news

మద్రాసు నుంచి తరిమేస్తే, కర్నూల్ కి, అక్కడ నుంచి హైదరాబాద్ కి, అక్కడ నుంచి మళ్ళీ మనల్ని తరిమేస్తే, మనకు రాజధాని లేదు, రాజధానిని కట్టుకోడానికి భూములు లేవు అని సమయంలో, మన 5 కోట్ల ఆంధ్రప్రదేశ్ ప్రజల కలల రాజధాని అమరావతి కోసం 34 వేల ఎకరాలు త్యాగం చేసిన రైతులను నేటి ప్రభుత్వం, 3 రాజధానుల ప్రకటనతో, రోడ్డున పడేసింది. ఆ రోజు నుంచి, ఇప్పటి వరకు అంటే, 150 రోజులుగా, ఈ విషయం పై ఆందోళన చేస్తూనే ఉన్నారు. తమ భవిష్యత్తుతో పాటు, రాష్ట్ర భవిషత్తు కోసం 34 ఎకరాలు ఇచ్చాం అని, తమను అన్యాయం చేయ్యావద్దు అంటూ, 150 రోజులుగా ఆందోళన చేస్తున్నా, ఇప్పటి వరకు ముఖ్యమంత్రి కాని, మంత్రులు కాని, ఒక్క అధికారి కాని, కనీసం స్థానిక ఎమ్మెల్యేలు కూడా, వచ్చి, ఆరు నెలలుగా మీరు ఆందోళన చేస్తున్నారు, మీ కష్టం ఏమిటి అని అడిగిన పాపాన పోలేదు. పోలీసులు లాఠీ దెబ్బలు కొట్టినా, కరోనా వచ్చినా, అమరావతి మహిళలు, రైతులు మాత్రం, తమ పోరాటం ఆపటం లేదు. ప్రభుత్వం దిగి వచ్చే వరకు, తమ ఆందోళన చేస్తాం అంటున్నారు.

అమరావతి రైతుల దీక్ష, ఈ రోజుతో 150 రోజులు కావటంతో, తెలుగుదేశం పార్టీ అధినేత చంద్రబాబు స్పందించారు. "అమరావతి పరిరక్షణ ఉద్యమం మొదలై ఈరోజుకు 150 రోజులు. కులముద్రలు, అవమానాలు, అరెస్టులు, లాఠీ దెబ్బలు... ఇలా ప్రభుత్వం పెట్టిన అన్నిరకాల హింసలనూ తట్టుకుని అమరావతి కోసం రైతులు, రైతు కూలీలు, మహిళలు చేస్తున్న పోరాటం ఒక చరిత్ర. రాష్ట్రం కోసం 33వేల ఎకరాల భూములు త్యాగం చేసిన చరిత్ర ఇక్కడి ప్రజలది. ప్రభుత్వానికే 5వేల ఎకరాల ఆస్తి కట్టబెట్టి 'బిల్డ్ ఏపి' చేశారు. వారి త్యాగాలతో రాష్ట్ర ప్రజలకు రూ. లక్ష కోట్ల ఆస్తి సమకూరితే, మూర్ఖత్వంతో ఆ ఆస్తిని వైసీపీ పాలకులు మట్టిలో కలిపేశారు. ప్రభుత్వ ఆస్తులు అమ్మి 'బిల్డ్ ఏపి'ని 'సోల్డ్ ఏపి'గా మార్చి ప్రజల ఉసురు పోసుకుంటున్నారు."

