news

కరోనా వైరస్​తో ప్రభావితమైన 75 జిల్లాల బంద్​కు నిర్ణయం తీసుకుంది కేంద్ర ప్రభుత్వం. కేంద్ర శాఖల ముఖ్య కార్యదర్శులు, రాష్ట్రాల ప్రధాన కార్యదర్శుల స్థాయిలో జరిగిన అత్యున్నత స్థాయి సమావేశంలో ఈ నిర్ణయం తీసుకుంది. ఈ మేరకు హోంశాఖ ప్రకటన విడుదల చేసింది. మార్చి 31వరకు రాష్ట్రాల మధ్య బస్సుల బంద్​కు పిలుపునిచ్చింది. కరోనాతో ప్రభావితమైన 75 జిల్లాల్లో ఆంక్షలపై త్వరలో రాష్ట్రప్రభుత్వాలు ఆదేశాలు జారీ చేస్తాయని పేర్కొన్నారు అధికారులు. ఆ 75 జిల్లాల్లో అత్యవసర సేవలు మాత్రమే అందించాలని మార్గదర్శకాలు జారీ చేశారు. ఆంధ్రప్రదేశ్ నుంచి ప్రకాశం, విజయవాడ, విశాఖపట్నం, ఈ లిస్టు లో ఉన్నాయి. అలాగే తెలంగాణా నుంచి, కొత్తగూడెం, సంగారెడ్డి, హైదరాబాద్, మేడ్చల్, రంగారెడ్డి జిల్లాలు ఉన్నాయి.

జనతా కర్ఫ్యూకు ప్రజల నుంచి మంచి స్పందన వచ్చినట్లు ఆయా రాష్ట్రాల ప్రధాన కార్యదర్శులు ఈ సమావేశం వేదికగా కేంద్రానికి నివేదించారు. కరోనా విస్తరిస్తున్న నేపథ్యంలో ఏప్రిల్ 5వరకు సైనిక బలగాల తరలింపును రద్దు చేశారు అధికారులు. సెలవులు, ప్రయాణాలు రద్దు చేసుకోవాలని సూచించారు. ఏప్రిల్ 5 వరకు ఎక్కడివారక్కడే కొనసాగాలని స్పష్టంచేశారు. జవాన్లు అందరూ తమ కుటుంబసభ్యులు ఎవరూ విదేశాల్లో ప్రయాణించలేదన్న డిక్లరేషన్​ను సమర్పించాలని ఆదేశించారు అధికారులు. విదేశాల నుంచి వచ్చిన వారిని కలిసిన వారు వైద్య పరీక్షలు చేయించుకోవాలని సూచించారు. మరో పక్క, జనతా కర్ఫ్యూ, కరోనా వ్యాప్తి నివారణకు సంబంధించి తీసుకుంటున్న చర్యలపై వైఎస్‌ జగన్‌ సమీక్ష నిర్వహించారు.

సీఎస్‌, డీజీపీ, ప్రత్యేక ప్రధాన కార్యదర్శి జవహర్‌రెడ్డి, కరోనా వ్యాప్తి నివారణకు కేంద్రం నియమించిన పర్యవేక్షకుడు సురేష్ కుమార్‌, ఉన్నతాధికారులు ఈ సమీక్షకు హాజరయ్యారు. రాష్ట్రంలో తక్షణం చేపట్టాల్సిన చర్యలకు సంబంధించి చర్చించారు. రాష్ట్రంలో మరో రెండు పాజిటివ్‌ కేసులు నమోదు కావడంపై విస్త్రత స్థాయిలో చర్చ జరిగింది.విదేశాల నుంచి రాష్ట్రానికి తిరిగి వచ్చే ఎన్‌ఆర్‌ఐలకు సంబంధించి ప్రత్యేకంగా కేంద్రం నిర్దేశించిన ప్రొటోకాల్‌ ప్రకారం వ్యవహరించాల్సి ఉందని ఆయన అధికారులకు స్పష్టం చేశారు. అలాగే కరోనా అనుమానిత కేసులకు సంబంధించి ఐసోలేషన్‌ వార్డులు, చికిత్సలకు సంబంధించి ఉపకరణాలు, ఔషధాలకు సంబంధించి ముందస్తు చర్యలు తీసుకోవాల్సిందిగా సీఎం సూచించారు. అలాగే రాష్ట్రంలో జనతా కర్ఫ్యూ తరహాలోనే మరో రెండు రోజులు ఇదే తరహాలో కర్ఫ్యూ కొనసాగించాలనే అంశంపై కూడా చర్చించినట్లు సమాచారం.

