news

ఆంధ్రప్రదేశ్ లో వైసిపి ప్రభుత్వం అరాచకాలు చేస్తుందంటూ రాజ్యసభలో తెలుగుదేశం ఎంపి కనకమేడల రవీంద్ర కుమార్ విరుచుకు పడ్డారు. ఆయన ప్రసంగిస్తూ మా ఆంధ్రప్రదేశ్ లో జగన్ ప్రభుత్వం పూర్తిగా విఫలమైందని ,ఈ విషయంలో కేంద్ర ప్రభుత్వం కల్పించుకోక పోతే తమ రాష్ట్రం ఎందుకు పనికి రాకుండా పోతుందని చెప్పుకొచ్చారు. రాష్ట్ర ప్రభుత్వం చేస్తున్న అస్త వ్యస్త విధానాలతో ఎంతో నష్టపోయామని అన్నారు. అప్పులు మీద అప్పులు చేస్తూ, పన్నులు మీద పన్నులు వేస్తూ, నాశనం చేస్తున్నారని అన్నారు. చివరకు గవర్నర్ కు తెలియకుండా, గవర్నర్ పేరు ఉపయోగించి అప్పులు తీసుకుని వచ్చే పరిస్థితి రాష్ట్రంలో ఉందని అన్నారు. రాష్ట్రంలో అన్నీ తనఖా పెట్టేస్తున్నారని, అప్పులతో రాష్ట్రం నడుస్తుందని అన్నారు. సామాన్య ప్రజల మీదే కాకుండా సినిమా వాళ్ళ మీద కూడా ఈ జగన్ కక్ష్య పూరితంగా ప్రవర్తిస్తున్నారని కూడా విమర్శించారు. హీరో పవన్ కళ్యాణ్ సినిమాలకు కూడా అడుగడుగునా అడ్డు పడుతున్నారని కనకమేడల విమర్శించారు. సినిమాల విషయంలో కూడా కక్ష సాధింపు ధోరణితో ముందుకు వెళ్తున్నారని అన్నారు. కేవలం పవన్ కళ్యాణ్ పైన కక్ష సాధింపు చేయటానికి మాత్రమే, ఇలాంటి పనులు చేస్తున్నారు అంటూ ధ్వజమెత్తారు.

రాష్ట్రంలో అవినీతి పెచ్చుమీరిందని, ఎక్కడ చూసినా అవినీతే అని, ఇసుకలో, భూముల్లో, మద్యంలో, మైన్స్ లో ఇలా మొత్తం అవినీతిమయం చేసారని అన్నారు. చివరకు ఎప్పుడూ లేనిది రాష్ట్రంలో డ్రగ్స్ లాంటివి కూడా తీసుకుని వచ్చారని అన్నారు. గంజాయి క్యాపిటల్ అయ్యిందని అన్నారు. చివరిగా గుడివాడలో కాసినో లాంటి పెట్టి మా రాష్ట్ర పరువు తీస్తున్నారని, ఏకంగా ఒక మంత్రి స్థాయిలో ఉన్న వ్యక్తి ఈ మొత్తం వ్యవహారం నడుపుతున్నారు అంటూ, క్యాసినో గురించి కూడా ఆయన విరుచుకుపడ్డారు. ఇంతలో వైసిపి ఎంపీలు, కల్పించుకుని ఆయనను మాట్లాడనివ్వకుండా అడ్డుకున్నారు. కాసేపు ఇద్దరి మధ్య మాటల యుద్ధం జరిగింది. కనకమేడల మాట్లాడుతున్నంత సేపు విజయసాయి రెడ్డి ,మిగతా MPలు అడ్డు పడుతూనే ఉన్నారు. విజయసాయి రెడ్డి మాట్లాడుతూ, తమ పాలనలోనే ప్రజలు హాపీ గా ఉన్నారని , చంద్రబాబు పాలన కంటే జగన్ పాలన చాలా రెట్లు నయమని అరుస్తూనే ఉన్నారు. కాని వాస్తవం ఏంటి అనేది ప్రజలకు తెలుసు కదా.