"నిర్మాణం విలువ తెలియని విధ్వంసకుల చేతుల్లోకి రాష్ట్రం చేరడమే ఈ దుస్థితికి కారణం. రాజధాని తరలిస్తే తమ భవిష్యత్తు ఏమవుతుందన్న ఆవేదనతో 64మంది రైతులు గుండెపోటుతో మరణించారు. అయినా రాష్ట్ర ముఖ్యమంత్రి కనీసం ఒక్కసారైనా రాజధాని ప్రజలను కలిసి పలకరించిన పాపానికి పోలేదంటే... ఎంతటి కర్కోటక పాలనలో ఉన్నామో అర్ధమవుతోంది. లాక్ డౌన్ కాలంలోనూ శాంతియుతంగా, ఆత్మ విశ్వాసంతో తమ పోరాటాన్ని కొనసాగిస్తున్న రైతులు, రైతు కూలీలు, మహిళలూ... మీ పోరాటం స్పూర్తిదాయకం. మీకు న్యాయం జరిగేవరకూ మీ అండగా నేనుంటాను. తెలుగుదేశం పార్టీ ఉంటుంది. అధైర్యపడకండి." అని చంద్రబాబు అన్నారు.

రాష్ట్రం ఒక పక్క కరోనాతో అల్లాడుతూ ఉండగానే, అనేక చెడు వార్తలు వినాల్సి వస్తుంది. మొన్నటికి మొన్న ఎల్జీ పాలిమర్స్ ప్రమాదంలో, 11 మంది చనిపోవటం, అనేక మంది రోడ్డు మీద పరిగెత్తటం లాంటి ఘటనలు మర్చిపోక ముందే, ఇప్పుడు మరో చెడు వార్త ఏపి ప్రజలను షాక్ కు గురి చేసింది. ప్రకాశం జిల్లాలో జరిగిన ఘోర ప్రమాదంలో, పది మంది చనిపోవటం, మరికొంత మంది ప్రాణాలతో కొట్టుకుంటూ ఉండటంతో, ఒక్కసారిగా రాష్ట్రం ఉలిక్కి పడింది. ప్రకాశం జిల్లా, నాగులుప్పలపాడు మండలం రాపర్ల వద్ద జరిగిన ఈ ఆక్సిడెంట్ తో, అందరూ షాక్ తిన్నారు. వ్యవసాయ కూలీలను తీసుకు వెళ్తున్న ట్రాక్టర్ ప్రమాదానికి గురి అయ్యింది. వ్యవసాయ పనులు ముగించుకుని, కూలీలు ట్రాక్టర్ పై ఇంటికి వెళ్తూ ఉండగా, ఈ ఘోర సంఘటన జరిగింది.

ట్రాక్టర్ అదుపు తప్పి, విద్యుత్‌ స్తంభాన్ని ఢీకొనడంతో, అక్కడికక్కడే పది మంది చనిపోయారు. ట్రాక్టర్ వెళ్లి విద్యుత్‌ స్తంభాన్ని ఢీకొనడంతో, ఆ స్థంబం పడిపోయి, దానికి ఉన్న కరెంట్ తీగులు వచ్చి, ఆ ట్రాక్టర్ లో ఉన్న కూలీల పై పడ్డాయి. ట్రాక్టర్ లో మొత్తం, 30 మంది వరకు ఉన్నట్టు చెప్తున్నారు. మొత్తం 11 మంది చనిపోగా, 8 మంది మహిళలు, ఇద్దరు ఇంటర్ విద్యార్ధులుగా తెలుస్తుంది. క్షతగాత్రులను స్థానికులు, దగ్గరలో ఉన్న హాస్పిటల్ కు తరలించారు. వీరు అంతా, దగ్గరలోనే మిర్చి పొలంలో, మిరప పంట కోయటానికి వెళ్లి, చీకటి పడటంతో తిరిగి వస్తూ ఉండగా, ఈ ప్రమాదం జరిగింది. ఘటనా స్థలంలో పరిస్థితి దారుణంగా ఉంది. ఈ ఘటనకు సంబంధించి మరిన్ని వివరాలు తెలియాల్సి ఉంది.

