news

విశాఖపట్నంలో డాక్టర్ సుధాకర్ మీద దాడి చేసి, అరెస్ట్ చెయ్యటం, ఆ తరువాత పిచ్చి హాస్పిటల్ లో పడేయటం పై, యావత్తు దేశం ఆశ్చర్య పోయింది. దేశం మొత్తం డాక్టర్లు చేస్తున్న సేవలకు, పూల వర్షం కురిపిస్తుంటే, ఇక్కడ మాత్రం, ఒక డాక్టర్ ని రోడ్డున పడేసి, చొక్కా లేకుండా, పెడ రెక్కలు విరిచి, తాళ్ళతో చేటుకు కట్టేసి, ఎత్తి ఆటోలో పడేయటం, ఇవన్నీ చూసిన ప్రజలు తీవ్ర ఆవేదన చెందారు. మాస్కులు అడిగిన డాక్టర్ ను ఇలా చెయ్యటం పై అందరూ ఆశ్చర్య పోయారు. ఈ నేపధ్యంలో, ఈ మొత్తం వ్యవహారం పై, హైకోర్ట్ ఈ కేసుని సుమోటోగా తీసుకుంది. దీని పై విచారణ ప్రారంభించి, డాక్టర్ సుధాకర్ ని తమ ముందు హాజరు పరచాలని హైకోర్ట్ ఆదేశించింది. అయితే, సుధాకర్ ని హాజరు పరచటం కుదరదు అని, ఆయనకు ట్రీట్మెంట్ ఇస్తున్నాం అని, వీడియో కాన్ఫరెన్స్ లో హాజరు పరుస్తాం అంటూ, ప్రభుత్వం చెప్పుకొచ్చింది. అయితే సుధాకర్ తరుపు న్యాయవాది ఇందుకు ఒప్పుకోలేదు.

ఆయనకు దెబ్బలు ఉన్నాయని, అందుకే కోర్ట్ ముందు హాజరు పరచటం లేదు అని, ఆయన వద్దకు న్యాయవాదిని పంపి, ఆయన దెబ్బలు పరిశీలించి, ఆయన వాంగ్మూలం కూడా నమోదు చెయ్యాలని కోరారు. దీంతో మొన్న విశాఖ జిల్లా జడ్జి, సుధాకర్ వద్దకు వెళ్లి, ఆయన నుంచి రెండు గంటల పాటు వాంగ్మూలం తీసుకున్నారు. మరో పక్క, ఇదే కేసులో, ప్రభుత్వం కూడా తమ నివేదికను కోర్ట్ కు సమర్పించింది. ఈ నేపధ్యంలో, ఈ కేసు పై, ఈ రోజు విచారణ జరిగింది. విశాఖ జడ్జి ఇచ్చిన రిపోర్ట్ లో, డాక్టర్ సుధాకర్ కు దెబ్బలు ఉన్నాయని రిపోర్ట్ ఇచ్చారు, ప్రభుత్వం ఇచ్చిన రిపోర్ట్ లో మాత్రం, ఎక్కడ దెబ్బలు గురించి ప్రస్తావన చెయ్యలేదు. దీంతో, రెండు రిపోర్టుల్లో తేడా ఉండటంతో, హైకోర్ట్ కీలక నిర్ణయం తీసుకుంది.

ఈ కేసుని సిబిఐకి అప్పచెప్పారు. ఎనిమిది వారాల్లో తమకు నివేదిక ఇవ్వాలని, సిబిఐ కి హైకోర్ట్ తెలిపింది. అయితే ప్రభుత్వం ఇచ్చిన నివేదికలో ఏదో దాస్తున్నారు అని కోర్ట్ భావించ బట్టే, కోర్ట్ ఈ నిర్ణయం తీసుకుంది అని విశ్లేషకులు అంటున్నారు. ఈ కేసు విషయంలో, ఏదో ఉంది అని, ఈ విషయం ఆషామాషీ విషయం కాదని, ఇంత వరకు ఎందుకు వచ్చిందో అనే అనుమానం ఉండబట్టే, కోర్ట్ సిబిఐకి విచారణ చెయ్యమని కోరినట్టు చెప్పి ఉంటుంది అని విశ్లేషకులు భావిస్తున్నారు. అలాగే నిన్న సుధాకర్ తల్లి కూడా, తమకు ఫోనులు వస్తున్నాయని, మీ కొడుకు ఉద్యోగం ఇచ్చేస్తాం, ఇంకా మాట్లాడకండి అని చెప్పినట్టు, ఆవిడ నిన్న ఇంటర్వ్యూ లో చెప్పారు. అయితే ఈ రోజు కోర్ట్ సిబిఐకి ఇవ్వటం కీలక పరిణామం.

