news

ఆంధ్రప్రదేశ్ ఎన్నికల కమీషనర్ నిమ్మగడ్డ రమేష్ కుమార్ దూకుడు పెంచారు. రేపు ఎన్నికల నోటిఫికేషన్ వస్తున్న నేపధ్యంలో, కొద్ది సేపటి క్రితం, తొమ్మిది మంది అధికారులను తప్పించాలని, చీఫ్ సెక్రటరీ, డీజీపీలకు లేఖ రాసారు. ఇందులో ఇద్దరు ఐఏఎస్ లు, ఒక ఐపీఎస్ ఉన్నారు. గతంలో ఎన్నికల నిర్వహణ సమయంలో ఈ అధికారులు, విధులు సరిగ్గా చేయాటం లేదు అంటూ, వారి పై వేటు వేసారు. అయితే ఎన్నికలు ఆగిపోవటంతో, వీరి పై ప్రభుత్వం ఎలాంటి చర్యలు తీసుకోలేదు. అయితే ఇప్పుడు తాజాగా మళ్ళీ ఎన్నికలు మొదలవ్వటంతో, నిమ్మగడ్డ రమేష్ కుమార్ చర్యలకు ఉపక్రమించారు. ఎన్నికలు సజావుగా నిర్వహించే విధంగా అప్పట్లోనే వీరి పై ఎన్నికల కమీషనర్ చర్యలు తీసుకోవాలని, కోరారు. ఇప్పుడు మరోసారి వీరిని తొలగించాలని, వీరి స్థానంలో మూడేసి పేర్లతో తనకు ప్రతిపాదనలు పంపాలని, చీఫ్ సెక్రటరీకి, లేఖ రాసారు. ఈ తొమ్మిది మందిలో, గుంటూరు జిల్లా కలెక్టర్, చిత్తూరు జిల్లా కలెక్టర్, తిరుపతి అర్బన్ ఎస్పీ, పలమనేరు డీఎస్పీ, శ్రీకాళహస్తి డీఎస్పీ, మర్చార్ల సిఐ, పుంగనూరు సిఐ, తాడిపత్రి సిఐ, రాయదుర్గం సిఐల పై చర్యలు తీసుకోవాలని లేఖ రాసారు. వీరిని గ్రామపంచాయతీ ఎన్నికల విధులకు దూరంగా ఉంచాలని లేఖ రాసారు.

దీనికి సంబంధించి, ఒక్కో వ్యక్తి స్థానంలో ముగ్గురు పేర్లు తనకు వెంటనే పంపాలని కోరారు. దీనికి సంబంధించి, కొద్ది సేపటి క్రితమే దీనికి సంబంధించి ఆదేశాలు ఇచ్చారు. మరి ఈ లేఖ పై చీఫ్ సెక్రటరీ, డీజీపీ ఎలా స్పందిస్తారో చూడాల్సి ఉంది. మరో పక్క కొద్ది సేపటి క్రితం జగన్ మోహన్ రెడ్డి దగ్గర, ఒక అర్జెంట్ కీలక సమావేశం జరుగుతుంది. అడ్వకేట్ జనరల్ శ్రీరామ్, హోంమంత్రి సుచరిత, ప్రభుత్వ సలహాదారు సజ్జల రామకృష్ణా రెడ్డి కీలక సమావేశం ఏర్పాటు చేసారు. ఇందులో ఎలాంటి వ్యూహం అనుసరించాలి, ఎలక్షన్ కమీషనర్ దూకుడుకు ఎలా బ్రేక్ వేయాలి అనే అంశం పై చర్చిస్తున్నారు. ఇక ఈ విషయం పక్కన పెడితే, ఉదయం నుంచి రెండు సార్లు అప్పాయింట్మెంట్ ఇచ్చినా రాకపోవటం పై, సీనియర్ ఐఏఎస్ ఆఫీసర్లు, ద్వివేది, గిరిజా శంకర్లకు మేమో జారీ చేసారు, చర్యలు ఉంటాయని చెప్పటంతో, వాళ్ళు కొద్ది సేపటి క్రితమే, తాము వచ్చి కలుస్తాం అని చెప్పినట్టు తెలుస్తుంది.