జగన్ మోహన్ రెడ్డి చాలా రోజుల తరువాత హైదరాబాద్ వెళ్తున్నారు. ఈ మధ్య కాలంలో ఆయన హైదరాబాద్ వెళ్ళింది లేదు. నాలుగు నెలల క్రిందట వరదల సమయంలో, ఇక్కడ వరదలు ఉన్నా, హైదరాబాద్ పెళ్లికి వెళ్లి, విందు భోజనాలు చేయటం అప్పట్లో వివాదాస్పదం అయిన సంగతి తెలిసిందే. మూడు నాలుగు సార్లు కేసీఆర్ ని కలవటానికి, రెండు సార్లు నాంపల్లి కోర్టుకు జగన్ వెళ్ళారు. కోర్టు వాయిదాలకు కూడా జగన్ వెళ్ళటం లేదు. విధి నిర్వహణలో బిజీగా ఉండి జగన్ వెళ్ళలేక పోయారని, కోర్టులో చెప్తూ మినహాయింపు పొందుతున్నారు. ఇక ఈ విషయం పక్కన పెడితే, ఈ రోజు జగన్ హైదరాబాద్ వెళ్తుంది, ముచ్చింతల్‌లోని రామానుజ సహస్రాబ్ది వేడుకల్లో పాల్గునటానికి. చినజీయర్ స్వామి ఆహ్వానం మేరకు జగన్ వెళ్తున్నారు. ఈ రోజు మధ్యాహ్నం 3.50కి గన్నవరం నుంచి ప్రత్యేక విమానంలో జగన్ మోహన్ రెడ్డి హైదరాబద వెళ్తారు. సాయంత్రం 4.30కు శంషాబాద్ ఎయిర్ పోర్ట్ కు చేరకుని, అక్కడ నుంచే నేరుగా ముచ్చింతల్ ఆశ్రమానికి వెళ్తారు. అక్కడ కార్యక్రమంలో పాల్గుని, అదే రోజు రాత్రికి వెంటనే తిరిగి తాడేపల్లి వచ్చేస్తారు. హైదరాబాద్ లో ఉన్న లోటస్ పాండ్ కి జగన్, ఈ మధ్య కాలంలో వెళ్ళలేదు. మరి అక్కడకు కూడా జగన్ వెళ్తారేమో చూడాలి మరి.

ఇక ముచ్చింతల్‌లో రామానుజాచార్యుల విగ్రహాన్ని రెండు రోజుల క్రితం ప్రాధాని ప్రారంభించిన సంగతి తెలిసిందే. ముచ్చింతల్ లో 216 అడుగుల రామానుజాచార్యుల విగ్రహాన్ని, ప్రధాని మోడీ జాతికి అంకితం చేసారు. ఘనంగా జరిగిన ఈ కార్యక్రమంలో ప్రధాని మోడీ ప్రసంగించి, రామానుజాచార్యులను కీర్తించారు. అయితే ఈ కార్యక్రమానికి తెలంగాణా ముఖ్యమంత్రి కేసీఆర్ రాకపోవటం కూడా, వివాదాస్పదం అయ్యింది. కేసీఆర్ కు జ్వరంగా ఉందని, అందుకే ఆయన ఆ కార్యక్రమానికి రాలేదని తెలంగాణా సిఎంఓ ఆఫీస్ చెప్పింది. మరి ఈ రోజు జగన్ తో పాటు, కేసీఆర్ కూడా ఉంటారో లేదో చూడాలి. ఇక నిన్న సాయంత్రం ముచ్చింతల్‌లో జరిగిన, రామానుజ సహస్రాబ్ది వేడుకల్లో , జనసేన అధినేత పవన్ కళ్యాణ్ పాల్గున్నారు. సమతామూర్తి విగ్రహాన్ని పవన్ కళ్యాణ్ సందర్శించారు. వెయ్యేళ్ల చరిత్ర కలిగిన రామానుజుల విగ్రహాన్ని దర్శించుకోవటం సంతోషంగా ఉందని అన్నారు. అలాగే హైదరాబాద్ ఆధ్యాత్మిక రాజధానిగా మారనుందని పవన్ అన్నారు.

