news

నిన్నటి మోడీ గుంటూరు పర్యటన పై, జగన్ మోహన్ రెడ్డి ఎక్కడ అని, 5 కోట్ల మంది ప్రజలు ప్రశ్నిస్తుంటే, ఒక రోజు తరువాత తీరిగ్గా వచ్చిన జగన్, పూర్తిగా ముసుగు తీసేసాడు. తన పార్టీ ప్రతినిధి చేత, నిన్నటి మోడీ పర్యటన, తరువాత మోడీకి చంద్రబాబు చెప్పిన సమాధానం పై, తన పార్టీ తరుపున అభిప్రాయం చెప్పించారు. ప్రస్తుతం రాష్ట్రం ఉన్న మూడ్ లో, ఇది నిజంగా షాకింగ్ ప్రకటనే. ఎంతటి వారైనా ఎంతో కొంత పౌరుషం ఉంటుంది. అలాంటింది రాయలసీమ, పులివెందుల అని చెప్పుకునే జగన్, మోడీ మనకు చేస్తున్న అన్యాయం పై, కనీసం పౌరుషం, సిగ్గు, రోషం, ఆత్మగౌరవం లేకుండా, మోడీకి జై కొడుతూ, ఏపి ప్రజలను నిలువునా ముంచేశారు. ఈ రోజు వైసీపీ నేత ఆనం రామనారాయణరెడ్డి ప్రెస్ మీట్ చూస్తే, ప్రతి ఆంధ్రుడు సిగ్గుతో తలదించుకుంటారు.

ముఖ్యమంత్రి చంద్రబాబు ప్రవర్తన సంస్కారహీనంగా ఉందని, ఆంధ్రుల పరువు తీసే విధంగా ఉందని వైసీపీ నేత ఆనం రామనారాయణరెడ్డి విమర్శించారు. సోమవారం నెల్లూరులో ఆయన మీడియాతో మాట్లాడుతూ ప్రధాని ఏపీకి అతిథిగా వస్తే అవమానిస్తారా? దూషిస్తారా? అంటూ విమర్శించారు. ఏపీకి మోదీ అతిథిగా వచ్చినప్పుడు గౌరవించి... మనకు ఏం కావాలో చెప్పాలన్నారు. అంతేగానీ ఇలా అవమానించడం సరికాదన్నారు. చంద్రబాబు లాంటి సంస్కారహీనుడు ఏపీ సీఎంగా ఉండటం శోచనీయమన్నారు. కనీసం మోదీని స్వాగతించేందుకు కూడా ప్రొటోకాల్‌ అధికారులు, మంత్రులు వెళ్లలేదని, ఇంతకంటే దుర్మార్గం లేదని ఆయన అన్నారు. మోదీని చంద్రబాబు అవమానించారని ఆనం రామనారాయణరెడ్డి అన్నారు.

నిన్నేమో మోడీ వచ్చి చంద్రబాబుని బిలో ది బెల్ట్ తిడుతూ, ప్రధాని పదవికే మచ్చ తీసుకు వచ్చారు. జగన్ మోహన్ రెడ్డిని ఒక్క మాట అనడు. అవినీతి పై పోరాటం అంటూ, ఇటు పక్క A1ని, ఇటు పక్క A2ని కూర్చోబెట్టుకుని, ఏపి పై యుద్ధానికి వస్తున్నారు. నిన్నటి మోడీ మీటింగ్ కు కూడా, జగన్ మోహన్ రెడ్డి తన మనుషులుని పెట్టి, సభ సక్సెస్ చెయ్యాలంటూ ఆదేశాలు ఇచ్చారు. మోడీ జగన్ ను ఒక్క మాట అనరు, మరో పక్క జగన్ మోడీని ఒక్క మాట అనరు. రాష్ట్రానికి ద్రోహం చేసిన మోడీని ఎవరన్నా తిడితే తట్టుకోలేరు. చివరకు 5 కోట్ల మంది మోడీని వ్యతిరేకిస్తుంటే, మోడీని తిట్టటం తప్పు, ఆయన్ను ఒక్క మాట కూడా అనకూడదు అంటూ, ఖండనలు ఇస్తున్నారు. ఇలాంటి వారికి ప్రజలే బుద్ధి చెప్పాలి.

ముఖ్యమంత్రి చంద్రబాబు చేపట్టిన ధర్మపోరాట దీక్షకు కాంగ్రెస్ పార్టీ అధ్యక్షుడు రాహుల్ గాంధీ సంఘీభావం తెలిపారు. సోమవారం దీక్షా స్థలికి చేరుకున్న ఆయన ముందుగా ఎన్టీఆర్ చిత్రపటానికి పూలమాల వేసి నివాళులర్పించారు. అనంతరం చంద్రబాబును కలిసి దీక్షకు మద్దుతు తెలిపారు. ఇక్కడ ఉన్న మీకు ఒక ప్రశ్న, ఓ రాష్ట్ర ప్రజలకు ఇచ్చిన మాట నిలబెట్టుకోలేని ప్రధానమంత్రి ఎక్కడైనా ఉంటారా అంటూ ప్రసంగం మొదలు పెట్టారు. ప్రధాని స్థాయిలో ఉన్న వ్యక్తి ఇచ్చిన మాటకు కట్టుబడాలని ఏఐసీసీ అధ్యక్షుడు రాహుల్‌ గాంధీ అన్నారు. ఈ ప్రధాని మాత్రం చెప్పేవన్నీ అబద్ధాలేనని దుయ్యబట్టారు. ఏపీ ప్రజలకిచ్చిన హామీలను ఆయన విస్మరించారన్నారు. ఏపీ ఈ దేశంలో భాగం కాదా? అని ప్రశ్నించారు.

