news

బీజేపీతో పవన్ కళ్యాణ్ కలిసిన దగ్గర నుంచి, పవన్ కళ్యాణ్ కు ఏమి ఉపయోగమో తేలియదు కానీ, పవన్ క్రేజ్ ని ఉపయోగించి, బీజేపీ మాత్రం హడావిడి చేస్తుంది. ఇప్పటి వరకు బీజేపీతో పొత్తుతో పవన్ కళ్యాణ్ కు ఒరిగింది ఏమి లేదు. చివరకు ఒకసారి కూడా అమిత్ షాని కానీ, మోడీని కానీ కలిసి ఆంధ్రప్రదేశ్ సమస్యల గురించి, అజెండా గురించి చర్చించింది లేదు. ఇది ఒక పక్కన పెడితే, మొన్న జరిగిన, హైదరాబాద్ మునిసిపల్ ఎన్నికల్లో, జనసేనతో పొత్తు విషయంలో బీజేపీ చేసిన పని నచ్చక, పవన్ కళ్యాణ్ తన అభ్యర్ధుల జాబితీ కూడా ప్రకటించారు. ఎంపీ అరవింద్ కానీ, బండి సంజయ్ కానీ, జనసేనతో మాకు పొత్తు లేదని తేల్చి చెప్పారు. చివరకు అమిత్ షా ర్యాలీలో కూడా, జనసేన జెండాలో తీసేయమని చెప్పిన వీడియో బయటకు వచ్చింది. చివరకు కిషన్ రెడ్డి చర్చలు జరపటంతో, ఆ వివాదం సమసిపోయి, పవన్ కళ్యాణ్ అభ్యర్ధులను వెనక్కు పిలిపించి, బేషరతుగా బీజేపీకి మద్దతు ఇచ్చారు. అయితే వెంటనే ఢిల్లీ వెళ్లి బీజేపీ అధ్యక్షుడు నడ్డాని కలిసి, తమకు తిరుపతి ఎంపీ టిక్కెట్ ఇవ్వాలని కోరారు. తమ బలం గురించి వివరించారు. అయితే ఎంపీ టికెట్ పై బీజేపీ, జనసేన కలిసి ఒక కమిటీ వేసి, అభ్యర్ధిని నిలపాలని నిర్ణయం తీసుకున్నాయి. బీజేపీకి అక్కడ పెద్దగా ఓట్లు లేకపోవటంతో, అందరూ టికెట్ జనసేనకే వస్తుందని ఊహించారు.

అయితే ఈ రోజు సోము వీర్రాజు, పవన్ కళ్యాణ్ కు షాక్ ఇస్తూ, తిరుపతిలో బీజేపీ అభ్యర్ధి నుంచుంటున్నారు అంటూ బహిరంగ ప్రకటన చేసారు. ఒక పక్క కమిటీ ఏది తేల్చకుండానే, సోము వీర్రాజు చెప్పేశారు. బీజేపీకి మద్దతుగా జనసేన ఉంటుందని అన్నారు. మరి దీని పై పవన్ ఎలా స్పందిస్తారో చూడాలి. ఎందుకంటే వారం క్రితం పవన్ తిరుపతిలో తుఫాన్ బాధితులను పరామర్శించిన సమయంలో, అక్కడ తన క్యాడర్ బలం చూపించారు. మొన్న జరిగిన ఎన్నికల్లో కూడా బీజేపీకి 6 వేల కోట్లు వస్తే, జనసేన బలపరిచిన అభ్యర్ధికి 16 వేల ఓట్లు వచ్చాయి. రాష్ట్ర వ్యాప్తంగా కూడా బీజేపీకి 0.84 శాతం ఓట్లు వస్తే, పవన్ కళ్యాణ్ కు 6% ఓట్లు వచ్చాయి. ఏ విధంగా చూసుకున్న ఒక పొత్తులో ఉన్నప్పుడు, ఎంపీ లాంటి సీటు, బలం ఉన్న పార్టీకి ఇవ్వాలి. మరి బీజేపీ ఏ ఉద్దేశంతో అక్కడ జనసేనని కాదని తమ అభ్యర్ధిని నిలపాలని అనుకుంటుందో వేచి చూడాలి. అసలు కమిటీ నివేదిక రాక ముందే సోము వీర్రాజు తిరుపతిలో చేసిన ప్రకటన పై, జనసేనకు ముందే చెప్పారా ? లేదా అనేది కూడా తెలియాల్సి ఉంది. దీని పై పవన్ స్పందిస్తే కానీ, జనసేన వైఖరి ఏమిటో తెలియదు.