ఆంధ్రప్రదేశ్ రాష్ట్రంలో పంచాయతీ ఎన్నికలకు అనుమతిస్తూ, రాష్ట్ర హైకోర్టు డివిజన్ బెంచ్ తీసుకున్న నిర్ణయాన్ని, సుప్రీం కోర్టులో నిన్న రాష్ట్ర ప్రభుత్వం పిటీషన్ దాఖలు చేసిన సంగతి తెలిసిందే. అయితే ఈ పిటీషన్ ఈ రోజు హియరింగ్ కి వస్తుందని అందరూ ఊహించారు. అయితే, రాష్ట్ర ప్రభుత్వం వేసిన పిటీషన్ లో తప్పులు ఉండటంతో, సుప్రీం కోర్టు రిజిస్ట్రీ పిటీషన్ ను వెనక్కు పంపించారు. తప్పులు సరి చేసి, మళ్ళీ వేయమన్నారు. అయితే తప్పులు సరి చేసి వేసే లోపు, బెంచ్ టైం అయిపోవటంతో, ఇక ఈ పిటీషన్ ఈ రోజు విచారణకు వచ్చే అవకాసం లేదు. ఇప్పటికే ప్రభుత్వం, పిటీషన్ లో అర్జెంటు అని చెప్పినా, తప్పులు ఉండటం, అది సరి చేసే లోపు సమయం అయిపోవటంతో, ఇక ఈ పిటీషన్ మళ్ళీ సోమవారమే విచారణకు వచ్చే అవకాసం ఉంది. అయితే దీని పై ప్రభుత్వం హౌస్ మోషన్ పిటీషన్ వేస్తుందా లేదా అనేది చూడాలి. ఎందుకుంటే రేపటి నుంచి ఎన్నికల నోటిఫికేషన్ వస్తుంది. రేపటి నుంచి నామినేషన్లు స్వీకరిస్తారు. ఒక్కసారి ఈ ప్రక్రియ మొదలైతే, ఇక సుప్రీం కోర్టు జోక్యం చేసుకునే అవకాసం ఉండక పోవచ్చని అంటున్నారు. సోమవారం ఈ పిటీషన్ విచారణకు వచ్చినా, ఇక ఎన్నికల ప్రక్రియ ఆపటం మాత్రం కుదరదు అని, న్యాయ కోవిదులు అంటున్నారు. మరో పక్క రాష్ట్ర ఎన్నికల కమిషన్ కూడా ఈ కేసులో ఒక కేవియట్ పిటీషన్ దాఖలు చేసింది. రాష్ట్ర ప్రభుత్వ పిటీషన్ గురించి వాదనలు వినే సమయంలో, తమ వాదన కూడా విని, నిర్ణయం ప్రకటించాలని కేవియట్ వేసారు.

