news

టిటిడి గౌరవ ప్రధాన అర్చకుడు రమణ దీక్షితులు, టిటిడి పై ఫైర్ అయ్యారు. గతంలో జరిగినట్టే, ఇప్పుడు జరుగుతున్నాయని అన్నారు. అంతే కాకుండా, స్వామీ వారి సేవ చేసే, అర్చకుల్లో 50 మందిలో, 15 మందికి కరోనా వచ్చిందని, వెంటనే దర్శనాలు ఆపాలి అంటూ ఆయన ట్వీట్ చేసారు. కేసులు పెరుగుతున్నా, ఈవో, ఏఈవో దర్శనాలు ఆపటం లేదని అన్నారు. ఇంకా 25 మంది రిపోర్ట్ లు రావాల్సి ఉందని, ఈ పరిస్థితిలో దర్శనాలు కొనసాగించటం పై అభ్యంతరం వ్యక్తం చేసారు. రమణ దీక్షితులు ట్వీట్ పై టిటిడి ఉద్యోగులు, అర్చకులు, ఇతర సిబ్బంది, చర్చించుకుంటున్నారు. శాస్త్రీయమైన దృక్పదం లేకపోలేదనే వాదన నడుస్తుంది. దర్శన ఏర్పాట్లు పై దృష్టి పెట్టారు కానీ, ఉద్యోగులను పట్టించుకోలేదు అనే వాదన వినిపిస్తుంది. అయితే గతంలో రమణ దీక్షితులు చేసిన ట్వీట్ పై, టిటిడి పై చేసిన విమర్శలతో టిటిడి అలెర్ట్ అయ్యింది. రమణ దీక్షితులు, గత నెల రోజులుగా, ఏదో ఒక ఆరోపణ చేస్తూ, టిటిడిని టార్గెట్ చేసారు. దీంతో రమణ దీక్షితులు సలహాలు మాత్రమే ఇవ్వాలనే వాదన తెర పైకి వస్తుంది.

టిటిడి గౌరవ ప్రధాన అర్చకుడు రమణ దీక్షితుల వ్యాఖ్యలను, టిటిడి చైర్మెన్ వైవీ సుబ్బారెడ్డి తీవ్రంగా ఖండించారు. కీలకమైన హోదాలో ఉండి ఇష్టం వచ్చినట్టు మాట్లాడటం తగదని అన్నారు. ఏమైనా ఉంటే బోర్డుకు సలహాలు ఇవ్వాలి కాని, ఇలా మీడియా ముందుకు వచ్చి, వ్యాఖ్యలు చెయ్యటం సరికాదని అన్నారు. తిరుమల దర్శనాల విషయంలో, రాజకీయ రంగు పులమోద్దని, అర్చకులకు ఇబ్బంది రాకూడదు అనే ఉద్దేశంతోనే అన్ని జాగ్రత్తలు తీసుకుంటున్నామని అన్నారు. దర్శనాలు నిలిపే ప్రసక్తే లేదని అన్నారు. సుబ్బారెడ్డి మాట్లాడుతూ, "మా ప్రభుత్వం వచ్చిన తరువాత, ఆయనకు గౌరవ ప్రధాన అర్చకుడు హోదా ఇచ్చాం. ఆయన ఏమైనా చెప్పాలి అనుకుంటే బోర్డుకు సలహాలు ఇవ్వాలి. మీడియా ద్వారా కామెంట్ చేయ్యాటం మంచి పధ్ధతి కాదు. ఆయనను పిలిచి మాట్లమంది చెప్తాను. దేవస్థానంలో పని చేసే మొత్తం స్టాఫ్ లో, 140 మందికి పాజిటివ్ కేసులు వచ్చాయి. ఎక్కువ శాతం పోలీస్ వారికి వచ్చాయి. తరువాత పోటులో పని చేసే వారికి వచ్చింది, ఆ తరువాత 14 మంది అర్చకులకు వచ్చింది. వీళ్ళలో 70 మందికి తగ్గిపోయింది.

