news

అధికార వైసీపీలో వర్గ విబేధాలు గుప్పు మంటున్నాయి. అధికారంలోకి వచ్చిన ఏడాది కాలంలోనే అనేక లుకలుకలు బయట పడగా, అవి రోజు రోజుకీ ఎక్కువ అవుతున్నాయి. నిన్న విశాఖలో ఏకంగా విజయసాయి రెడ్డి పైనే, బహిరంగ వేదిక పై, ఎమ్మల్యేలు ఆయన వ్యాఖ్యలు ఖండించారు. ఇక అమరావతిలో ఉండవల్లి శ్రీదేవి ఉదంతం తెలిసిందే. సొంత పార్టీ నేతలే ఆమె పేకాట వ్యవహారం అంటూ బయట పెట్టారు. ఇందులో నిజా నిజాలు తెలియాల్సి ఉంది. మరో పక్క అంబటి రాంబాబు అక్రమ మైనింగ్ చేస్తున్నారు అంటూ సొంత పార్టీ నేతలే రచ్చ చేసి కోర్టు మెట్లు కూడా ఎక్కారు. ఇక నెల్లూరులో సీనియర్ నేత ఆనం, అలాగే మరో ఎమ్మల్యే వరప్రసాద్ బహిరంగంగానే విమర్శించారు. ఇక గన్నవరంలో రచ్చ అందరూ చూసారు. మరో పక్క ఎంపీ రఘురామరాజు, రోజు రచ్చబండే పెట్టేస్తున్నారు. ఇలా ప్రతి జిల్లాలో, ఏదో ఒక చోట, ప్రతి రోజు అసంతృప్తి బయట పడుతూనే ఉంది. తాజాగా ఇప్పుడు తూర్పుగోదావరి జిల్లా, పి గన్నవరం నియోజకవర్గానికి చెందిన, ఎమ్మెల్యే కొండేటి చిట్టిబాబు సొంత పార్టీ మంత్రులు పై సంచలన వ్యాఖ్యలు చేసారు. ఏకంగా రాష్ట్ర మంత్రులను విమర్శిస్తూ, కొంత మందిని దుష్ట శక్తులతో పోల్చి, సంచలన వ్యాఖ్యలు చేసారు. శంకరాయగూడెం గ్రామంలో నిన్న ఒక కార్యక్రమంలో పాల్గున్న ఎమ్మెల్యే సొంత పార్టీ నేతల పైనే విమర్శలు గుప్పించారు.

గ్రామంలో జరుగుతున్న అభివృద్ధి కార్యక్రమాలను చేయలేకపోతున్నాం అని, మంత్రులు సహకరించటం లేదని, నేను మొదటి సారి ఎమ్మెల్యే అని పట్టించుకోవటం లేదని చెప్తూ మంత్రుల్ని దుష్ట శక్తులతో పోల్చినట్లుగా ఆయన వ్యాఖ్యలను బట్టి అర్ధం అవుతుంది. ఈ గ్రామంలో సచివాలయ నిర్మాణం చేయలేక పోతున్నామని, అయితే తాను ప్రయత్నం చేస్తూనే ఉంటానని అన్నారు. తన దగ్గర ఒక విధంగా, మరొకరి దగ్గర మరో విధంగా చెప్పి, గ్యాప్ తెస్తున్నారని విమర్శించారు. బహిరంగ వేదిక పై ఎమ్మెల్యే ఏమన్నారు అంటే. "ఇవన్నీ మీకు చెప్పేవి కాదు. దుష్టశక్తులు కొన్ని వచ్చాయి. నేను ఫస్ట్ టైం ఎమ్మెల్యే అవ్వటం వలన మంత్రులు అందరూ కూడా, నాకు పూర్తిగా సహకరించటం లేదు. మీ దగ్గర మీకు చెప్పే లాగా, మా దగ్గర మాకు చెప్పే లాగా, ఈ రోజు సంకరాయగూడెంకు అన్యాయం జరిగింది అంటే కేవలం మంత్రులు వల్లే. చూద్దాం, ఇప్పటికైనా జరుగుతుంది ఏమో. నా ప్రయత్నాలు నేను చేస్తాను. " అంటూ ఎమ్మెల్యే ఆవేదన వ్యక్తం చేసారు.