బేసిన్లు లేవు, భేషీజాలు లేవు అని అటు వైపు కేసీఆర్, ఇటు అసెంబ్లీ సాక్షిగా, కేసీఆర్ ఈజ్ మాగ్నానిమస్ అంటూ జగన్ చేసిన వ్యాఖ్యలు, రాయలసీమ వచ్చి, రాయలసీమను రత్నాలు సీమను చేస్తా అని కేసీఆర్ చెప్పిన మాటలు, అలాగే కాళేశ్వరం వెళ్లి, రాయలసీమకే నష్టం జరిగే ప్రాజెక్ట్ అని చెప్తున్నా, కాళేశ్వరం వెళ్ళిన జగన్ వార్తలు ఇంకా మనకు గుర్తుండే ఉన్నాయి. ఇంకా అవి చెవుల్లో తిరుగుతూనే ఉన్నాయి. గోదావరి నీళ్ళు, తెలంగాణా మీదుగా తీసుకువెళ్ళి, శ్రీశైలంలో పోసి, అక్కడ నుంచి తీసుకువెళ్తా అని చెప్పిన జగన్ వ్యాఖ్యల పై, పెద్ద దుమారమే రేగింది. కేసీఆర్ లాంటి వారిని నమ్మకూడదు, ఇది మీ ఇద్దరి సొంత వ్యవహరం కాదు, అని ఎంత చెప్పినా అప్పట్లో జగన్ వినిపించుకోలేదు. అయితే, ఆ ప్రాజెక్ట్ సంగతి ఏమైందో తెలియదు. గోదావరి, కృష్ణా అనుసంధానం చెయ్యాలి అనే, చంద్రబాబు ప్రణాళికలు పక్కకు వెళ్ళిపోయాయి. దండిగా ఉన్న గోదావరి నీళ్ళు ఎలా వాడుకోవాలి, ఎలా కృష్ణా నదికి అనుసంధానం చెయ్యాలి అనే ఆలోచన లేదు.

కృష్ణా నది పై, 10, 15 రోజులుకు వచ్చే వరద నీటి కోసం, అసలు వరద వస్తుందో లేదో తెలియని చోట, ప్రాజెక్ట్ కడతాం, విస్తరణ చేస్తాం అని జగన్ అనటం, అలా ఎలా కుదురుతుంది, మాకు మాట మాత్రం అయినా చెప్పరా, మాకు చెప్పకుండా కొత్త ప్రాజెక్ట్ ఎలా కడతారు అంటూ కేసీఆర్ అనటం, మా నీళ్ళు మేము వాడుకుంటే మీకు బాధ ఏమిటి అని ఇటు వైపు, మీ నీళ్ళు కాదు, మా ప్రాంతం ఎండిపోతుంది అని అటు వైపు, ఉన్నట్టు ఉండి, ఎందుకు వచ్చిందో కానీ, లేని వివాదం వచ్చింది. పోనీ ఇదేమన్న ఒక్క 50 టిఎంసీలో, 100 టీఎంసీలో తీసుకు వెళ్ళ ప్రాజెక్ట్ ఆ అంటే అదీ కాదు. అయితే, అటు తెలంగాణా, ఇటు ఆంధ్రప్రదేశ్, రెండూ పరస్పరం ఫిర్యాదులు చేసుకోవటం, అటు కేంద్రానికి, ఇటు కృష్ణా బోర్డు కు ఫిర్యాదులు వెళ్ళటం జరిగిపోయాయి.

