news

పుంగనూరు తెలుగుదేశం అభ్యర్థిగా నూతనకాల్వ అనీషారెడ్డి పేరును తొలిజాబితాలోనే పార్టీ అధ్యక్షుడు చంద్రబాబు ఖరారు చేశారు. గురువారం విజయవాడలో జరిగిన టీడీపీ ముఖ్యనేతల సమావేశం అనంతరం ఆమె పేరును ఖరారు చేశారు. పుంగనూరు టీడీపీ అభ్యర్థిగా గత రెండు పర్యాయాలు పోటీ చేసిన ఎం.వెంకటరమణరాజు ఓటమి చెందడంతో 2019 ఎన్నికలకు కొత్త అభ్యర్థిని బరిలోకి దించాలని పార్టీ అధిష్ఠాన వర్గం కసరత్తు చేసింది. ఈ నేపథ్యంలో మాజీ ఎంపీ రామకృష్ణారెడ్డి ద్వితీయ కుమారుడు పుంగనూరు టీడీపీ సమన్వయకర్త ఎన్‌.శ్రీనాథరెడ్డి సతీమణి ఎన్‌.అనీషారెడ్డిని ఎన్నికల్లో నిలపాలని భావించింది.

గత ఏడాది సెప్టెంబరు నుంచి అనీషారెడ్డి, శ్రీనాథరెడ్డి నియోజకవర్గంలో విస్తృతంగా పర్యటిస్తూ ప్రజలను కలుస్తున్నారు. కడప జిల్లా రాయచోటి మండలం బాలిరెడ్డిగారిపల్లెకు చెందిన మాజీ సింగిల్‌విండో అధ్యక్షుడు రఘురామరెడ్డి కుమార్తె అయిన అనీషారెడ్డికి తొలినుంచీ రాజకీయాలపై ఆసక్తి కనబరిచేవారు. గత మూడు పర్యాయాలుగా పార్టీ టికెట్‌ కోసం రేసులో ఉన్నారు. రాష్ట్ర పరిశ్రమలశాఖ మంత్రి అమరనాథరెడ్డి మరదలు అనీషారెడ్డి గెలుపుకోసం పలుమార్లు పుంగనూరు నియోజకవర్గంలో పర్యటిస్తూ మద్దతు కూడగడుతున్నారు. ఇటీవల జరిగిన జన్మభూమి గ్రామసభల్లో వైసీపీ నాయకులు ప్రోటోకాల్‌ పేరుతో వేదికమీదకు అనీషారెడ్డిని రాకుండా అడ్డుకున్నా ప్రజలే మాకు ప్రోటోకాల్‌ అంటూ వేదికల వద్ద నేలపై కూర్చుని ప్రసంగించడం ద్వారా అందరినీ ఆకట్టుకోగలిగారు. దీంతో ప్రజల్లోనే కాక, అధిష్టానం వద్ద కూడా మన్ననలు పొందారు.

పార్టీ క్యాడర్‌కు అవసరమైన సమయాల్లో అండగా ఉంటున్నారు. ఇటీవల సదుం, సోమల మండలాల్లో జరిగిన గొడవల్లో టీడీపీ శ్రేణులకు తామున్నామంటూ ధైర్యం చెప్పి బాధితులను ఓదార్చారు. పుంగనూరు ప్రాంతానికి హంద్రీనీవా కాల్వ ద్వారా కృష్ణాజలాలు రావడం, నిరుద్యోగ భృతి, పింఛన్ల పెంపు, పసుపు, కుంకుమ కార్యక్రమాలను ప్రజల్లోకి తీసుకెళ్లడం ద్వారా తెలుగుదేశం పార్టీ పటిష్ఠతకు కృషి చేస్తున్నారు. పార్టీ అభ్యర్థిగా ప్రకటించిన సందర్భంగా అనీషారెడ్డి మాట్లాడుతూ ముఖ్యమంత్రి చంద్రబాబు అమలు చేస్తున్న సంక్షేమ పథకాలు, చేస్తున్న అభివృద్ధిని చూసి టీడీపీని గెలిపించాలని ప్రజలు ఎప్పుడో నిశ్చయించుకున్నారని చెప్పారు. పుంగనూరు ప్రజలు, టీడీపీ కుటుంబ సభ్యులు, నూతనకాల్వ కుటుంబ అభిమానులు సహకారంతో తాను విజయం సాధిస్తానన్నారు.

