అన్ని వైపుల నుంచి వస్తున్న ఒత్తిడులు, అలాగే దేశం నలు వైపులు నుంచి వస్తున్న నిరసన నేపధ్యంలో, తిరుమల తిరుపతి దేవస్థానంకు చెందిన భూములు అమ్మకాన్ని నిలుపుదల చేస్తూ ఆంధ్రప్రదేశ్ ప్రభుత్వం నిర్ణయం తీసుకుంది. టిటిడి తీసుకున్న నిర్ణయాన్ని నిలుపుదల చేస్తూ, జీవో 888 జారీ అయ్యింది. భక్తుల మనోభావాలు దృష్టిలో పెట్టుకుని ఈ నిర్ణయం తీసుకున్నాం అని, అందరితో చర్చించి, అభిప్రాయం తీసుకునే దాకా, సంప్రదింపులు పూర్తయ్యే దాకా, భూములు వేలం నిలిపివేస్తూ, ప్రభుత్వం నిర్ణయం తీసుకుంది. మొత్తానికి, ఎవరి మాటా వినని ప్రభుత్వం, ఈ విషయంలో మాత్రం, వెనక్కు తగ్గింది. గత రెండు రోజులుగా తిరుమల పై వివాదం రేగింది. తిరుమలేశునికి భక్తులు కానుకలుగా, విరాళాల రూపంలో ఇచ్చిన ఆస్తులను తిరుమల తిరుపతి దేవ స్థానం అమ్మకానికి పెట్టడం వివాదాస్పదంగా మారింది.
లక్షలాది మంది భక్తులు ఆపదమొక్కులవాడుగా, అనాధరక్షకుడుగా భావిస్తూ శ్రీనివాసుడికి మొక్కుబడులరూపంలో తమ పేరు స్థిరస్థాయిగా నిలిచి పోతుందని భావించి రాసిచ్చిన స్థిరాస్తులు ఇప్పుడు కనుమరుగయ్యే పరిస్థితి ఏర్పడింది. ఈ విషయమై దాత భక్తుల నుంచి ఎలాంటి అడ్డంకులు రాకున్నా శ్రీవారి భక్తులు తీవ్రస్థాయిలో ఆగ్రహం వ్యక్తం చేస్తున్నారు. తిరుమలేశునికి దేశవ్యాప్తంగా అనేక చోట్ల భక్తులు కానుకలుగా ఇచ్చిన ఆస్తులు వేలకోట్లా రూపాయలు విలువచేసేవి వున్నాయి. ఈ ఆస్తులను పరిరక్షించడంలో తిరుమల తిరుపతి దేవస్థానం కొంత నిర్ల క్ష్యం చూపుతోందనే విమర్శలు భక్తుల్లో లేకపోలేదు. ఇలువేల్పు, ఇష దైవం శ్రీనివాసుడికి ఎంతో మంది భక్తులు తమకు చెందిన ఆస్తులను, భూములను స్వామివారికి అప్పగిస్తే తమ పేరు శాశ్వతంగా చరిత్రలో నిలిచిపోతుందని భావిస్తారు.
అంతటి భక్తి ప్రాధాన్యతతో దాతలు ఇచ్చిన ఆస్తులను తమిళనాడు రాష్ట్రంలో వున్నవాటిని నిరర్థక ఆస్తులుగా టిటిడి పరిగణించి ఏకంగా విక్రయాలకు నోటిఫికేషన్ ఇవ్వడం తిరుమల, తిరుపతిలోనేగాక రాష్ట్రవ్యాప్తంగా శ్రీవారి భక్తుల్లో పెద్ద దుమారం రేపుతోంది. లక్షలు, వేలకోట్ల రూపాయలు విలువచేసే స్వామివారి ఆస్తులను ప్రభుత్వం నియమించిన ధర్మకర్తల మండలి తమ అనుచరులకు, అనుయాయులకు కట్టబెట్టేందుకు బహిరంగ టెండర్లు పేరుతో అనుమతి ఇస్తున్నదంటూ అటు తెలుగుదేశం, బిజెపి, జనసేన పార్టీలు ఇటు శ్రీవారి భక్తులు ఆందోళన వ్యక్తం చేస్తున్నారు. వెంకన్న ఆస్తుల అమ్మకాలను - రద్దుచేయకుంటే పెద్దఎత్తున నిరసనలు చేపట్టేందుకు భక్తులు సిద్ధమవు తున్నారు. అయితే ఈ లోపే, ప్రభుత్వం, తన నిర్ణయాన్ని వెనక్కు తీసుకుంది.