విశాఖపట్నంలో, ఎల్జీ పాలిమర్స్ ఉన్న ఆర్ఆర్ వెంకటాపురం ప్రాంతంలో మరోసారి ఉద్రిక్తత పరిస్థితులు నెలకొన్నాయి. గ్యాస్ లీక్ బాధితులను పరామర్శించేందుకు ఆ గ్రామాలకు ప్రతిపక్ష తెలుగుదేశం పార్టీ నేతలు వచ్చారు. అయితే తెలుగుదేశం పార్టీ నేతలను వెంకటాపురంలోని అడుగు పెట్టనివ్వకుండా, పోలీసులు అడ్డుకున్నారు. మాజీ మంత్రి బండారు సత్యన్నారాయ మూర్తి, మాజీ ఎమ్మెల్యే గండి బాబ్జీతో పాటుగా పలువురు తెలుగుదేశం పార్టీ నాయకులను అరెస్ట్ చేసి పెందుర్తి పోలీసు స్టేషన్ కి తరలించారు. అనంతరం అక్కడ నుంచి ఆనందపురం పోలీస్ స్టేషన్ కు తరలించారు. అయితే, జరుగుతున్న ఈ పరిణామాల పై తెలుగుదేశం పార్టీ భగ్గు మంది. బాధితులను పరామర్శించటానికి వస్తే అడ్డుకువటం, అరెస్ట్ చెయ్యటం ఏమిటి అంటూ తెలుగుదేశం పార్టీ ప్రశ్నించింది. వైసీపీ మంత్రులు, అక్కడ గ్రామాలకు దూరంగా పడుకుని డ్రామాలు ఆడారని, అక్కడ ప్రజలు ఇప్పటికీ ఇబ్బందులు పడుతున్నారని అన్నారు.

ఈ ఇబ్బందులు గురించి తెలుసుకోవటానికి, వెళ్తే అరెస్ట్ చెయ్యాల్సిన అవసరం ఏమి ఉంది అంటూ ప్రశ్నిస్తున్నారు. మొన్నటికి మొన్న, 12 మంది చంపిన కంపెనీ వారిని కాకుండా, న్యాయం చెయ్యాలి అని చెప్పిన బాధితుల పై కేసులు పెట్టటం, ఇప్పుడు బాధితులకు అండగా ఉందామని, తెలుగుదేశం పార్టీ నేతలు వస్తే అరెస్ట్ చెయ్యటం ఏమిటని తెలుగుదేశం పార్టీ ప్రశ్నించింది. ఇప్పటికీ అక్కడ ఊపిరి ఆడక ఇబ్బందులు పడుతున్నారని, నిన్న ఇద్దరు వాలంటీర్లు ఊపిరి ఆడక పడిపోవటం, కొంత మంది ఇళ్ళల్లో శుభ్రం చేసుకుంటూ, పడిపోవటం లాంటి సంఘటనలు చోటు చేసుకుంటుంటే, ప్రభుత్వం మాత్రం అంతా బాగుంది అని చెప్తూ, ఇక్కడ వాస్తవ పరిస్థితి చెప్పటం లేదు అంటూ, తెలుగుదేశం పార్టీ ఆరోపిస్తుంది.

ఇక మరో పక్క, ఈ రోజు, ఎల్జీ పాలిమర్స్ దగ్గర ఉన్న, వెంకటాపురం రైల్వేట్రాక్ సమీపంలో అంధకారం నెలకొంది. వీధి దీపాలు వెలగక స్థానికుల అవస్థలు పడుతున్నారు. స్టైరీన్ వాయువు పీల్చి మృతిచెందిన వారిలో ఎక్కువ మంది ఈ వెంకటాపురం ప్రాంతానికి చెందిన వారే అన్న సంగతి తెలిసిందే. వెంకటాపురం రైల్వేట్రాక్ సమీపంలో అంధకారం నేలకోనటంతో, స్థానికలు భయాందోళనకు గురి అవుతున్నారు. వెంటనే, వీధి దీపాలు వెలిగేలా చెయ్యాలని కోరుతున్నారు. ఇప్పటికీ భయం భయంగా గడుపుతుంటే, వీధి దీపాలు లేకుండా చెయ్యటం పై, వారు ఆందోళన వ్యక్తం చేస్తూ, వెంటనే అవి పునరుద్ధించాలని అక్కడ స్థానిక అధికారులను కోరుతున్నారు.