జగన్.. అధికారంలోకి వస్తే భూమిపై స్వర్గాన్ని సృష్టిస్తానని చెప్పి అధికారంలోకి వచ్చాక ప్రజలను నరకాన్ని చూపిస్తున్నారని మాజీ ఎమ్మెల్సీ ఏ.ఎస్ రామకృష్ణ పేర్కొన్నారు. మంగళవారం మంగళగిరిలోని తెలుగుదేశం పార్టీ జాతీయ కార్యాలయంలో ఏర్పాటు చేసిన విలేకరుల సమావేశంలో ఆయన మాట్లాడారు. ఆయన మాట్లాడిన మాటలు మీ కోసం...! జగన్ పుట్టినరోజుకు ప్రభుత్వ నిధులు వెచ్చించడమేంటి? విజయవాడలో అధికారికంగా సాంస్కృతికశాఖ మంత్రి రోజా నృత్య కార్యక్రమాలు ప్రత్యక్షంగా ఆమే స్వయంగా నిర్వహించడంలో అర్థంలేదు. జగన్ పుట్టినరోజుకు సాంస్కృతిక, క్రీడాశాఖలు రూ.2.50 కోట్లు వెచ్చించడం దారుణం. ఏ సీఎం ఇలా చేయలేదు. ఎన్టీరామారావు పుట్టినరోజు సందర్భంగా ప్రతి యేడాది రక్తదానాలు చేస్తారు. శిబిరాల వద్దకు తీసుకొచ్చి రక్తమివ్వండని ఎవరూ అడగరు, డాక్టర్లు, తెలుగుదేశం పార్టీ కార్యకర్తలు, ఇతర అభిమానులు స్వచ్ఛందంగా ముందుకు వచ్చి రక్తదానం చేస్తారు. అంతేగానీ ఎవరూ బలవంతపెట్టరు. జేఎన్ టీయు, ఎన్ఎస్ఎస్ సంస్థ ల ద్వారా విద్యార్థులచే బలవంతంగా రక్తదానం చేయించడం హాస్యాస్పదం. బలవంతంగా రక్తదానం ఎక్కడా చేయించారని పాలకులు అర్థం చేసుకోవాలి. ఈ మూడున్నర సంవత్సరాలుగా విద్యార్థులు, మహిళలు, యువకులు, వృద్ధులు, ఉపాధ్యాయులు, ఉద్యోగస్థులు, కూలీలు, రియల్ ఎస్టేట్ వ్యాపారులు ఏ వర్గంవారు కూడా సంతోషంగా లేరు. జగన్.. రాష్ట్రానికి ఏమీ చేయలేదు. రాష్ట్రాన్ని పరిపరివిధాలుగా అభివృద్ధి చేస్తానని చెప్పి రాష్ట్రాన్ని సర్వనాశనం చేశారు. జగన్ పుట్టినరోజు సందర్భంగా విద్యార్థులకు వ్యాసరచన పోటీలు నిర్వహిస్తున్నారు. ఈ పోటీలలో విద్యాదీవెన, వసతి దీవెన, నాడు-నేడు, అమ్మఒడి పెట్టిన అంశాలుగా పెట్టారు. పాల్గొనే విద్యార్థులకు జగన్ ప్రవేశపెట్టిన పథకాలను పొగిడితేనే ఫస్ట్, సెకండ్ మార్కులొస్తాయి.