అఖిలభారత కాంగ్రెస్ పార్టీ అధ్యక్షుడు రాహుల్‌గాంధీ శుక్రవారం తిరుపతికి వచ్చారు. ఢిల్లీ నుండి ప్రత్యేక విమానంలో శుక్రవారం మధ్యాహ్నం రేణిగుంట విమానాశ్రయం చేరుకున్నారు. నడకమార్గం ద్వారా ఆయన తిరుమలకు చేరుకున్న అనంతరం శ్రీవారిని దర్శించుకోనున్నారు. ఆ తర్వాత సాయంత్రం తిరుపతిలో కాంగ్రెస్ పార్టీ ఆధ్వర్యంలో జరిగే బహిరంగ సభలో పాల్గొని ప్రసంగించనున్నారు. మధ్యాహ్నం భోజనం విరామం తర్వాత 3.35గంటలకు తిరుమల నుండి బయలుదేరి తిరుపతిలోని జ్యోతిరావు పూలే సర్కిల్‌కు చేరుకుంటారు. అక్కడ నుండి పాదయాత్రగా బహిరంగసభ ఏర్పాటు చేసిన తారకరామస్టేడియంకు 5గంటలకు చేరుకుంటారు.

బహిరంగసభలో పాల్గొని 6గంటలకు తారకరామస్టేడియం నుండి రోడ్డు మార్గాన రేణిగుంట విమానాశ్రయం చేరుకుని ప్రత్యేక విమానంలో ఢిల్లీకి వెళతారు. వాస్తవానికి రాహుల్‌గాంధీ తిరుపతి నుండి కాలినడకన తిరుమలకు చేరుకుంటారని కాంగ్రెస్ నాయకులు చెప్పారు. అయితే ఆయనకు కాలిబాటలో భద్రత కల్పించలేమని పోలీసులు చెప్పడంతో అలిపిరి మార్గాన కాలినడకన వెళ్లే కార్యక్రమాన్ని రద్దు చేసుకుంటారని అందరూ అనుకున్నారు. కాని రాహుల్ గాంధీ మాత్రం, దేవుడు దగ్గర కూడా ఇలాంటి భయాలు ఎందుకు, నేను నడక మార్గం ద్వారా వెళ్తాను అని చెప్పి, నడక మార్గం ద్వారా కొండ పైకి ఎక్కుతున్నారు. అయితే ఈ పరిణామంతో పోలీస్ యంత్రాంగం అలెర్ట్ అయ్యింది..

వెంటనే బద్రత కట్టుదిట్టం చేసారు. రాహుల్ గాంధీ ఇలా షాక్ ఇస్తారనుకోలేదని, వెంటనే బద్రత పెంచాలని, పోలీసులకు ఎస్పీ ఆదేశాలు ఇచ్చారు. ఏపీ పీసీసీ ఆధ్వర్యంలో ‘ప్రత్యేక హోదా భరోసా యాత్ర’ చేపట్టింది. ఈ యాత్రలో రాహుల్ పాల్గొననున్నారు. ఆంధ్ర ప్రదేశ్‌ కాంగ్రెస్‌ కమిటీ ఈ నెల 19 నుంచి 13 జిల్లాల్లో ప్రత్యేకహోదా భరోసా యాత్ర నిర్వహించనున్నారు. ఈ యాత్రలో భాగంగా ఈ రోజు రాహుల్‌గాంధీ వస్తున్న సందర్భంగా తిరుపతిలో భారీ బహిరంగ సభ నిర్వహించనున్నారు. ఆంధ్రప్రదేశ్‌కు ప్రత్యేకహోదా అమలు చేస్తానని ప్రధాని మోడీ మాట ఇచ్చి తప్పిన ప్రాంతమైన తిరుపతిలోనే రాహుల్‌ ప్రత్యేకహోదా భరోసా యాత్ర లో పాల్గొననుండడం విశేషం.