దేశ వ్యాప్తంగా దీపావళి పండుగ సంబరాలకు రెడీ అవుతున్నారు. దీపావళి అంటేనే పిల్లల పండుగ. టపాసులు కాలుస్తూ, పండుగ చేసుకుంటారు. దీపాల పండుగగా చేసుకోవాలని, కొంత మంది ప్రతి ఏడు ఉద్యమాలు చేస్తున్నా, దీపావళి అంటేనే టపాసులు అని, వివిధ సందర్భాల్లో, న్యూ ఇయర్ వేడుకల్లో, రాజకీయ పార్టీల మీటింగుల్లో టపాసులు కాలిస్తే లేనిది, ఇప్పుడే వచ్చిందా అంటూ, హిందూ సంస్థలు కౌంటర్ ఇస్తూ వచ్చేవి. అయితే ఈ సారి మాత్రం క-రో-నా వైరస్ ఉండటంతో, కొన్ని రాష్ట్రాల ప్రభుత్వాలు, దీపావళి సంబరాల పై ఆంక్షలు విధిస్తున్నాయి. ఇప్పటికే పలు రాష్ట్రాలు దీని పై నిర్ణయం తీసుకున్నాయి. అయితే ఆంధ్రప్రదేశ్ ప్రభుత్వం కూడా దీపావళి సంబరాల పై పలు కీలక సూచనలు చేస్తూ ఉత్తర్వులు ఇచ్చింది. మూడు రోజుల క్రితం నేషనల్ గ్రీన్ ట్రిబ్యునల్ ఇచ్చిన ఆదేశాలు ప్రకారం, ఆంధ్రప్రదేశ్ ప్రభుత్వం తమ నిర్ణయాన్ని ప్రకటించింది. దీపావళి పండుగ రోజున, రెండు గంటల పాటు దీపావళి సంబరాలు చేసుకోవచ్చని ఆదేశాలు ఇచ్చింది. దీపావళి రోజున రాత్రి 8 నుంచి 10 గంటల వరకు మాత్రమే, ఈ రెండు గంటలు మాత్రమే టపాసులు కాల్చుకోవాలని ఆదేశాలు ఇచ్చింది. అలాగే టపాసులు అమ్మకాల పై కూడా ఆంక్షలు వధించింది. కేవలం గ్రీన్ క్రాకెర్స్ మాత్రమే అమ్మాలని ఆదేశాలు జారీ చేసింది. ఇక టపాసులు అమ్మే షాపుల్లో, శానిటైజర్ ను వాడవద్దు అని కూడా సూచనలు ఇచ్చింది.