మన దేశంలో సినిమా, రాజకీయాలు వేరు వేరు కాదు.ముఖ్యంగా దక్షిణ భారత దేశంలో, సినిమా, రాజకీలు పెన వేసుకుని ఉంటాయి. అయితే సినిమాల్లో నుంచి రాజకీయాల్లోకి వచ్చిన వారిలో చాలా కొద్ది మంది మాత్రమే సూపర్ సక్సెస్ అయ్యారు. మొదటిగా తమిళనాడులో ఎంజేఆర్ సినిమాల్లో నుంచి రాజకీయాల్లోకి వచ్చి సూపర్ హిట్ అయ్యారు. ఆ తరువాత జయలలిత కూడా ఇలాగే సక్సెస్ అయ్యారు. ఇక మన ఆంధ్రప్రదేశ్ రాష్ట్రానికి వస్తే, అన్న ఎన్టీఆర్ తెలుగుదేశం పార్టీ పెట్టటమే ఒక సంచలనం అయ్యింది. ఎంజేఆర్ లాగా ఎన్టీఆర్ కేవలం రాష్ట్రానికే పరిమితం అవ్వలేదు. దేశ రాజకీయాలను కూడా శాసించారు. ఒక సంచలనం అంటే వీరి పేర్లే చెప్పాలి. ఇక చిరంజీవి పార్టీ పెట్టినా సక్సెస్ కాలేక రాజకీయాలు నుంచి కూడా తప్పుకున్నారు. పవన్ కళ్యాణ్ ఏదో లాగుతున్నారు. ఇప్పుడు తమిళనాడులో సూపర్ స్టార్ట్ రజినీకాంత్ కూడా పార్టీ పెడుతున్నట్టు ప్రకటించారు. ఆయన రాజకీయ ఎంట్రీ పై కొన్ని సంవత్సరాల నుంచి చర్చ జరుగుతుంది. ఎట్టకేలకు ఆ చర్చకు ఫుల్ స్టాప్ పెడుతూ, తాను కొత్త పార్టీ పెడుతున్నట్టు రజిని ప్రకటించారు. డిసెంబర్ 31న పార్టీ పేరు ప్రకటిస్తారని చెప్తున్నారు. ఆ రోజున పార్టీ పేరు, జెండా, పార్టీ గుర్తు ఇలా అన్ని విషయాలు చెప్పనున్నారు. అయితే గత కొన్ని రోజులుగా వీటి అన్నిటి పై పార్టీ నేతలతో ఆయన చర్చిస్తున్నారు.

పార్టీ విధి విధానాల రూపకల్పనలో ఉన్నారు. ఈ సందర్భంగా తన పార్టీ చిహ్నం గురించి చర్చిస్తూ, తన పార్టీ గుర్తు సామాన్యుడి గుర్తులాగా ఉండాలని, రజినీ అభిప్రాయ పడుతూ, సైకిల్ గుర్తు ఎలా ఉంటుంది అని పార్టీ నేతలను అభిప్రాయం అడిగారు. అయితే ఇప్పటికే ఈ గుర్తు ఆంధ్రప్రదేశ్ లో తెలుగుదేశం పార్టీకి ఉందని, భవిష్యత్తులో ఈ విషయం పై అభ్యంతరాలు, ఇబ్బందులు రావచ్చని చెప్పగా, సైకిల్ అనేది సామాన్యుడికి దగ్గర అయ్యేది అని, సైకిల్ గుర్తు పెట్టటం కుదరదు అంటున్నారు కాబట్టి, సైకిల్ వెనుక పాల క్యాన్ కూడా ఉండేలా, (సైకిల్ తో పాల క్యాన్ కూడా ఉండేలా) గుర్తుని ఫైనల్ చేసారని తెలుస్తుంది. రాజినీ నటించిన సూపర్ హిట్ సినిమా అన్నామ‌లైలో కూడా, రజినీకాంత్ ఈ గెట్ అప్ లో ఉంటారని, అది అందరికీ గుర్తుంటుందని, ఆ గుర్తుని ఫైనల్ చేసినట్టు తెలుస్తుంది. అలాగే పార్టీ జెండా కూడా మూడు రంగులు ఉండేలా చూసుకుంటున్నారని సమాచారం. ఈ మొత్తం వివరాలు త్వరలోనే అధికారికంగా రజినీ చెప్పనున్నారు.

