news

తెలుగు ప్రజలను ఉద్దేశిస్తూ ప్రధాని నరేంద్ర మోడీ ట్వీట్ చేసి, ఉగాది శుభాకాంక్షలు తెలిపారు. ఆయన ట్వీట్ చేస్తూ "ఉగాదితో కొత్త సంవత్సరం ఆరంభం అవుతోంది. ఈ సంవత్సరం ప్రజల ఆశలు ఆకాంక్షలు నెరవేర్చి, కష్టాలను అధిగమించే నూతనశక్తిని ప్రసాదిస్తుందని ఆశిస్తున్నాను. ప్రజలందరూ సుఖ సంతోషాలతో, ముఖ్యంగా ఆరోగ్యంతో వుండాలని ప్రార్ధిస్తున్నాను." అని ట్వీట్ చేసారు. అలాగే వివిధ రాష్ట్రాల్లో ఈ రోజు కొత్త సంవత్సరం జరుపుకుంటున్నారని, అందరికీ మంచి జరగాలని కోరుకుంటున్నా అని అన్నారు. ఈ రోజు కొత్త సంవత్సరం అయినా, కరోనా మహమ్మారితో పోరాటం చేస్తున్నాం అని అన్నారు. ఈ సారి, ప్రతి పండుగ లాగా, జరుపుకొలేకపోయినా, భవిష్యత్తులో అంతా మంచి జరుగుతుందని ప్రధాని అన్నారు.

ఇక మరో పక్క, తెలుగుదేశం పార్టీ అధినేత, మాజీ ముఖ్యమంత్రి చంద్రబాబు నాయుడు కూడా, తెలుగు ప్రజలకు ఉగాది శుభాకాంక్షలు తెలిపారు. ‘‘శ్రీ శార్వారి నామ సంవత్సరం తెలుగువారు అందరికీ శుభదాయకం కావాలి. ఈ ఉగాది మనందరికీ ఆరోగ్యాన్ని, ఆనందాన్ని ఇవ్వాలి. బైటకు రాకుండా ఇళ్లలోనే ఉగాదిని జరుపుకోవాలి. జాతరలకు, వేడుకలకు దూరంగా ఉండాలి. అందరూ వ్యక్తిగత పరిశుభ్రత పాటించాలి. కుటుంబ భద్రత, సామాజిక భద్రత మనందరి సంకల్పం కావాలి. కరోనా తీవ్రత దృష్ట్యా సామాజిక దూరం పాటించాలి. డిజిటల్ సోషలైజేషన్ సద్వినియోగం చేసుకోవాలి.

‘‘ఆరోగ్యమే మహాభాగ్యం’’ అని పెద్దలు చెప్పారు. ఉగాది పచ్చడిలో తీపి,చేదు,పులుపు,వగరు...షడ్రుచులు ఉన్నట్లే, మానవ జీవితంలో కష్టాలు-నష్టాలు, సుఖాలు-దు:ఖాలు కలబోసి ఉంటాయి అనేదే ఉగాది పండుగ పరమార్ధం. కష్టం వస్తే కుంగిపోకూడదు, సుఖాలకు పొంగిపోరాదనేదే ఉగాది సందేశం. విపత్తులు ఎన్ని ఎదురైనా గట్టి పట్టుదలతో ఎదుర్కొందాం. మొక్కవోని ధైర్యంతో, దృఢ సంకల్పంతో ముందుకు సాగుదాం. ‘‘వికారి’’కి వీడ్కోలు పలుకుదాం-‘‘శార్వారి’’ని స్వాగతిద్దాం’’ అని, ఉగాది పండుగ సందర్భంగా తెలుగుదేశం పార్టీ అధ్యక్షులు చంద్రబాబు నాయుడు తెలుగువారు అందరికీ విజ్ఞప్తి చేశారు.