ఆంధ్రప్రదేశ్‌ ప్రజలకు ఇచ్చిన మాటను ప్రధాని పెడచెవిన పెట్టారని దుయ్యబట్టారు. ప్రధాని ఎక్కడికి వెళితే అక్కడి పాట పాడతారని ధ్వజమెత్తారు. ఏపీకి వెళ్తే హోదా ఇవ్వకుండా అబద్ధాలు చెబుతారని విమర్శించారు. ప్రధాని మోదీకి విశ్వసనీయత లేదని, ఆయన చెప్పేవన్నీ అబద్ధాలేనని ఆరోపించారు. ఏపీ ప్రజల సొమ్మును దోచి అంబానీకి కట్టబెట్టారన్నారు. ఏపీ ప్రజలకు అండగా ఉంటామని మరోసారి హామీ ఇచ్చారు. మాట ఇచ్చి నిలుపుకోలేని ఘనత వహించిన ప్రధాని దేశానికి అవసరమా? అని ప్రశ్నించారు. ఈ ప్రధాని ఏపీ ప్రజలకు ఇచ్చిన హామీలను నెరవేర్చలేదని గుర్తు చేస్తూ, ఆంధ్రప్రదేశ్ ఇండియాలో భాగం కాదా? అని ప్రశ్నించారు. కాంగ్రెస్ పార్టీ అధికారంలోకి రాగానే రాష్ట్రానికి జరగాల్సిన న్యాయం నిమిషాల్లో జరుగుతుందని హామీ ఇచ్చారు.

మరో పక్క, చంద్రబాబు చేపట్టిన ధర్మపోరాట దీక్షకు జమ్ముకశ్మీర్‌ మాజీ ముఖ్యమంత్రి ఫరూక్‌ అబ్దుల్లా మద్దతు తెలిపారు. ఈ సందర్భంగా ఆయన మాట్లాడుతూ.. పార్లమెంట్‌ సాక్షిగా ఇచ్చిన హామీలను నెరవేర్చాల్సిన బాధ్యత కేంద్రానిదేనని ఉద్ఘాటించారు. ధర్మం తప్పినప్పుడే ప్రజల్లో ఆందోళన మొదలవుతుందని, అందుకే ఆంధ్రా ప్రజలు ఇక్కడికి వరకు వచ్చారన్నారు. ఓట్ల కోసం ప్రజలను కులాలు, మతాలను విభజించి పాలించాలని చూస్తున్నారని కేంద్రంపై విమర్శలు గుప్పించారు. దేశం సురక్షితంగా ఉండాలంటే ఈ ప్రభుత్వం పోవాలన్నారు. వ్యక్తిగత దూషణల స్థాయికి ప్రధాని దిగజారకూడదని హితవు పలికారు. ప్రధాని అన్న వ్యక్తి ప్రజలకు ఇచ్చిన హామీలను అమలు చేయాలని డిమాండ్‌ చేశారు. ఏపీకి కేంద్రం చేసిన అన్యాయానికి నిరసనగా ఈరోజు రాత్రి 8 గంటల వరకు చంద్రబాబు దీక్ష చేయనున్నారు. దీక్షకు పలు జాతీయ పార్టీలు మద్దతు తెలుపనున్నాయి.

