news

పుల్వామా దాడిలో అమరులైన అమర జవాన్ల కుటుంబాలను ఆదుకోవడానికి రాష్ట్రంలోని అన్ని వర్గాలూ కదులుతున్నాయి. ఈ క్రమంలో రాష్ట్ర ప్రభుత్వ ఉద్యోగులు తమ ఔదార్యం చాటుకొన్నారు. రూ.30 కోట్ల ఆర్థికసహాయాన్ని అందించాలని ఎన్జీవోలు నిర్ణయించారు. ఎన్జీవో కేడర్‌ నుంచి గెజిటెడ్‌ అధికారులు, ఉపాధ్యాయుల వరకు రూ. 500 చొప్పున, నాలుగో తరగతి ఉద్యోగులు, పెన్షనర్ల నుంచి రూ. 200 చొప్పున సేకరించనున్నారు. ఇలా పోగుచేసిన రూ. 30 కోట్లను బాధిత కుటుంబాలకు సాయంగా అందించనున్నారు. అమర జవాన్ల కుటుంబాలకు ఆంధ్రప్రదేశ్‌ ప్రైవేట్‌ స్కూళ్ల యాజమాన్యాల తరఫున రూ.25 లక్షల సాయం అందించామని ’అప్పా’ ప్రతినిధులు తెలిపారు.

వివేకానంద స్కూలు యాజమాన్యం రూ.లక్ష , తణుకు ప్రగతి జూనియర్‌ కళాశాల యాజమాన్యం రూ.1.05 లక్షల విలువైన చెక్‌లను సీఎంకు అందజేసింది. కృష్ణా జిల్లా ముదినేపల్లికి చెందిన కొందరు దాతలు రూ.1.16 లక్షలు విరాళంగా సీఎంకు అందజేశారు. ముదినేపల్లి మండల టీడీపీ అధ్యక్షుడు శోభనాద్రిచౌదరి, డాక్టర్‌ వైఎల్‌ ప్రసాద్‌, పీ కుమారి నాయకత్వంలో వారు చెక్కును సీఎంకు అందజేశారు. హైకోర్టు ప్రభుత్వ న్యాయవాది ఎస్‌ఎస్‌ వర్మ తన వంతుగా రూ. 64,100 విలువైన చెక్‌ను తాత్కాలిక చీఫ్‌ జస్టిస్‌ సీ ప్రవీణ్‌కుమార్‌కు అందించారు. సీఆర్పీఎఫ్‌ కమాండెంట్‌కు ఆ చెక్‌ను జస్టిస్‌ ప్రవీణ్‌కుమార్‌ చేర్చారు.

ఆపన్నులకు సీఎం సాయం.. అనారోగ్యంతో బాధపడుతూ, వైద్య ఖర్చుల కోసం తనను కలిసిన పలువురికి సీఎం మానవతా దృక్పథంతో సాయం ప్రకటించారు. మానసిక వికలాంగుడైన తన కుమారుడు ఓం ప్రకాశ్‌కు వైద్య సాయం చేయాలని తిరుపతికి చెందిన వీ బుజ్జి అనే మహిళ అభ్యర్థించగా, సీఎం రూ.లక్ష మంజూరు చేశారు. కుప్పం నియోజకవర్గం శాంతిపురం మండలం బంధపల్లికి చెందిన ఎం మునికృష్ణగౌడ్‌ రోడ్డు ప్రమాదంలో తీవ్రంగా గాయపడ్డారు. అతని వైద్యం నిమిత్తం సీఎం రూ.3.5లక్షలు మంజూరు చేశారు. అదే గ్రామానికి చెందిన బీ రామకృష్ణప్ప విద్యుత్‌ వైర్లు లాగుతుండగా, షాక్‌ తగిలి ఎడమ భుజం పోగొట్టుకున్నాడు. ఆయనకు సీఎం రూ. లక్ష మంజూరు చేశారు.

