news

కేంద్రం నుంచి రాష్ట్ర ప్రభుత్వానికి పంపిస్తున్న నిధులు ఏమవుతున్నాయో, ఎలా ఖర్చు అవుతున్నాయో, వాటి వివరాలు తెలుసుకునే బాధ్యత మీ పై లేదా, దాని పై ఎలాంటి పరిశీలనా చేయరా అంటూ, కేంద్ర ప్రభుత్వానికి ప్రశ్నల వర్షం కురిపించింది ఆంధ్రప్రదేశ్ హైకోర్టు. అడవులు పరిరక్షణ కోసం, కేంద్రం ప్రభుత్వం అన్ని రాష్ట్ర ప్రభుత్వాలకు నిధులు కేటాయిస్తుంది. అలాగే జగన్ మోహన్ రెడ్డి ప్రభుత్వం వచ్చిన తరువాత, ఆంధ్రప్రదేశ్ రాష్ట్రానికి రూ.1734.81 కోట్లు కేటాయించారు. అయితే ఈ నిధులు కేవలం అడవుల సంరక్షణ, వన్యప్రాణుల సంరక్షణ కోసమే ఉపయోగించాలి. అయితే ఈ నిధులు రాష్ట్ర ప్రభుత్వం వేరే వాటికి మళ్ళించిందని, అడవుల సంరక్షణ కోసం ఖర్చు పెట్టలేదని, ఇది కంపా చట్టానికి వ్యతిరేకం అంటూ, హైకోర్టులో పిటీషన్ దాఖలు అయ్యింది. దీని పై నిన్న హైకోర్టులో విచారణ జరిగింది. దీని పై హైకోర్టు కేంద్రాన్ని ప్రశ్నించింది. కేంద్ర ప్రభుత్వం ఎన్ని నిధులు ఇచ్చింది ? రాష్ట్ర ప్రభుత్వం ఆ నిధులు ఖర్చు పెట్టిందా, లేక మళ్ళించిందా, కేంద్రం ఇచ్చిన నిధులు ఏమయ్యాయో చెప్పాలి అంటూ, కేంద్ర రాష్ట్ర ప్రభుత్వాలని హైకోర్టు ఆదేశించింది. నాలుగు వారాల్లోగా తమకు అన్ని వివాలు అఫిడవిట్ రూపంలో ఇవ్వాలని, లేకపోతే ఆ శాఖకు సంబందించిన అధికారులని, కోర్టుకు పిలిపించి వివరణ అడగాల్సి వస్తుందని, హెచ్చరించింది హైకోర్టు. కేంద్ర ప్రభుత్వం తరుపున హాజరైన అసిస్టెంట్‌ సొలిసిటర్‌ జనరల్, పూర్తి వివరాలు కోర్టుకు ఇస్తామని తెలిపారు.

ఇక నిన్న విచారణ జరిగిన మరో కేసు విషయంలో కూడా హైకోర్టు , కేంద్రాన్ని ప్రతి వాదిగా చేర్చలాని, కేంద్రం నుంచి కూడా సమాచారం కావాలని కోరింది. విశాఖపట్నంలో రాష్ట్ర ప్రభుత్వం గెస్ట్ హౌస్ నిర్మిస్తున్న స్థలం, గ్రేహౌండ్స్ శిక్షణా కేంద్రం కోసం ఇచ్చిన భూమి అని, అందులో రాష్ట్ర ప్రభుత్వం కొంత భూమి తీసుకుని, గెస్ట్ హౌస్ నిర్మాణం జరుపుతుంది అంటూ పిటీషన్ దాఖలు అయ్యింది. అయితే ఈ కేసు విషయంలో కేంద్రాన్ని కూడా ప్రతివాదిగా చేర్చాలని పిటీషనర్ ను హైకోర్టు ఆదేశించింది. ఈ భూమి కేటాయింపు ఎలా జరిగింది, కేంద్రం ఏ ప్రాతిపదికన ఇక్కడ నిధులు ఇస్తుందో చెప్పాలి అంటూ హైకోర్టు ఆదేశించింది. అలాగే ఇక్కడ చెట్లను నరికి, చదును చేస్తున్నారని పిటీషనర్ కోర్టుకు చెప్పగా, ఇప్పటికే ఇక్కడ స్టేటస్ కో ఉంది కదా అని కోర్టు ప్రశ్నించింది. అయితే ఇక్కడ అయినా పనులు జరుగుతున్నాయని పిటీషనర్ తెలిపారు. గ్రేహౌండ్స్ శిక్షణా కేంద్రం దగ్గర గెస్ట్ హౌస్ ఉంటే, ఇది దేశ భద్రతకు ముప్పు అని, దీని పై మధ్యంతర ఉత్తర్వులు ఇవ్వాలని కోరగా, చెట్లను నరకవద్దు అంటూ ఉత్తర్వ్యులు ఇచ్చిన హైకోర్టు, దీని పై పూర్తి స్థాయి వివరాలతో అఫిడవిట్ దాఖలు చేయాలనీ ఆదేశించింది.