ఆంధ్రప్రదేశ్ తమిళనాడు సరిహద్దులో, భారీగా నగదు పట్టుబడింది. వైసీపీ మంత్రి స్టిక్కర్ ఉన్న ఫోర్చ్యునర్ కారులో, రూ.5.22 లక్షలను ఆంధ్రప్రదేశ్ నుంచి తమిళనాడు తరలిస్తూ ఉండగా, తమిళనాడు పోలీసులు పట్టుకున్నారు. అయితే ఈ కారు పై మంత్రి బాలినేని శ్రీనివాస రెడ్డి స్టిక్కర్ ఉండటం గమనార్హం. దీంతో ఈ నగదును, తమిళనాడు పోలీసులు, ఐటి శాఖ అధికారులకు అప్పచెప్పారు. మామూలు తనిఖీల్లో భాగంగా, ఏపి తమిళనాడు బోర్డర్ లో కారుని తమిళనాడు పోలీసులు ఆపారు. ఈ సమయంలో, కారులో ఉన్న ప్రకాశం జిల్లాకు చెందిన వ్యక్తులు, తాము చెన్నై వెళ్ళాలి అంటూ, పోలీసుల పై ఒత్తిడి తెచ్చారు. అయితే రాత్రి పూట పంపించం అని తమిళనాడు పోలీసులు చెప్పటంతో, ప్రకాశం జిల్లా అధికార పార్టీ ప్రజా ప్రతినిధులతో ఫోన్ చేయించారు. దీంతో వ్యవహారం తేడాగా ఉందని, అనుమానం పడిన తమిళనాడు పోలీసులు, కారుని తనిఖీ చెయ్యగా, భారీగా డబ్బు కనుగున్నారు. దీంతో, కారు సీజ్ చేసిన అధికారులు, కారులో ఉన్న ముగ్గురుని పోలీసులు అదుపులోకి తీసుకున్నారు. నగదుని ఐటి శాఖకు అప్పచెప్పటంతో, ఐటి అధికారులు రంగంలోకి దిగారు.

నిన్న రాత్రి తమిళనాడు మీడియా మొత్తం, ఇది ఆంధ్రప్రదేశ్ మంత్రి డబ్బుగా ప్రచారం చేసారు. అయితే దీని పై నిన్న రాత్రి వివరణ ఇచ్చిన బాలినేని, ఇది తన కారు కాదని, ఆ వ్యక్తులతో కూడా తనకు సంబంధం లేదని, తన స్టిక్కర్ ను ఫోటో స్టాట్ తీసి ఎవరో వాడుకున్నారని చెప్పుకొచ్చారు. అయితే ఇక్కడే మరో ట్విస్ట్ బయటకు వచ్చింది. ఈ నగదు మొత్తం, ఒంగోలులో వైసీపీలో క్రియాశీలకంగా ఉండే ఒక బంగారు వ్యాపారిది అనే ప్రాధమికంగా తేల్చారు. ఈ డబ్బు తరలించటానికి, రెండు వాహనాలు ఉపయోగించారని, ఒకటి ఒంగోలు నుంచి తమిళనాడు చెక్ పోస్ట్ వరకు, మరొకటి అక్కడి నుంచి చెన్నై వరకు మరో వాహనం ఉపయోగించారని తెలిసింది. అయితే ఇది కేవలం అక్రమంగా బంగారం కొనటానికేనా, లేక ఈ నగదు ఎందుకు ఉపయోగిస్తున్నారు అనే వ్యవహరం పై మరింత కూపీ లాగుతున్నారు. ఒక మంత్రి స్టిక్కర్ ఉన్న కారు, నేషనల్ హైవే పై ధైర్యంగా తిరుగుతున్నారు అంటే, దీని వెనుక ఉన్నది ఎవరు అనేది, ఐటి, తమిళనాడు అధికారులు తేల్చనున్నారు. మరో పక్క టిడిపి నేతలు మాత్రం, ఇది బాలినేని డబ్బే అని, మద్యం ముడుపులు డబ్బులు అంటూ ఆరోపణలు చేస్తున్నారు. మరి నిజం ఏమిటో అధికారులే చెప్పాలి.