ఆంధ్రప్రదేశ్ లో పంచాయతీ ఎన్నికల పోరు, రోజు రోజుకీ ట్విస్ట్ ల దగ్గర నుంచి, ఇప్పుడు గంట గంటకీ ఒక ట్విస్ట్ వచ్చేలా పరిణామాలు మారుతున్నాయి. ఈ రోజు రాష్ట్ర ప్రభుత్వం, హైకోర్టు తీర్పు పై చాలెంజ్ చేస్తూ, సుప్రీం కోర్టులో వేసిన కేసు విచారణకు వస్తుందని అందరూ భావించారు. ఈ కేసు పై సుప్రీం కోర్టు ఏమి చెప్తుందా అని అందరూ భావించిన తరుణంలో, సుప్రీం కోర్టులో ప్రభుత్వం వేసిన పిటీషన్ తప్పుల తడకగా ఉంది అంటూ, వెనక్కు పంపించారు. అయితే తప్పులు సరి చేసి వేసే లోపు, సుప్రీం కోర్టు బెంచ్ టైం అయిపొయింది. దీంతో రేపు నోటిఫికేషన్ వస్తున్న సందర్భంలో, హౌస్ మోషన్ పిటీషన్ వేయటంతో పాటుగా, రేపు నోటిఫికేషన్ ఎలా ఆపాలి అనే దాని పై కూడా ప్రభుత్వం కసరత్తు చేస్తుంది. ఇక మరో పక్క ఈ రోజు ఎలక్షన్ కమీషనర్ నిమ్మగడ్డ రమేష్ కుమార్, గవర్నర్ ని కూడా కలిసారు. ఈ నేపధ్యంలో, ఈ రోజు జగన్ మోహన్ రెడ్డి, సీనియర్ ఐఏఎస్ ఆఫీసర్ లను తన వద్దకు పిలిపించుకున్నారు. పంచాయతీ రాజ్ శాఖ అధికారులు గోపాల కృష్ణ ద్వివేదీ, గిరిజా శంకర్‌ను జగన్ తన వద్దకు పిలిపించుకున్నారు. ముఖ్యంగా ఈ రోజు ఉదయం వీరు నిమ్మగడ్డతో భేటీ కావాల్సి ఉండగా, సుప్రీం కోర్టులో ప్రభుత్వం వేసిన పిటీషన్ పై ముఖ్యమంత్రితో చర్చించాలని, అందుకే సమావేశానికి సాయంత్రం హాజరు అవుతామని ఎన్నికల కమీషనర్ కు చెప్పారు.

అయితే ఇదే సమయంలో రేపు ఉదయం పది గంటలకు, వచ్చే నెల 4న జరుగనున్న మొదటి దశ పంచాయతీ ఎన్నికలకు సంబంధించిన నోటిఫికేషన్, రేపు ఉదయం విడుదల కానుంది. ఈ నేపధ్యంలో, మొదటి దశ ఎన్నికల పై ఎన్నికల కమీషనర్ వేగంగా పావులు కదుపుతూ ఉండటంతో, సాయంత్రం ఎన్నికల కమీషనర్ తో జరిగే భేటీలో ఏమి వివరించాలి అనే విషయం పై, జగన్, ఇరువురు సీనియర్ అధికారులకు దిశానిర్దేశం చేయనున్నారు. అయితే, ఎన్నికల కమిషన్ తో రాజీ పడి ఎన్నికలకు వెళ్తారా, లేక ఎన్నికలకు సహకరించం అంటూ, పాత పాటే పాడి, ఎన్నికలు తప్పించుకోవటానికి ఏమైనా కొత్త ఎత్తు ప్రభుత్వం వేస్తుందా అనేది చూడాలి. అయితే, ఉదయం 10 గంటలకు అపాయింట్మెంట్ ఇవ్వగా, అడిగారు కాబట్టి, మూడు గంటలకు అపాయింట్మెంట్ ఇవ్వగా, ఇప్పుడు నాలుగు గంటలు దాటినా వారు రాకపోవటంతో, సాయంత్రం 5 గంటలకు మీటింగ్‍కి హాజరుకావాలని, లేకపోతే ఇదే చివరి అవకాశం అంటూ మేమో జారీ చేసారు. దీంతో సీనియర్ ఐఏఎస్ ఆఫీసర్ గోపాల కృష్ణ ద్వివేదీ, గిరిజా శంకర్‌లకు, మేమో జారీ చేయటం సంచలనంగా మారింది. ప్రభుత్వ ఒత్తిడితోనే వాళ్ళు ఇప్పటికీ రాలేదా అనే విషయం ఇప్పుడు చర్చకు దారి తీసింది...