ఆంధ్రప్రదేశ్ రాష్ట్ర హైకోర్టు వివరాలు అడిగితే, ఆ వివరాలు కోర్టుకు ఇవ్వలేమని, అవి రాజ్యాంగ విరుద్ధం అంటూ ప్రభుత్వం తరుపున రాష్ట్ర డిప్యూటీ అకౌంటెంట్‌ జనరల్‌ కోర్టుకు ఇచ్చిన అఫిడవిట్ ఇప్పుడు ఆసక్తిగా మారింది. సహజంగా కోర్టు అడిగితే, ఎక్కడ విషయం దాయటం అనేది ఉండదు. అదీ వేల కోట్లు ఖర్చు చేసిన కేసు పై హైకోర్టులో కేసు నడుస్తూ ఉండగా, అవి మేము మీకు ఇవ్వం అని చెప్పటం పై అందరూ షాక్ అయ్యారు. ఏదైనా ఉంటే సీల్డ్ కవర్ లో ఇచ్చి, హైకోర్టుకు ఇది బయటకు ఇవ్వద్దు అని చెప్పవచ్చని, అలా కాకుండా నిబంధనలు చెప్తూ, అసలు కోర్టుకు సమాచారం ఇవ్వం అని చెప్పటం కర్రెక్టా కాదా అనే చర్చ జరుగుతుంది. అసలు కేసు విషయానికి వస్తే, అమరావతి మార్పు విషయం పై హైకోర్టులో అనేక కేసులు నడుస్తున్న విషయం తెలిసిందే. ఇందులో ముఖ్యంగా ఒక కేసు విషయం పై అందరికీ ఆసక్తి నెలకొంది. అది ఇప్పటి వరకు అమరావతిలో పెట్టిన ఖర్చు. గత తెలుగుదేశం హయాంలో దాదాపుగా 9 వేల కోట్లు పైన ఖర్చు అయ్యిందని చెప్తున్నారు. కొండవీటి వాగు, సీడ్ ఆక్సెస్ రోడ్డు, హైకోర్టు, సచివాలయం, అసెంబ్లీ, కౌన్సిల్, వివిధ అంతర్గత రోడ్డులు, డ్రైనేజిలు, ఐఏఎస్, ఐపిఎస్, జడ్జి క్వార్టర్స్, ఎన్జీవో హౌసింగ్, నాలుగవ తరగతి హౌసింగ్, సెక్రటరీ, ప్రిన్సిపల్ సెక్రటరీ హౌసింగ్, ఇలా అనేక అనేక బిల్డింగ్ల నిర్మాణాలు జరిగాయి. అయితే ఇన్ని వేల కోట్లు ఖర్చు చేసిన భవనాలు ఇప్పుడు ఇక్కడ ఆపేసి, మళ్ళీ వైజాగ్ వెళ్లి, అక్కడ మళ్ళీ ఇంతా ఖర్చు చేసి భవనాలు నిర్మాణం చేయటం ఏమిటి అనేది పిటీషన్.

అయితే దీని పై స్పందించిన హైకోర్టు, అసలు అమరావతి పై ఇప్పటి వరకు ఎంత ఖర్చు చేసారు, ఏ ప్రాజెక్ట్ కు ఎంత ఖర్చు చేసారో చెప్పండి అంటూ రాష్ట్ర ప్రభుత్వ అకౌంటెంట్ జెనెరల్ ను వివరాలు ఇవ్వమని ఆదేశించింది. అయితే ఇలా అయినా అసలు అమరావతి పై ఎంత ఖర్చు చేసారో తెలుస్తుందని, ఇన్నాళ్ళు వైసీపీ ప్రచారం చేస్తున్నట్టు అక్కడ గ్రాఫిక్స్ మాత్రమే ఉన్నాయా, నిజమైన నిర్మాణాలు జరిగాయా అనేది తెలుస్తుందని అందరూ ఆశించారు. అయితే రెండు వాయిదాలకు కూడా అకౌంటెంట్ జెనెరల్ వివరాలు ఇవ్వకపోవటంతో హైకోర్టు సీరియస్ అయ్యి, వివరాలు ఇవ్వకపోతే అకౌంటెంట్ జెనెరల్ ను కోర్టుకు పిలుస్తామని హెచ్చరించింది. అయితే రెండు రోజుల క్రితం డిప్యూటీ అకౌంటెంట్‌ జనరల్‌ పేరుతో హైకోర్టులో ఒక అఫిడవిట్ దాఖలు చేసి, తాము లెక్కలు అన్నీ రాష్ట్రపతికి, గవర్నర్ కి ఇస్తామని, అక్కడ నుంచి అసెంబ్లీకి వస్తుందని, ఇలాంటి వివరాలు బహిర్గత పరచటం కుదరదు అంటూ, దానికి సంబంధించి రాజ్యాంగంలో చెప్పిన రూల్స్ అన్నీ వివరిస్తూ, వివరాలు ఇవ్వటం కుదరదనే విధంగా అఫిడవిట్ లో తెలిపారు. అయితే ఈ అఫిడవిట్ పై కోర్టు ఎలా స్పందిస్తుందో అనే ఉత్కంఠ నెలకొంది.