నిన్న రాజమండ్రిలో అమిత్ షా మాట్లాడిన మాటలకు, అమిత్ షా కి కొత్త పేరు పెట్టారు చంద్రబాబు. అమిత్‌ షా కాదు.. అతనో అబద్ధాల షా అని బీజేపీ జాతీయ అధ్యక్షుడు అమిత్ షానుద్దేశించి ముఖ్యమంత్రి నారా చంద్రబాబునాయుడు అన్నారు. శుక్రవారం ఉదయం పలువురు టీడీపీ నేతలతో చంద్రబాబు టెలికాన్ఫరెన్స్‌ నిర్వహించారు. ఈ సందర్భంగా మాట్లాడుతూ... అమిత్‌ షా రెచ్చగొట్టే ప్రయత్నం చేస్తున్నారని, ఏపీకి 90శాతం చేసేసినట్టుగా పచ్చి అబద్ధాలు చెబుతున్నారన్నారు. అలాగే తప్పు చేశామన్న పశ్చాత్తాపం బీజేపీ నేతల్లో లేదని, ‘ఇంకా రెచ్చగొడుతున్నారు.. బాధపెడుతున్నారు’ అని చంద్రబాబు అన్నారు. అమిత్‌ షా వ్యాఖ్యలపై రాష్ట్రంలో చర్చ జరగాలన్నారు.

రావాల్సిన లక్ష కోట్ల రూపాయలు వచ్చి ఉంటే ఎంతో ముందుకు పోయేవాళ్లమని సీఎం అన్నారు. దేశంలో మనం కూడా భాగమైనప్పుడు మనమెందుకు బాధ పడాలని సూటిగా ప్రశ్నించారు. జాతీయ స్థాయిలో ఎవరు మనకి మద్దతు తెలుపుతారో వారే మనకి మిత్రులుగా ఉంటారని స్పష్టంచేశారు. 4 పార్లమెంట్ నియోజకవర్గాల సమీక్షలు పూర్తి చేశామని నేతలకు సీఎం తెలిపారు. క్షుణ్ణంగా అధ్యయనం చేసే సరైన నిర్ణయాలు తీసుకుంటున్నామని ఆయన నేతలకు వివరించారు. హవాలా సొమ్ములు తెచ్చేందుకే జగన్‌ విదేశీ పర్యటన చేస్తున్నారని ముఖ్యమంత్రి వ్యాఖ్యానించారు. జగన్‌ లండన్‌ పర్యటనపై సీఎం స్పందిస్తూ.. డబ్బుల కోసమే జగన్‌ లండనశ్రీ్‌ పర్యటన అని విమర్శించారు. ఎన్నికల ముందు ఎవరూ విదేశీ పర్యటనలకు వెళ్లరని, జగన్‌ ఎందుకు వెళుతున్నారు? అని ప్రశ్నించారు.

ఆంధ్రప్రదేశ్ రాష్ట్రంపై కేసీఆర్‌కు అసూయ, ద్వేషం అని చంద్రబాబునాయుడు అన్నారు. రాష్ట్రంపై మోదీ, అమిత్‌ షా కక్షగట్టారన్నారు. అలాగే కేసుల మాఫీ కోసం బీజేపీతో, డబ్బుల కోసం కేసీఆర్‌తో జగన్‌ లాలూచీ పడ్డారన్నారు. కుట్రలు, కుతంత్రాల జోడీ బీజేపీ, వైసీపీ అని చంద్రబాబు అన్నారు. అలాగే ఉగ్రదాడులపై గతంలో సీఎంగా మోదీ వ్యాఖ్యలనే ప్రస్తావించామని, మన్మోహన్‌పై మోదీ ఏం మాట్లాడారో అదే గుర్తు చేశామని చంద్రబాబు అన్నారు. దీనిపై బీజేపీ నేతల రాద్ధాంతం అనవసరమని, టీడీపీ చేసింది మోసం కాదు.. బీజేపీ చేసింది నమ్మకద్రోహమని సీఎం అన్నారు. ఎవరు దేశానికి ద్రోహం చేశారో ప్రజలే తేలుస్తారని చంద్రబాబు అన్నారు.