ చేయనున్నారు. ఆరు నెలల్లోగా కేసులో చార్జిషీటు దాఖలు చేయడంతో పాటు ఏడాది లోగా విచారణ పూర్తి చేస్తారు. విచారణలో కేసులో పట్టుబడిన అధికారి, ఉద్యోగికి శిక్ష పడితే స్వాధీనం చేసుకున్న ఆస్తులు ప్రభుత్వ పరమవుతాయి. ఒక వేళ శిక్ష పడకుంటే 5శాతం వడ్డీతో ప్రభుత్వం సంబంధితులకు ఆస్తులను అప్పగిస్తుంది. ఇప్పటి వరకు ఆదాయానికి మించిన ఆస్తుల కేసుల్లో స్వాధీనం చేసుకున్న ఆస్తులను విక్రయించే అధికారం లేకున్నా అనుభవించే అధికారం మాత్రం వీరికి ఉండేది. పైగా చార్జిషీటు దాఖలు చేసిన తర్వాత కోర్టు విచారణకు ప్రభుత్వ అనుమతి కోరాల్సి వచ్చేది. కొత్త చట్టంలో ఇప్పుడా పరిస్థితి లేదు. దేశంలో ఇప్పటి వరకు బీహార్, ఒడిశా రాష్ట్రాల్లో మాత్రమే ఈ తరహా చట్టం అమలులో ఉంది. ఇప్పుడు ఏపీ ఈ తరహా చట్టం ప్రయోగించిన మూడో రాష్ట్రంగా ఉండబోతోంది.

ఉత్తరాంధ్రలో పర్యటిస్తోన్న జనసేన అధినేత పవన్‌ కల్యాణ్ చేస్తోన్న వ్యాఖ్యలపై టీడీపీ ఎమ్మెల్యే బండారు సత్యనారాయణ మూర్తి ఆగ్రహం వ్యక్తం చేశారు. ఆయన విశాఖపట్నంలో మీడియాతో మాట్లాడుతూ.. పవన్‌ ఉత్తరాంధ్రలో భావోద్వేగాలను రెచ్చగొడుతున్నారని అన్నారు. ప్రాంతీయ వాదాన్ని రెచ్చగొడుతూ అశాంతిని సృష్టించకూడదని, ఆ ప్రాంతంలో ఏపీ సర్కారు చేసిన అభివృద్ధి కనబడట్లేదా? అని ప్రశ్నించారు. పవన్‌ కల్యాణ్‌ నటుడిగా కాకుండా ఓ రాజకీయ నాయకుడిలా ఆలోచించి మాట్లాడాలని బండారు సత్యనారాయణ సూచించారు. ఆయన కేంద్ర సర్కారుని ఎందుకు నిలదీయట్లేదని ప్రశ్నించారు. అభివృద్ధిపరంగా తగిన సలహాలు, సూచనలు ఇస్తే అమలుచేసే తత్వం తెదేపా ప్రభుత్వానికి ఉందన్నారు. ఓడరేవు ప్రాంతంలో కాలుష్య సమస్యకు రాష్ట్రప్రభుత్వమే బాధ్యత వహించాలనడం ఎంతవరకూ సబబని ప్రశ్నించారు.

పవన్ రాజకీయాల్లోకి కొత్తగా రాలేదని.. ఆయన అన్న పార్టీలో పని చేసిన వైనాన్ని గుర్తు చేశారు. ప్రజారాజ్యం పార్టీని మీరు కాంగ్రెస్ పార్టీకి ఎంతకు అమ్మేశారో అందరికీ తెలుసంటూ సంచలన ఆరోపణలు చేసారు. రాష్ట్రంలో జరుగుతున్న పరిణామాల్ని చూసిన తర్వాత కూడా బీజేపీని కానీ ప్రధాని మోడీని కానీ పల్లెత్తు మాట ఎందుకు అనటం లేదన్న ఆయన.. పవన్ తీరు చూస్తుంటే బీజేపీ స్క్రిప్ట్ ను ఫాలో అవుతున్నట్లుగా ఉందని ఎద్దేవా చేయటం గమనార్హం. విశాఖలో మూడు నెలలుగా ఉంటున్న పవన్.. విశాఖ రైల్వే జోన్ గురించి ఎందుకు పోరాటం చేయటం లేదని ప్రశ్నించారు. భూ కుంభకోణంపై ముఖ్యమంత్రి చంద్రబాబు స్వయంగా సిట్‌ను ఏర్పాటు చేశారని, ఆ నివేదిక ప్రభుత్వ స్థాయిలో పరిశీలనలో ఉందని ఎమ్మెల్యే బండారు తెలిపారు. త్వరలోనే సిట్‌ నివేదిక వెలుగుచూస్తుందని, అక్రమార్కులకు శిక్ష తప్పదని స్పష్టం చేశారు.

తెదేపా ఏర్పాటుతోనే ఉత్తరాంధ్ర రాజకీయంగా బలోపేతమైందని, ముఖ్యమంత్రిగా చంద్రబాబు బాధ్యతలు చేపట్టిన తర్వాత సాగునీరు, ఐటీ రంగాల్లో గణనీయ పురోగతి సాధించిందన్నారు. భోగాపురం విమానాశ్రయం, భావనపాడు ఓడరేవు, ఉత్తరాంధ్ర జిల్లాల్లో పలు నీటి పారుదల ప్రాజెక్టులు వచ్చాయన్నారు. విశాఖ నగరం జాతీయ స్థాయి అత్యుత్తమ నగరాల్లో 7వ స్థానంలో నిలిచిందన్నారు. ఇదంతా తెదేపా పాలనలో సాగించిన అభివృద్ధి ఫలితమేనని, ఇవేవీ పవన్‌ కల్యాణ్‌కు కనబడడం లేదా? అని నిలదీశారు. కేంద్రంతో ముడిపడి ఉన్న ప్రాజెక్టులు సైతం రాకపోవడానికి ముఖ్యమంత్రి చంద్రబాబు కారణమని ఏరకంగా పవన్‌ విమర్శిస్తారని ఆయన ప్రశ్నించారు.