పోలీసుల తీరు పై ఆంధ్రప్రదేశ్ హైకోర్ట్ మరోసారి ఆగ్రహం వ్యక్తం చేసింది. అమరావతి రైతులను అరెస్ట్ చేసి, వారిని 18 రోజులుగా రిమాండ్ లో ఉంచిన సంగతి తెలిసిందే. అమరావతి రైతుల పై పోలీసులు, ఎస్సీ, ఎస్టీ కేసు పెట్టి వారిని అరెస్ట్ చేసారు. తరువాత కింద కోర్టు ఆదేశాలతో రిమాండ్ కు పంపించారు. అయితే వీరికి ఇక్కడ బెయిల్ నిరాకరించటంతో వారు హైకోర్టుకు వెళ్ళారు. హైకోర్టులో బెయిల్ పిటీషన్ దాఖలు చేసారు. కొద్ది రోజుల క్రితం వీరికి హైకోర్టు బెయిల్ ఇచ్చింది. అయితే ఆ సందర్భంలో హైకోర్టు ఈ అరెస్ట్ పై తీవ్ర ఆగ్రహం వ్యక్తం చేసింది. ఇది సహజ న్యాయ సూత్రాలకు, సుప్రీం కోర్టు ఆదేశాలకు వ్యతిరేకమని తెలిపింది. ఆ అరెస్ట్ ని ఖండిస్తూ పోలీసుల తీరుని కోర్టు తప్పుబట్టింది. ఈ విషయం పై తమకు పూర్తి నివేదక ఇవ్వాలని పోలీసులని, కింద కోర్టుని కూడా హైకోర్టు ఆదేశించింది. అయితే హైకోర్టు ఆదేశాల ప్రకారం పోలీసులు, కింద కోర్టు, హైకోర్టుకు నివేదిక సమర్పించారు. ఈ కేసు నిన్న హైకోర్టులో విచారణకు వచ్చింది. పోలీసులు, కింద కోర్టు ఇచ్చిన వివరాలు పరిశీలించిన హైకోర్టు, జరిగిన పరిణామాల పై తీవ్ర ఆగ్రహం వ్యక్తం చేసింది. రైతుల పై ఎస్సీ, ఎస్టీ కేసు పెట్టటం, వారిని జైలుకు పంపించటం, ఇది కచ్చితంగా అక్రమ అరెస్ట్ అని హైకోర్టు వ్యాఖ్యానించింది. సుప్రీం కోర్టు మార్గదర్శకాలను పాటించలేదని హైకోర్టు ఆగ్రహం వ్యక్తం చేసింది. వారికి 41 ఏ నోటీస్ ఇవ్వకుండా, ఎందుకు అరెస్ట్ చేసారని పోలీసులని ప్రశ్నించింది. ఇది అక్రమ నిర్బంధం అని, ప్రాధమిక హక్కులు హరించటమే అని హైకోర్టు వ్యాఖ్యానించింది.

ఈ చర్యను కోర్టు ధిక్కరణ చర్యగా భావిస్తామని, వ్యక్తిగత స్వేచ్ఛను హరించే హక్కు ఎవరికీ లేదని, దీని పై తగిన ఆదేశాలు ఇస్తామని హైకోర్టు ఘాటుగా స్పందించింది. రైతుల తరుపున వాదనలు వినిపించిన న్యాయవాది, పోలీసులు జరిగిన దానికి, కోర్టుకు సమర్పించిన నివేదికకు వ్యత్యాసం ఉందని, వక్రీకరించి చెప్తున్నారని అన్నారు. దీని పై ప్రభుత్వ తరుపు లాయర్ స్పందిస్తూ, ఇప్పటికే వారికి బెయిల్ వచ్చేసింది కాబట్టి, ఈ కేసుని ఇంతటితో వదిలేయాలని, ఈ కేసు ముగిసిపోయినట్టే అని అన్నారు. అయితే దీని పై స్పందించిన హైకోర్టు, బెయిల్ ఇచ్చినా, అక్రమ నిర్బంధం పై విచారణ చేయవచ్చని సుప్రీం కోర్టు మార్గదర్శకాలు ఉన్నాయని తెలిపారు. అయితే దీని పై స్పందించిన ప్రభుత్వ తరుపు న్యాయవాది, ఇది చాలా చిన్న విషయం అని, దీనికి కోర్టు ధిక్కరణ అవసరం లేదని చెప్పగా, కోర్టు స్పందిస్తూ, ఇది మీకు చిన్న విషయం కావచ్చు, ఇక్కడ రైతుల ప్రాధమిక హక్కులు హరించబడ్డాయి, వారు అక్రమంగా అరెస్ట్ చేయబడ్డారు, ఈ కేసు పై సహజ న్యాయ సూత్రాలు పాటిస్తూ, తగిన ఆదేశాలు ఇస్తామని హైకోర్టు స్పష్టం చేసింది. మరి దీని పై పోలీసులు బాధ్యులు అవతారా ? కోర్టు ఏమి చెప్తుంది అనేది వేచి చూడాలి.