ఒక వైపు ఢిల్లీ ఏపి భవన్ లో చంద్రబాబు దీక్ష చేసి, 22 పార్టీల మద్దతుతో, మోడీకి చుక్కలు చూపిస్తుంటే, పార్లమెంట్ లోపల కుర్ర ఎంపీ హీట్ పెంచుతున్నారు. కేంద్రం ఏపీకి తీరని ద్రోహం చేసిందని తెలుగుదేశం పార్టీ ఎంపీ రామ్మోహన్‌నాయుడు ఆరోపించారు. నాలుగున్నరేళ్లుగా కేంద్రం తీవ్ర జాప్యం చేసిందన్నారు. ఏపీ సమస్యలపై, నిన్న గుంటూరులో ప్రధాని మోదీ చేసిన విమర్శలను ఆయన పార్లమెంట్‌లో ప్రస్తావించారు. రైల్వేజోన్ హామీని కేంద్రం తుంగలో తొక్కిందన్నారు. ఇప్పటి వరకు కనీసం ఒక్క మీటింగ్ పెట్టలేదని ఆయన విమర్శించారు. ఏపీలో వెనుకబడిన జిల్లాల కోసం రూ. 350 కోట్లు అకౌంట్‌లో వేసి... ఆ తర్వాత రాజకీయ కక్షతో కేంద్రం వెనక్కి తీసుకుందని రామ్మోహన్‌ నాయుడు విమర్శించారు. ఇంతటి దారుణం ఎప్పడూ జరగలేదని అన్నారు. ముఖ్యమంత్రి చంద్రబాబు తనను విమర్శిస్తున్నారని మోదీ అనడం దారుణమని రామ్మోహన్‌నాయుడు అన్నారు. చంద్రబాబు ఎప్పుడూ వ్యక్తిగత విమర్శలు చేయలేదని, ఆయన ఎప్పుడూ ఏపీ కోసమే మాట్లాడారన్నారు. ఏపీకి చేయాల్సిన సాయం కేంద్రం చేసి ఉంటే.. తాము మాట్లాడాల్సి వచ్చేది కాదని ఆయన అన్నారు. ఇలా ధర్మపోరాట దీక్షల వరకు వచ్చేది కాదన్నారు.

'ఏపీకి తీరని ద్రోహం చేశారు. వెనుకబడిన జిల్లాలకు డబ్బులిచ్చి వెనక్కి తీసుకున్నారు. అమరావతిలో రాజధాని నిర్మాణానికి కేవలం రూ.1.500 కోట్లు ఇచ్చి చేతులు దులిపేసుకున్నారు. ఆ డబ్బులతో ఏ రాజధాని కట్టొచ్చో చెబితే మేం సంతోషిస్తాం. ఇదేం తీరు. ఇదేం పద్ధతి' అంటూ కేంద్ర ప్రభుత్వ తీరుపై టీడీపీ ఎంపి రామ్మోహన్ నాయుడు నిప్పులు చెరిగారు. ఏపీ కోసం చంద్రబాబు మాట్లాడితే, దానికి ప్రధాని మోదీ సమాధానం చెప్పకుండా వ్యక్తిగత విమర్శలు చేయడం దారణమని, అసలు చేయాల్సిన సాయం చేస్తే 'ధర్మపోరాటం' వరకూ ఎందుకు వెళ్తాం? అని ఆయన కేంద్రాన్ని నిలదీశారు. ఏపీకి జరుగుతున్న అన్యాయంపై లోక్‌సభలో రామ్మోహన్‌నాయుడు మాట్లాడుతూ, రాజకీయ కక్షతోనే ఇచ్చిన డబ్బులు కూడా వెనక్కి తీసుకున్న ఘనత మోదీ సర్కార్‌కే దక్కుతుందంటూ నిప్పులు చెరిగారు.

'నాలుగున్నరేళ్లుగా ఆంధ్రప్రదేశ్‌కు తీరని అన్యాయం చేస్తూనే ఉన్నారు. రైల్వే జోన్ ఇస్తామన్నారు. ఆ ఊసే లేదు. దీనికోసం కనీసం ఒక్క మీటింగ్ కూడా పెట్టలేదు. వెనుకబడిన జిల్లాలకు రూ.350 కోట్లు అకౌంట్లో వేసి...ఆ తర్వాత వెనక్కి తీసేసుకున్నారు. ఇంతకంటే దారణం ఏమైనా ఉంటుందా?' అని రామ్మోహన్ నాయుడు ఆవేదన వ్యక్తం చేశారు. అమరావతిలో రాజధాని కోసం కేంద్రం కేవలం రూ.1,500 కోట్లు ఇచ్చి చేతులెత్తేసింది. ఆ డబ్బులతో ఎలాంటి రాజధాని కట్టాలి? పటేల్ విగ్రహానికి వేల కోట్లు ఇచ్చి, అమరావతిని పట్టించుకోరా?. మా చంద్రబాబు మీద ఉన్న నమ్మకంతోనే రైతులు 35వేల ఎకరాలు రాజధాని కోసం స్వచ్ఛందంగా ఇచ్చారు. అది మా నాయకుడి స్థాయి...అని రామ్మోహన్ నాయుడు అన్నారు. ఏపీకి కేంద్రం సహకరించకపోయినా, సాయం చేయకపోయినా చంద్రబాబు రాష్ట్రం కోసం అహరహం శ్రమిస్తున్నారని, రాష్ట్రానికి జరిగిన అన్యాయం గురించి చంద్రబాబు మాట్లాడుతూంటే ఆయనపై మోదీ వ్యక్తిగత విమర్శలు గుప్పించడంలో అర్ధం ఏమిటని నిలదీశారు. ఏపీకి జరిగిన అన్యాయంపైనే చంద్రబాబు ధర్మపోరాట దీక్షకు దిగారని అన్నారు. 'మా ఆవేదన చెబుతాం. మాకు జరిగిన అన్యాయంపై నిలదీస్తూనే ఉంటా' అని ఆయన కుండబద్ధలు కొట్టారు.