ఐపీఎస్ అధికారి మాదిరెడ్డి ప్రతాప్ ఇటీవల చేసిన వ్యాఖ్యలు కలకలం రేపాయి. ఆర్టీసీ ఎండీ బాధ్యతలు నుంచి తప్పుకుంటూ, ఆయన మీడియా సమావేశం నిర్వహించారు. ఈ సమావేశంలో, ఆయన ప్రభుత్వం పై పెద్దగా విమర్శలు కూడా ఏమి చెయ్యలేడు. నా బదిలీ ప్రభుత్వ విజ్ఞతకే వదిలేస్తున్నా అని అన్నారు. అయితే ఆ వ్యాఖ్యల పై సమాధానం చెప్పాలి అంటూ, మాదిరెడ్డి ప్రాతాప్ కు, చీఫ్ సెక్రెటరి షోకాజ్ నోటీసులు జరీ చేసారు. ఆ వ్యాఖ్యలు ఎందుకు చేసారో, ఆ కారణాలు ఏడు రోజుల్లో చెప్పాలని, ఆ షోకాజ్ నోటీసులో తెలిపారు. అంతే కాదు, ఏడు రోజుల్లో సమాధానం కనుక చెప్పకపోతే, క్రమశిక్షణా చర్యలు తీసుకుంటామని, అందులో తెలిపారు. అంతే కాకుండా, ఆయన్ను జీఏడీకి రిపోర్ట్ చెయ్యాలని ఆదేశించింది. ఇటీవల జరిగిన బదిలీలలో, అయనను ఆర్టీసీ ఎండీ పదవి నుంచి, ఏపీఎస్పీ బెటాలియన్ డీజీగా ప్రతాప్ ను బదిలీ చేసారు. ఇది జరిగి రెండు రోజులు కూడా కాక ముందే, ఆయన్ను మళ్ళీ బదిలీ వేటు వేసి, జీఏడీకి రిపోర్ట్ కావాలని ఆదేశించింది.

ఇటీవల జరిగిన మీడియా సమావేశంలో, ఆయన మాట్లాడుతూ, తాను రాజశేఖర్ రెడ్డి హయంలో, కీలక శాఖలో పని చేసానని, ఎక్కడా తన పై చెడు రిమర్క్ లేదని, ఎంతో మంది అధికారులు అప్పట్లో సిబిఐ దర్యాప్తు ఎదురుకుంటే, తనపై వేలు ఎత్తి చూపించలేదని గుర్తు చేసారు. మొన్నే విజయమ్మ, వైఎస్ఆర్ జయంతి రోజు పంపిన కేకు తిన్నానని, ఇప్పుడు ఆర్టీసీ ఎండీ పదవి నుంచి, వేరే చోటుకు బదిలీ చేసారని అన్నారు. తాను ఆర్టీసీలో చేసిన సంస్కరణలు చెప్పుకొచ్చారు. ఇన్ని చేసినా తనను ఎందుకు బదిలీ చేసారో అర్ధం కాలేదని, ప్రభుత్వ విజ్ఞతకే వదిలేస్తున్నాని మాదిరెడ్డి ప్రతాప్ అన్నారు. ఇదే వ్యాఖ్యలు, ప్రభుత్వం తప్పుగా భావించి, క్రమశిక్షణా చర్యలకు ఉపక్రమించింది. అలాగే మెట్రో ట్రైన్ లాగానే, మెట్రో బస్ అనే కొత్త కాన్సెప్ట్ రెడీ చేస్తున్నా అని, ఇది తరువాత వచ్చే వాళ్ళు, కొనసాగించాలి అంటూ, ఆయన చేసిన ఈ వ్యాఖ్యల పై కూడా ప్రభుత్వం సీరియస్ గా ఉన్నట్టు తెలుస్తుంది. అయితే రాజశేఖర్ రెడ్డికి అత్యంత సన్నిహితుడుగా ఉన్న మాదిరెడ్డి ప్రతాప్ ను, ఇలా రెండు రోజుల్లోనే, రెండు సార్లు బదిలీ చెయ్యటం, షోకాజ్ నోటీస్ ఇవ్వటం సంచలనంగా మారాయి. మరి ఆయన ఏమి చేస్తారో చూడాలి.