విమర్శనాత్మక ధోరణితో రాస్తే ప్రైజు రాదు కదా.. ప్రమాదం ఉంటుంది. కావున విమర్శనాత్మకంగా రాయొద్దని భయపడి తల్లిదండ్రులు విద్యార్థులకు చెబుతున్నారు. రేపు మీ వెంటపడే అవకాశముంది.కాబట్టి తస్మాత్ జాగ్రత్త. జగన్ స్వాతంత్ర్య సమరయోధుడా? రాష్ట్రంలో ఎవరూ తీసుకరాని సంస్కరణలు తీసుకొచ్చారనా?. ధీరాదాత్తుడనా? ఈ రాష్ట్రానికి మంచిపనులు చేశారనా? రాష్ట్రాన్ని ఆర్థికంగా , సాంఘికంగా, సాంస్కతికంగా అభివృద్ధి చేశారనా? రాష్ట్రం తలెత్తుకునేలా చేసిన వ్యక్తి అనా! ఎందుకు ఈ సంబరాలు? రాష్ట్రాన్ని అధోగతిపాలు చేశారు. ప్రజల జీవన ప్రమాణాలను అధోపాతాళానికి నెట్టేశారు. రాష్ట్రం 30 సంవత్సరాలు వెనక్కి పోయేలా చేశారు. రాష్ట్రానికి పెట్టుబడులు రానీయకుండా చేశాడు. ముఖ్యమంత్రిగా పగ్గాలు చేపట్టాక రాష్ట్రానికి ఒక్క పరిశ్రమ రాలేదు. పారిశ్రామికులు భయంతో తరలి వెళ్లిపోయేలా చేశారు. ఎన్నికలకు ముందు అనేక హామీలిచ్చారు. ప్రజలు నమ్మారు, నమ్మినందుకు నట్టేట ముంచారు. నాకొక ఛాన్స్ ఇచ్చి చూడండి నా సత్తా చూపిస్తానని చెప్పి మోసం చేశారు. సీపీఎస్ రద్దు చేస్తానన్నాడు, కాంట్రాక్టు ఉద్యోగులను రెగ్యులరైజ్ చేస్తానన్నాడు. ఉద్యోగస్థులకు వారం రోజుల్లోనే ఓపీఎస్ తీసుకొస్తానన్నాడు. సకాలంలో డీఏలు ఇస్తానన్నాడు, రైతుల పంటకు గిట్టుబాటు ధర కల్పిస్తానన్నాడు, డ్వాక్రా స్థితిగతులు మెరుగుపరుస్తానన్నాడు.
అమరావతిని బ్రహ్మాండంగా అబ్బురపరచేలా రాజధానిని నిర్మిస్తానని చెప్పి అన్ని రకాలుగా మోసం చేశారు. చెప్పిన మాటలన్నీ మోసకారి మాటలు అని తేలిపోయాయి. అసెంబ్లీలో టీడీపీతోపాటు మేం కూడా అమరావతిని రాజధానిగా అంగీకరించి తీర్మానం చేసి ఇప్పుడు మూడు రాజధానుల ముచ్చట పెట్టారు. దొంగ నాటకమాడుతున్నారు. 2 లక్షల ఉద్యోగాలు ఇస్తానని చెప్పి జాబ్ లెస్ క్యాలెండర్ విడుదల చేశారు. అప్పుడు తనను గెలిపించండి తన సత్తా ఏంటో చూపిస్తానని అరచి అరచి చెప్పి ఇప్పుడు కరుస్తున్నారు. రాష్ట్రాన్ని ఏం అభివృద్ధి చేశారని జగన్ పుట్టినరోజు సంబరాలు? పుట్టినరోజులకు స్వచ్ఛందంగా రక్తదానమిస్తారు, బలవంతాలేంటి? అని ప్రజలు ప్రశ్నిస్తున్నారు. విద్యాదీవెన, వసతి దీవెన, నాడు-నేడు, అమ్మఒడి లపై వ్యాసరచన పోటీలు పెట్టకుండా ఏ దేశోద్ధారకుల గురించో రాయమంటే ప్రజలు హర్షించేవారు. జగన్ వావిలాల గోపాలకృష్ణ కంటే గొప్పవాడా? విజయభాస్కర్ రెడ్డి, ఎన్టీరామారావు, చెన్నారెడ్డి, అంజయ్య, రాజశేఖర్ రెడ్డిలెవరూ ఇలా చేయలేదు. రాష్ట్రంలో మీరొక్కరే బతకాలనుకోవడం అవివేకం. మా పార్టీ మాత్రమే ఉండాలనుకోవడం దుర్మార్గం. మీ ఇష్టమొచ్చినట్లు దాడులు చేస్తామనడం అహంకారం. పోలీసులను ఉపయోగించి కేసులు పెడుతున్నారు. అచ్చెన్నాయుడు, కొల్లు రవీంద్ర, అశోక్ బాబులాంటివారిని అరెస్టు చేసి ఏం సాధించారు? టీడీపీలో భయానక వాతావరణాన్ని సృష్టించడానికి ప్రయత్నించారు. ఎవరూ భయపడరు. దౌర్జన్యకాండ చేసి జన్మదినాలు జరుపుకుంటున్నారు. వివేకానందుడు, సర్దార్ వల్లభాయ్ పటేల్, లాలా లజపతిరాయ్ ని పోల్చుకొని మురిసిపోకండి. ఇప్పటికైనా ప్రభుత్వ నిధులను జగన్ పుట్టినరోజుకు వాడకుండా ఉండాలని కోరుచున్నాను.