ముఖ్యమంత్రి చంద్రబాబునాయుడు సమక్షంలో తాను టీడీపీలో చేరుతున్నట్లు మాజీ కేంద్ర మంత్రి కిషోర్ చంద్రదేవ్ స్పష్టం చేశారు. సోమవారం ఆయన ఇక్కడ అశోక్‌బంగ్లాలో ఎంపీ అశోక్‌గజపతిరాజును కలిశారు. ఈ సందర్భంగా తనను కలిసిన విలేఖరులతో మాట్లాడుతూ ప్రస్తుత పరిస్థితుల్లో బీజేపీని ఓడించాల్సిన అవసరం ఉందని, అందుకోసం టీడీపీయే సరైనదని భావించి ఆ పార్టీలో చేరుతున్నట్లు తెలిపారు. గతంలో తాను టీడీపీ సహకారంతో గెలిచిన విషయాన్ని ఈ సందర్భంగా ఆయన గుర్తు చేసుకున్నారు. రాష్ట్ర విభజన తరువాత కాంగ్రెస్ పరిస్థితి దిగజారిందని, టీడీపీ బలంగా ఉందని అన్నారు. కాగా, ప్రధాని మోదీ, అమిత్‌షాలు లౌకికవాదాన్ని పక్కన పెట్టి సామ్యవాద సిద్ధాంతాలతో పరిపాలన చేస్తున్నారని విమర్శించారు.

అందువల్లనే బీజేపీకి వ్యతిరేకంగా దేశంలో ప్రాంతీయ పార్టీలు కీలక భూమిక పోషిస్తున్నాయన్నారు. ఏఐసీసీ అధ్యక్షుడు రాహుల్ గాంధీ రాష్ట్రానికి ప్రత్యేక హోదా, విభజన హామీలు ఇస్తామని చెబుతున్నారని, ఈ దఫా చంద్రబాబునాయుడు మళ్లీ అధికారంలోకి వస్తే ప్రత్యేక హోదా తెప్పిస్తారన్న నమ్మకం తనకు ఉందన్నారు. కాగా, ఒకే ఇంట్లో తండ్రి ఒక పార్టీలోను, కుమార్తె మరో పార్టీలో ఉండటాన్ని ఆయన వద్ద ప్రస్తావించగా తన కుమార్తె శృతి ఆలోచనలను నియంత్రించడం సరికాదని బదులిచ్చారు. కాగా, ఎంపీ అశోక్‌గజపతిరాజుతో తనకు ఎప్పటి నుంచో అనుబంధం ఉందని, ఆయనతో కలసి పనిచేసే అవకాశం లభించడం తనకు ఆనందంగా ఉందని అన్నారు.

వచ్చే సార్వత్రిక ఎన్నికల్లో కేంద్రంలో భాజపాను, రాష్ట్రంలో వారికి సహకరిస్తున్న పార్టీల్ని ఇంటికి పంపాల్సిన అవసరం ఉందన్నారు. ఈనెల 24వ తేదీన అమరావతిలో తెదేపాలో చేరుతున్నట్లుగా తెలిపారు. రాష్ట్రానికి ప్రత్యేకహోదా వస్తుందన్న ఆశాభావాన్ని ఆయన వ్యక్తం చేశారు. తన కుమార్తె శృతీదేవి కాంగ్రెస్‌లో కొనసాగడంపై ప్రశ్నించినప్పుడు ఆమె స్వయంగా నిర్ణయాలు తీసుకోగలిగిన వ్యక్తి అని అభిప్రాయపడ్డారు. తన కుమార్తె శ్రుతీదేవి ఆమెకు నచ్చిన పార్టీలో ఉన్నారని, రాజకీయంగా ఆమెతో ఎటువంటి సంబంధం లేదన్నారు. ఎంపీ టికెట్‌ ఆశించి టీడీపీలో చేరుతున్నారా అని అడుగగా.. టికెట్లు ఆశించి రావడం లేదని.. కేంద్రాన్ని ఢీకొట్టే పార్టీ టీడీపీ ఒక్కటేనని భావించి వచ్చానని బదులిచ్చారు. అశోక్‌గజపతిరాజు, తాను స్నేహపూరిత వాతావరణంలో పనిచేస్తామన్నారు.