విజయవాడలో ఓ యువకునికి కరోనా పాజిటివ్​గా ఉన్నట్లు కలెక్టర్​ ఇంతియాజ్​ అహ్మద్​ తెలిపారు. అతన్ని ప్రత్యేక వార్డులో ఉంచి చికిత్స అందిస్తున్నట్లు చెప్పారు. యువకుని ఇంటి చుట్టుపక్కల సర్వే చేసినట్లు పేర్కొన్నారు. స్థానికులకు వైరస్​ సోకకుండా అప్రమత్తంగా ఉన్నట్లు స్పష్టం చేశారు. విజయవాడలో విదేశాల నుంచి వచ్చిన ఒక యువకుడికి కరోనా పాజిటివ్​ ఉన్నట్లు తేలింది. ఈ మేరకు కలెక్టర్ ఇంతియాజ్​ అహ్మద్​ ప్రకటన చేశారు. ఈనెల 17, 18న హోమ్​ ఐసోలేషన్​లో ఉన్న యువకుడు.. జ్వరం రావడం వల్ల ప్రభుత్వాసుపత్రికి తరలించినట్లు కలెక్టర్​ తెలిపారు. నమూనాలను పరీక్షలకు పంపగా.. కరోనా ఉన్నట్లు తేలిందని చెప్పారు. యువకుని ఇంటి చుట్టుపక్కల 500 ఇళ్లల్లో సర్వే చేసినట్లు పేర్కొన్నారు. స్థానికులకు వైరస్​ సోకకుండా జాగ్రత్తలు తీసుకుంటున్నామని అన్నారు. ఈ 3 రోజుల్లో యువకుడు, అతని కుటుంబ సభ్యులు ఎవరెవరితో మాట్లాడారో ఆరా తీస్తున్నామని కలెక్టర్​ తెలిపారు. యువకుడు హైదరాబాద్​ నుంచి వచ్చిన క్యాబ్​ గురించి కూడా ఆరా తీస్తున్నామని అన్నారు.

కరోనాపై ఎవరైనా ఫిర్యాదు చేయాలనుకుంటే కంట్రోల్​ రూం నెంబర్​ 79952 44260కు సమాచారం ఇవ్వాలని సూచించారు. విజయవాడలో యువకునికి కరోనా పాజిటివ్​గా తేలిన నేపథ్యంలో ఏప్రిల్​ 14 వరకు 144 సెక్షన్​ అమలు చేయనున్నట్లు సీపీ ద్వారకా తిరుమలరావు తెలిపారు. రేపటి నుంచి కూడా ప్రజలు స్వచ్ఛందంగా కర్ఫ్యూ పాటించాలని సూచించారు. జనతా కర్ఫ్యూను మూడు రోజులు అమలు చేస్తే మంచిదని అభిప్రాయపడ్డారు. పారిస్​ నుంచి వచ్చిన యువకునికి కరోనా వచ్చిందన్న ఆయన.. కుటుంబ సభ్యులు దూరంగా ఉన్నామని చెబుతున్నా వారికి పరీక్షలు అవసరమని అన్నారు. మనకు మనం స్వచ్ఛందంగా జాగ్రత్తలు పాటించాలని సీపీ తెలిపారు.

కరోనా వ్యాప్తి నేపథ్యంలో నివారణకు అందరూ సహకరించాలని డీజీపీ గౌతమ్​ సవాంగ్​ విజ్ఞప్తి చేశారు. విదేశాల నుంచి వచ్చేవారు నిబంధనలు పాటించాలని.. లేకుంటే కఠిన చర్యలు తీసుకుంటామని హెచ్చరించారు. విదేశాల నుంచి వచ్చినవారికే ఎక్కువగా వైరస్​ లక్షణాలు ఉన్నాయన్న ఆయన.. వారి పట్ల జాగ్రత్తలు తీసుకోవాలని సూచించారు. ఇతర దేశాల నుంచి వచ్చేవారు నిబంధనలు కచ్చితంగా పాటించాలని చెప్పారు. ప్రజల ఆరోగ్యానికి ముప్పు వాటిల్లేలా వ్యవహరించేవారిపై కఠిన చర్యలు తీసుకుంటామని హెచ్చరించారు.