నేటి నుంచి దేశమంతా లాక్​డౌన్​ విధిస్తున్నట్లు ప్రధాని నరేంద్రమోదీ ప్రకటించారు. ఇల్లు విడిచి బయటకు రావటాన్ని పూర్తిగా నిషేధిస్తున్నట్లు తెలిపారు. జనతా కర్ఫ్యూను మించి లాక్​డౌన్​ను అమలు చేస్తామని స్పష్టం చేశారు.21 రోజుల పాటు ఈ లాక్​డౌన్​ కొనసాగుతుందని తెలిపారు ప్రధాని. కరోనా వ్యాప్తిని అరికట్టేందుకు 21 రోజులు కావాలని నిపుణులు చెబుతున్నారని.. అందువల్ల రానున్న 21 రోజులు చాలా కీలకమని స్పష్టం చేశారు.లక్ష్మణ రేఖ..ప్రతి ఇంటికీ లాక్​డౌన్​ నిర్ణయం లక్ష్మణ రేఖ వంటిదని మోదీ అన్నారు. ప్రజలందరూ ఇళ్లలోనే ఉండాలని కోరారు. రహదారులపై ఎవరూ తిరగవద్దన్నారు. కరోనా లక్షణాలు బయటపడేందుకు కొన్ని రోజులు పడుతుందని.. అందువల్ల తెలియకుండానే అతని నుంచి ఇతరులకు సోకే ప్రమాదం ఉందని హెచ్చరించారు.

ప్రధాని మాట్లాడుతూ, "ఎవరూ ఇంటినుంచి బయటకు రాకూడదు. ఈ దేశంలో ఏం జరిగినా ఇళ్లలోనే ఉండాలి. ప్రధాని నుంచి గ్రామవాసుల వరకు సామాజిక దూరం పాటించాలి. ఏం జరిగినా ఇంటిచుట్టూ ఉన్న లక్ష్మణరేఖ దాటి రావొద్దు. కరోనాపై పోరాటానికి మన చిత్తశుద్ధి నిరూపించుకోవాల్సిన సమయమిది. ప్రతి ఒక్కరూ క్రమశిక్షణ, సంయమనం పాటించాల్సిన సమయమిది. ప్రతి ఒక్కరూ ఇళ్లలోనే ఉండాలని చేతులు జోడించి వేడుకుంటున్నా. ఈ లాక్‌డౌన్ నిర్ణయం.. ప్రతి ఇంటికి లక్ష్మణరేఖ. కరోనా సోకినవాళ్లు తొలుత సాధారణంగానే ఉంటారు, కాబట్టి ఇతరులను కలిసే ప్రయత్నం చేయవద్దు. రహదారులపై ఎవరూ తిరగవద్దు. కరోనా లక్షణాలు బయటపడేందుకు కొన్నిరోజుల సమయం పడుతుంది."

"దానివల్ల తెలియకుండానే ఆ వ్యక్తి నుంచి ఇతరులకు సోకే ప్రమాదం. వైరస్ సోకిన వ్యక్తి వందలమందికి వ్యాపింపజేయగలడని ప్రపంచ ఆరోగ్య సంస్థ చెబుతోంది. కరోనా బాధితుల సంఖ్య లక్షకు చేరేందుకు 67 రోజులు పట్టింది. తర్వాత 11 రోజుల్లోనే మరో లక్ష మంది బాధితులు నమోదయ్యారు. ఇదే పరిస్థితి కొనసాగితే మరో లక్ష మందికి సోకేందుకు 4 రోజులే పడుతుంది. కరోనా ఎంత వేగంగా వ్యాపిస్తుందో చెప్పేందుకు ఈ గణాంకాలే ఉదాహరణ. చైనా, అమెరికా, ఇటలీ, ఫ్రాన్స్, జర్మనీ, ఇరాన్‌ దేశాలు తీవ్రంగా ప్రభావితం అయ్యాయి. వైద్య సదుపాయాల కోసం రూ.15 వేల కోట్లు కేటాయింపు. ఆరోగ్య సేవలకే తొలి ప్రధాన్యం ఇవ్వాలని రాష్ట్రాలను కోరుతున్నా. సంక్షోభ సమయంలో భుజం భుజం కలిపి పనిచేయాలి. కేంద్ర, రాష్ట్రాలు నిరంతరం ఇదే విషయంపై ఆలోచిస్తున్నాయి. నిత్యావసరాలన్నీ ఇబ్బంది లేకుండా సరఫరా చేస్తాం. కేంద్ర, రాష్ట్రాలు, స్వచ్ఛంద సంస్థలు పేదల ఇబ్బందులు పోగొట్టేందుకు చర్యలు తీసుకుంటున్నాయి. ప్రజల ప్రాణాలు కాపాడటమే కేంద్ర, రాష్ట్ర ప్రభుత్వాల కర్తవ్యం. నిర్లక్ష్య ధోరణితో మందులు తీసుకుంటే మరింత ప్రమాదంలో పడతారు. 21 రోజుల లాక్‌డౌన్‌.. మన ప్రాణాల కంటే ఎక్కువ కాదు "