అమలాపురం లోక్‌సభ స్థానం నుంచి తెదేపా అభ్యర్ధిగా దివంగత లోక్‌సభ స్పీకర్‌ జి.ఎం.సి. బాలయోగి కుమారుడు హరీశ్‌ పేరును అధిష్ఠానం పరిశీలిస్తున్నట్లు తెలిసింది. సెంటిమెంటు పరంగానూ ఇది అనుకూలిస్తుందనే అభిప్రాయం నేతల్లో వ్యక్తమవుతోంది. పోటీ విషయమై తల్లి అంగీకారం కోసం హరీశ్‌ ఎదురు చూస్తున్నారు. అమలాపురం ఎంపీ పండుల రవీంద్రబాబు నాకు టికెట్ ఇవ్వనని చెప్పారు, అందుకే వైసీపీలో చేరుతున్నా అని చెప్పిన సంగతి తెలిసిందే. అమలాపురం లోక్‌సభ టీడీపీ టిక్కెట్టు లోక్‌సభ దివంగత స్పీకర్‌ బాలయోగి కుమారుడు హరీష్‌కి ఖరారు చేయడంతో పండుల టీడీపీకి గుడ్‌బై చెప్పారు. పండుల రవీంద్రకి వైసీపీలో గన్నవరం అసెంబ్లీ సీటు హామీ ఇచ్చినట్టు ప్రచారం జరుగుతోంది.

టీడీపీ నుంచి మంత్రి హామీ కావాలని పట్టుబడుతున్న మరో ఎమ్మెల్యే కూడా వైసీపీతో టచ్‌లో ఉన్నట్టు విస్తృత ప్రచారం జరుగుతోంది. సదరు ఎమ్మెల్యే వైసీపీలో చేరితే అక్కడ ప్రత్యర్థి పార్టీ నేత వెంటనే టీడీపీలో చేరడానికి సిద్ధంగా ఉన్నారని సమాచారం. ఎన్నికలకు సమయం దగ్గర పడుతుండడంతో టీడీపీలో సిట్టింగ్‌ ఎమ్మెల్యేలు, ఇన్‌ఛార్జిలు, వైసీపీ కోఆర్డినేటర్లలో టెన్షన్‌ పెరుగుతోంది. ఎవరు వచ్చి పార్టీలో చేరతారు, ఎవరిని తప్పిస్తారన్న ఆందోళన ఇరుపార్టీల నేతల్లోనూ కనిపిస్తోంది. టీడీపీ జిల్లాలో ఇప్పటికే ఎనిమిది నియోజకవర్గాల్లో అభ్యర్థులను ఖరారు చేసింది. వైసీపీ 12 చోట్ల స్పష్టత ఇచ్చింది.

మరో పక్క కాకినాడ ఎంపీ సీటు కూడా ఫైనల్ అయినట్టు సమాచారం. దీని కోసం చలమలశెట్టి సునీల్‌ ని తెలుగుదేశం రంగంలోకి దించుతుంది. టీడీపీలో ఈనెల 28న చేరడానికి చలమలశెట్టి సునీల్‌ సన్నాహాలు చేసుకుంటున్నట్టు సమాచారం. ఈ మేరకు టీడీపీ అధ్యక్షుడు చంద్రబాబు సమక్షంలో అమరావతిలో చేరాలని సునీల్‌ నిర్ణయించుకున్నట్టు చెబుతున్నారు. మూడు నెలలుగా సునీల్‌ చేరిక ముహూర్తాలు వాయిదాపడుతూ వస్తున్నాయి. చివరకు ఈనెల 28వ తేదీ చేరడానికి నిర్ణయం తీసుకున్నట్టు తెలిసింది. కాకినాడ లోక్‌సభ టీడీపీ టిక్కెట్టు సునీల్‌కి ఇవ్వనున్నారు. తూర్పుగోదావరి జిల్లా రామచంద్రపురం తెదేపా ఎమ్మెల్యే తోట త్రిమూర్తులు సోమవారం రాత్రి ముఖ్యమంత్రి చంద్రబాబుతో భేటీ అయ్యేందుకు ఉండవల్లిలోని ఆయన నివాసానికి వచ్చారు. తాను పార్టీ మారుతున్నట్టుగా జరుగుతున్న ప్రచారాన్ని ఆయన ఖండించారు.