ఈ నేపధ్యంలో, రెండు రాష్ట్రాల మధ్య జరుగుతున్న విషయం నేపధ్యంలో, కేంద్రం ఎంటర్ అయ్యింది. ఈ విషయం పై కీలక నిర్ణయం ప్రకటించింది. రెండు రాష్ట్రాల మధ్య ఉన్న జల వివాదాల పై, అపెక్స్ కౌన్సిల్ సమావేశం ఏర్పాటు చెయ్యాలని నిర్ణయం తీసుకుంది. రాష్ట్ర విభజన జరిగిన తరువాత, కేవలం ఒక్కసారే ఈ సమావేశం జరిగింది. అప్పట్లో చంద్రబాబు, కేసీఆర్ ఈ మీటింగ్ కు వచ్చారు. ఇప్పుడు, మళ్ళీ అపెక్స్ కౌన్సిల్ సమావేశం ఏర్పాటు చెయ్యాలని నిర్ణయం తీసుకుంది, రెండు రాష్ట్రాలకు సమాచారం పంపించింది. అలాగే కృష్ణా, గోదావరి వాటర్ బోర్డుకు కూడా సమాచారం ఇచ్చారు. ఈ సమావేశంలో చర్చించే ఎజెండా పంపించాలని, రెండు రాష్ట్రాలను, కేంద్రం కోరింది. మరి, ఈ సమావేశం ఎప్పుడు జరుగుతుంది, ఏమి నిర్ణయం తీసుకుంటారు అనేది చూడాల్సి ఉంది.

ప్రభుత్వ భవనాలకు వైసీపీ రంగులు విషయంలో, హైకోర్ట్, సుప్రీం కోర్ట్ తీర్పు ఇచ్చిన తరువాత కూడా, జగన్ ప్రభుత్వం అవే రంగులు వెయ్యటం పై, హైకోర్ట్ తీవ్ర ఆగ్రహం వ్యక్తం చేసింది. మొన్న రంగులు జీవో రద్దు చేసిన తరువాత, జగన్ ప్రభుత్వం మరో జీవోతో ముందుకు వచ్చిన సంగతి తెలిసిందే. జీవో 623 అనే జీవోతో, వైసీపీ మూడు రంగులకు తోడుగా, మట్టి రంగు కూడా కలపాలని జీవో ఇస్తూ, మళ్ళీ రంగులు మొదలు పెట్టారు. అయితే, ఈ విషయం పై సోమయాజు అనే న్యాయవాది, హైకోర్ట్ ద్రుష్టికి తెచ్చారు. హైకోర్ట్, సుప్రీం కోర్ట్ ఉత్తర్వులు ఉల్లంఘించి, రాష్ట్ర ప్రభుత్వం మళ్ళీ రంగులు వేస్తుంది అని తెలిపారు. దీని పై గత పది రోజులుగా హైకోర్ట్ లో విచారణ జరిగింది. రెండు రోజుల క్రితం వాదనలు ముగియటంతో, హైకోర్ట్ తీర్పు రిజర్వులో పెట్టింది. దీని పై, ఈ రోజు హైకోర్ట్ తీర్పు ఇచ్చింది. జీవో 623ని సస్పెండ్ చేస్తున్నట్టు హైకోర్ట్ ఆదేశాలు ఇచ్చింది.

రంగుల అంశం పై హైకోర్టు, సుప్రీం కోర్టు ఉత్తర్వులను పట్టించుకోలేదని వ్యాఖ్యానించింది హైకోర్ట్. తమ ఉత్తర్వులు పట్టించుకోనందుకు, కోర్ట్ ధిక్కరణ ప్రక్రియ మొదలు పెట్టాలని, ఈ కేసును సుమోటోగా తీసుకుంటామని హైకోర్ట్ తెలిపింది. ఈ కేసు 28వ తారిఖున విచారణకు వచ్చే అవకాసం ఉంది. ఈ విషయం పై, సీఎస్, ఈసీ, పంచాయతీ కార్యదర్శి వివరణ ఇవ్వాలని హైకోర్ట్ ఆదేశించింది. హైకోర్ట్ సుమోటోగా కేసు తెసుకుని, కోర్ట్ ధిక్కరణ ప్రక్రియ మొదలు పెట్టాలని, ఆదేశాలు ఇచ్చినట్టు, న్యాయవాది సోమయాజు తెలిపారు. గతంలో ఇదే విషయం పై హైకోర్ట్ స్పష్టంగా తీర్పు ఇచ్చిందని, దీని పై సుప్రీం కోర్ట్ కు కూడా రాష్ట్ర ప్రభుత్వం వెళ్ళింది అని, హైకోర్ట్, సుప్రీం కోర్ట్ ఆదేశాలు ఇచ్చిన తరువాత కుడా, ప్రభుత్వం ఇలా చెయ్యకూడదు అని అన్నారు.