రాజధాని అమరావతి మాస్టర్ ప్లాన్ లో మార్పులు చేస్తూ గృహ నిర్మాణ జోన్ (ఆర్​ - 5 జోన్​) ఏర్పాటు విషయంపై.. రాజధాని నిర్మాణంలో భాగస్వాములు, భూములిచ్చిన రైతులు.. సీఆర్డీఏకు అభ్యంతరాలు సమర్పించేందుకు 30 రోజులు గడువు పొడిగిస్తూ హైకోర్టు మధ్యంతర ఉత్తర్వులిచ్చింది. ప్రధాన న్యాయమూర్తి జస్టిస్ జేకే మహేశ్వరి, జస్టిస్ ఎస్ జయసూర్యతో కూడిన ధర్మాసనం ఈ మేరకు ఆదేశాలు జారీ చేసింది. రాజధాని బృహత్ ప్రణాళిక ప్రకారం ఇప్పటి వరకు 4 నివాస జోన్లు ఉండేవి. ఆర్థికంగా వెనుకబడిన వర్గాలకు అందుబాటు ధరల్లో గృహనిర్మాణ జోన్ - 5 ఏర్పాటు చేసేందుకు సీఆర్డీఏ నిర్ణయించింది. అందులో భాగంగా కృష్ణాయపాలెం, వెంకటపాలెం, నిడమర్రు, కురగల్లు, మందడం, ఐనవోలు గ్రామాల పరిధిలో 900 ఎకరాల్ని ఆర్ - 5 జోన్‌గా పేర్కొంది.

ఈ వ్యవహారంపై అభ్యంతరాలు సమర్పించేందుకు 15 రోజులు గడువిస్తూ ప్రభుత్వం ఈనెల 10న గెజిట్ జారీ చేసింది. కరోనా వ్యాప్తి నేపథ్యం, రాష్ట్రంలో లాక్​డౌన్ పరిస్థితుల కారణంగా అభ్యంతరాలు సమర్పించేందుకు గడువును పొడిగించాలని కోరుతూ రైతు ఎ.నందకిశోర్ హైకోర్టులో పిల్ వేశారు. దీనిపై విచారించిన ఉన్నత న్యాయస్థానం అభ్యంతరాల సమర్పణ గడువును పొడిగించింది.

మరో పక్క, మాన్సాస్ ట్రస్ట్ ఛైర్మన్‌, వ్యవస్థాపక కుటుంబ సభ్యుల నియామకాలపై... ప్రభుత్వం జారీచేసిన జీవోలను సవాలు చేస్తూ... దాఖలైన వ్యాజ్యాలపై హైకోర్టు విచారణ జరిపింది. రాష్ట్ర ప్రభుత్వంతో పాటు ప్రతివాదులని కౌంటర్‌ దాఖలు చేయాలని పేర్కొంది. తదుపరి విచారణను ఏప్రిల్ 9కి వాయిదా వేసింది. ట్రస్ట్‌ ఛైర్‌పర్సన్‌గా సంచైత గజపతిరాజు, వ్యవస్థాపక కుటుంబ సభ్యులుగా ఊర్మిల గజపతిరాజు, ఆర్వీ సునీత ప్రసాద్‌లను నియమిస్తూ ఈ నెల 3న ప్రభుత్వం ఉత్తర్వులు విడుదల చేసింది. ఈ ఆదేశాలపై కేంద్ర మాజీ మంత్రి అశోక్​ గజపతిరాజు హైకోర్టును ఆశ్రయించారు.