జగన్ మోహన్ రెడ్డి అధికారంలోకి వచ్చిన తరువాత, విజయసాయి రెడ్డి ఫోకస్ అంతా విశాఖపట్నం మీదే ఉంది. విశాఖని రాజధానిగా చెయ్యాలని నిర్ణయం తీసుకోవటం, కీలకమైన విశాఖ విజయసాయికి అప్పచెప్పటం, విశాఖలో జరిగే ప్రతి విషయం విజయసాయికి చెప్పే చేయాలనే ఆదేశాలు, ప్రతి ప్రజాప్రతినిధి కూడా విజయసాయికి చెప్పి పనులు చేయటం, ఇక్కడ జరుగుతుందా అంతా అందరికీ తెలిసిందే. విజయసాయి రెడ్డి అంత పవర్ఫుల్ గా అయ్యారు. విజయసాయి రెడ్డికి ఎదురు చెప్పే సాహసం ఎవరూ చేయలేరు. ఎంత ఇబ్బంది ఉన్నా, మౌనంగా భరించాల్సిందే కానీ, ఆయనకు ఎదురు చెప్పటం కానీ, విజయసాయి రెడ్డి పై పైన ఎవరికైనా ఫిర్యాదు చేయటానికి లేదు. అలాంటి పవర్ఫుల్ విజయసాయి రెడ్డి పై, వైసిపీలో మొదటి సారిగా బాహిరంగంగా విమర్శలు వచ్చాయి. ఆయన ముందే ధిక్కార స్వరం వినిపించారు. నిన్న విశాఖలో డీడీఆర్‌సీ సమావేశం జరిగింది. ఈ సందర్భంగా, విజయసాయి రెడ్డి వ్యాఖ్యలకు కౌంటర్ గా చోడవరం ఎమ్మెల్యే కరణం ధర్మశ్రీ చేసిన వ్యాఖ్యలు చర్చనీయంసం అయ్యాయి. మేమేమీ అవినీతిపరులం కాదు, నిజాయతీ పరులమే అంటూ అందరి ముందు విజయసాయి రెడ్డికి కౌంటర్ ఇచ్చారు. విశాఖలో ఒక మాజీ సైనికుడికి చెందిన భుముని ఎమ్మెల్యే ధర్మశ్రీతో పాటుగా కొంత మంది కొనుగోలు చేసారు. అయితే, దీనికి సంబంధించి కలెక్టర్ నో అబ్జెక్షన్ సర్టిఫికేట్ ఇవ్వాలి. అయితే ఈ వ్యవహారం అనేక మలుపులు తిరిగి, చివరకు నో అబ్జెక్షన్ సర్టిఫికేట్ రాలేదు. దీని పై చర్చ జరుగుతూ ఉండగానే, నిన్న సమావేశంలో విజయసాయి రెడ్డి , ఇన్ డైరెక్ట్ గా ఈ విషయం పై స్పందిస్తూ, విశాఖలో జరుగుతున్న ఆక్రమణల వెనుక రాజకీయ నాయకులు ఉన్నారు అంటూ తన ప్రసంగం మొత్తం రాజకీయ నాయకులు అంటూ, అనేక సార్లు కార్నర్ చేసే ప్రయత్నం చేసారు.

అయితే ఈ సమావేశంలో అక్కడే ఉన్న ఎమ్మెల్యే ధర్మశ్రీ ఘాటుగా విజయసాయి రెడ్డికి కౌంటర్ ఇచ్చారు. మాటిమాటికి రాజకీయ నాయకులు అంటున్నారు, మేము నిజాయితీ పరులమే, ప్రజల కోసం సేవ చేస్తున్నాం అంటూ వ్యాఖ్యలు చేసారు. అంతా రూల్స్ ప్రకారమే మేము ఆ భూములు కొనుగోలు చేసి, నో అబ్జెక్షన్ సర్టిఫికేట్ అడిగామని, అది రూల్స్ కు విరుద్ధం అయితే, దాన్ని ఇవ్వకండి, అంతే తప్ప మేమేదో చేసామని నిందించటం సరికాదు అని అన్నారు. భూములు దోచేసే దొంగలు ఉంటే వారి పై చర్యలు తీసుకోండి కానీ, అందరినీ దొంగలు అనటం సరి కదాని అన్నారు. మేము ఏ పని చెప్పినా అధికారులు సహకరించటం లేదని, ఏమి జరుగుతుందో అని వ్యాఖ్యానించారు. ఇక మరో ఎమ్మెల్యే గుడివాడ అమర్‌ నాడు-నేడులో అవినీతి తారా స్థాయిలో ఉందని చెప్పటం, మరో విశేషం. ఇక విశాఖ ఎంపీ ఎంవీవీ సత్యనారాయణ, ఈ మీటింగ్ కి రాకపోవటం కూడా చర్చనీయంసం అయ్యింది. సింహాచలం దేవస్థానం భూముల కమిటీలో ఎంపీ పేరు లేకపోవటం వెనుక విజయసాయి రెడ్డి ఉన్నారనే ప్రచారంలో, ఇప్పుడు ఎంపీ ఈ సమావేశానికి హాజరు కాలేదు. మొత్తానికి విశాఖ వైసీపీలో , విజయసాయి రెడ్డి పై ఉన్న కోపం, ఇలా బయట పడింది ఏమో.