రాష్ట్రంలో ఇప్పటివరకూ ఐదుగురికి కరోనా పాజిటివ్​గా వచ్చినట్లు వైద్య ఆరోగ్య శాఖ బులెటిన్​ విడుదల చేసింది. ఇప్పటికే 11,640 మందికి స్క్రీనింగ్​ పూర్తయింది. ఇతర రాష్ట్రాల నుంచి వచ్చిన విదేశీయులను అధికారులు క్షుణ్ణంగా పరీక్షిస్తున్నారు. మరోవైపు వైరస్​ వ్యాప్తి నివారణకు జనతా కర్ఫ్యూ పాటించాలన్న ప్రధాని మోదీ పిలుపు మేరకు ప్రజలు స్వచ్ఛందంగా బంద్​ పాటిస్తున్నారు. కరోనా విస్తృతిపై రాష్ట్ర వైద్య ఆరోగ్యశాఖ బులెటిన్‌ విడుదల చేసింది. అందులోని వివరాల ప్రకారం.. రాష్ట్రంలో మొత్తం ఐదుగురికి కరోనా పాజిటివ్‌ ధ్రువీకరణ అయింది. విశాఖ, విజయవాడ, రాజమహేంద్రవరం, ప్రకాశం, నెల్లూరు జిల్లాల్లో ఒక్కో పాజిటివ్‌ కేసు నమోదైంది. విశాఖ విమానాశ్రయం, ఓడరేవు వచ్చిన 11,640 మందికి స్క్రీనింగ్ పూర్తయింది. ఇతర రాష్ట్రాల నుంచి వచ్చిన విదేశీ ప్రయాణికులకు అధికారులు క్షుణ్ణంగా పరీక్షలు చేస్తున్నారు. రాష్ట్రానికి 12,953 మంది విదేశీ ప్రయాణికులు వచ్చినట్టు గుర్తించారు.

2,052 మంది ప్రయాణికులను క్వారంటైన్‌లో 28 రోజుల పరిశీలన చేస్తున్నారు. మరో 10, 841 మందిని హోం ఐసోలేషన్ విధానంలో పరీక్షిస్తున్నారు. ఇప్పటికే.. 60 మందిని ఆస్పత్రిలో చేర్పించారు. వీరందరిలో 160 మంది అనుమానితుల నమూనాలను పరీక్షలకు పంపారు. అందులో.. 130 మందికి కరోనా నెగిటివ్‌గా తేలింది. మిగిలినవారి నమూనాల ఫలితాలు రావాల్సి ఉంది. తెలంగాణలో రోజు రోజుకు కరోనా కేసుల సంఖ్య పెరుగుతోంది. తాజాగా ఈరోజు మరో కేసు నిర్ధారణ జరిగింది. ఇవాళ్టితో కరోనా పాజిటివ్​ కేసుల సంఖ్య 22కు చేరింది. ఏపీలోని గుంటూరుకు చెందిన 22 ఏళ్ల యువకుడికి కరోనా పాజిటివ్‌ వచ్చినట్లు వైద్య ఆరోగ్యశాఖ ప్రకటించింది. అతను ఇటీవలే లండన్‌ నుంచి దుబాయ్‌ మీదుగా హైదరాబాద్‌ వచ్చినట్లు తెలిపింది.

ఆ వ్యక్తిని ప్రస్తుతం గాంధీ ఆసుపత్రికి తరలించి చికిత్స అందిస్తున్నారు. అటు దేశంలో కరోనా కేసుల సంఖ్య 341కి చేరింది. ఈ వైరస్ సోకి మృతి చెందిన వారి సంఖ్య 6కు పెరిగింది. కరోనా వ్యాప్తి నివారణకు జనతా కర్ఫ్యూ పాటించాలన్న ప్రధాని మోదీ పిలుపు మేరకు విజయవాడలో ప్రజలు స్వచ్ఛందంగా కర్ఫ్యూలో పాల్గొంటున్నారు. ఉదయం 7 గంటల నుంచి ఇళ్లకే పరిమితమయ్యారు. కర్ఫ్యూతో విజయవాడలోని రద్దీగా ఉండే బెంజ్ సర్కిల్ రోడ్డు వెలవెలబోతుంది. చెన్నై - విజయవాడ జాతీయ రహదారిపై అత్యవసర వాహనాలు మినహా, ఇతర వాహనాల రాకపోకలు నిలిచిపోయాయి. అత్యవసరం మినహా మిగిలిన సేవలు అన్నీ బందయ్యాయి.