రాజకీయాల కోసం, కుటుంబాల్లో కూడా చిచ్చు పెట్టటం, మన రాష్ట్రంలో మొదటి నుంచి చూస్తున్నాం. మరీ ముఖ్యంగా నందమూరి కుటుంబం నుంచి, చంద్రబాబుని వేరు చేయటానికి, గత 30 ఏళ్ళ నుంచి రాజశేఖర్ రెడ్డి, ఆ తరువాత జగన్ మోహన్ రెడ్డి, ఎన్నో ప్రయత్నాలు చేసారు. కొన్నిట్లో సక్సెస్ అయ్యారు కూడా. అయితే ఇప్పుడు తాజాగా జూనియర్ ఎన్టీఆర్, అలాగే బాలయ్య విషయంలో కూడా, వైఎస్ఆర్ కాంగ్రెస్ పార్టీ, ఇలాంటి జిమ్మిక్కులే పన్నుతూ వస్తుంది. ఇప్పటి వరకు అయితే వీరి వేషాలను, ఇద్దరూ కూడా తెలివిగా తప్పిస్తూ వస్తున్నారు. తాజాగా ఎన్టీఆర్ పేరుని, కృష్ణా జిల్లాకు పెట్టిన విషయం పైన, బాలయ్య, జూనియర్ ఎన్టీఆర్ స్పందించాలని, జగన్ కు ధన్యవాదాలు చెప్పాలి అంటూ, వైసీపీ పెద్ద క్యాంపెయిన్ నడిపింది. ఎవరు స్పందించినా, వారిని చూపించి, చంద్రబాబుని , నందమూరి అభిమానులకు దూరం చేయాలని, ఎన్టీఆర్ అంటే చంద్రబాబుకి ఇష్టం లేదు అనే సీన్ చేయాలని అనుకున్నారు. అయితే జూనియర్ ఎన్టీఆర్ బయటకు రారు కాబట్టి ఆయనకు ఇబ్బంది లేదు, ఆయన తప్పించుకున్నారు. బాలయ్య మాత్రం ఎమ్మెల్యే కాబట్టి ప్రజల్లో తిరుగుతారు. ఆయనను ఎలాగైనా ఈ విషయం పై స్పందించే విధంగా, వైసీపీ ట్రాప్ వేసింది. తమ అనుకూల మీడియాను వాడుకుంది.

బాలయ్య హిందూపురం జిల్లా కోసం, నిరసన తెలుపుతున్నారు. ఈ క్రమంలో, బాలయ్య విలేఖరులతో మాట్లాడిన సమయంలో, ఎన్టీఆర్ పేరు పెట్టారు కదా, మీకు సంతోషమేనా అని బాలయ్యని విలేఖరులు అడిగారు. దీనికి బాలయ్య స్పందించారు. ఎన్టీఆర్ గారి మీద వీళ్ళకు ఏదో ప్రేమ ఉన్నట్టు మాట్లాడుతూ హడావిడి చేస్తున్నారని, అసలు వీళ్ళకు నిజంగా ఇంత ప్రేమ ఉందా అంటూ ప్రశ్నించారు. అంత ప్రేమే ఉంటే, ప్రతి ఊరిలో ఎన్టీఆర్ విగ్రహాలు పగలగొడుతున్నారని, అప్పుడు వీళ్ళు ఎక్కడ ఉన్నారని అన్నారు. ఒక్కరి పైన అయినా చర్యలు తీసుకున్నారా అని ప్రశ్నించారు. పేదలకు పెట్టే అన్న క్యాంటీన్లకు, ఎన్టీఆర్ పేరు ఉందని, ఎత్తేసిన వీళ్ళా మాట్లాడేది, పధకాలకు ఎన్టీఆర్ పేరు ఉంటే మార్చేసిన వీరా మాట్లాడేది అంటూ, బాలయ్య ఎదురు ప్రశ్నించారు. దీంతో బాలయ్య తెలివిగా సమాధానం చెప్పటంతో, వైసీపీ అనుకున్నది జరగలేదు. బాలయ్య ధన్యవాదాలు చెప్తే, అది సాకుగా చూపి, చంద్రబాబు మీద రాజకీయంగా పై చేయి సాధించ వచ్చు అనే ప్లాన్ వర్క్ అవుట్ అవ్వలేదు.