ఆంధ్రప్రదేశ్ రాష్ట్రంలో రాజకీయ నాయకుల పేర్లు ఎలా ప్రజల నోట్లో నానుతూ ఉంటాయో, అలాగే కొంత మంది ఐఏఎస్, ఐపీఎస్ అధికారుల పేర్లు కూడా నానుతూ ఉంటాయి. అవి వాళ్ళు చేసే పనులు బట్టి, ప్రజలు వారిని గుర్తిస్తూ ఉంటారు. అది మంచి అయినా, చెడు అయినా. ఈ కోవలోనే, రాజశేఖర్ రెడ్డి అధికారంలో ఉండగా, అధికారులని అడ్డు పెట్టుకుని, అడ్డగోలుగా దోచేశారు అంటూ, సిబిఐ కేసులు నమోదు అయిన విషయం తెలిసిందే. రాజశేఖర్ రెడ్డి చనిపోవటంతో, ఆ కేసుల్లో ప్రధముడిగా జగన్ ఉన్నారు. అయితే ఇవన్నీ విచారణ దశలో ఉన్నాయి. ఇవి పక్కన పడితే, ఆ సమయంలో అనేక మంది అధికారులు కూడా జైలుకు వెళ్ళారు. దాదపుగా ఒక 10 మంది పైగా కేసులు నమోదు అయ్యాయి. అయితే ఐఏఎస్ శ్రీలక్ష్మి గురించి మాత్రం, ప్రజలకు గుర్తుండి పోయింది. ఆమె నెంబర్ వన్ ఐఏఎస్ ఆఫీసర్ కావటం, చిన్న వయసులోనే ఐఏఎస్ అవ్వటం, తరువాత వివిధ కారణాలతో జైలు పాలు అవ్వటం, ఆ సమయంలో ఆమె తీవ్ర అనారోగ్యానికి గురయ్యి, నడవలేని పరిస్థితిలో ఉన్న ఫోటోలు బయటకు రావటం, ఇవన్నీ ప్రజలు చూసారు. ఒక మంచి స్థానంలో ఉండాల్సిన ఐఏఎస్ ఆఫీసర్, ఇలా అయ్యారని, బాధ పడ్డారు. అయితే అదంతా గతం, ఇప్పుడు తాజాగా ఆమె ఇప్పుడు మళ్ళీ వార్తల్లో నిలిచారు. రాష్ట్ర విభజన సమయంలో ఆమె తెలంగాణా రాష్ట్రానికి ఐఏఎస్ గా కేటాయించబడ్డారు. అయితే ఇప్పుడు జగన్ మోహన్ రెడ్డి అధికారంలోకి వచ్చిన తరువాత, తనది ఆంధ్రప్రదేశ్ రాష్ట్రం అని, తాను ఆంధ్రప్రదేశ్ రాష్ట్రంలో పని చేయాలని అనుకుంటున్నా అంటూ క్యాట్ లో దాఖలు చేసారు.

గత 5 ఏళ్ళ చంద్రబాబు హయాంలో ఆమె తెలంగాణా నుంచి పని చేయటానికి ఇష్ట పడ్డారు కానీ, ఇప్పుడు మాత్రం తాను ఏపి అని, అందుకే ఏపి వెళ్ళిపోతానని కోరారు. అయితే ఈ విషయం కేంద్రం కోర్టులోకి వెళ్ళింది. దాదాపుగా ఏడాదికి పైగా ఈ అంశం నలుగుతుంది. కేంద్రం అప్పట్లో ఒప్పుకోలేదనే వార్తలు వచ్చాయి. జగన్ ఢిల్లీ వెళ్ళిన సందర్భంలో, ఆయన పక్కన శ్రీలక్ష్మి కూడా కనిపించారు. పలు సందర్భాల్లో విజయసాయి, ఆమెను కేంద్రం హోం మంత్రి అమిత్ షా వద్దకు తీసుకువెళ్ళి, ఆమెను ఏపి క్యాడర్ కు ఇవ్వమని కోరారు. తెలంగాణా సియం కేసీఆర్ కూడా ఆమెను రిలీవ్ చేయటానికి ఒప్పుకున్నా, కేంద్రం ఒప్పుకోలేదు. అయితే ఇప్పుడు ఎట్టకేలకు ఆమెకు పర్మిషన్ వచ్చింది. నిన్నటితో తెలంగాణా నుంచి రిలీవ్ అయిపోయి, ఏపిలో చేరిపోయారు. ఆమె ప్రస్తుతం జిఏడిలో రిపోర్ట్ అయ్యారు. మొత్తానికి ఆమె జగన్ నాయకత్వంలో పని చేయాలనే కోరిక తీరింది. జగన్ చేసిన లాబీయింగ్ పని చేసింది. ఆమెకు వచ్చే వారం పోస్టింగ్ ఇస్తారని, ఆమెను సిఎంఓలోకి తీసుకుని, మంచి పోస్ట్ ఇస్తారని ప్రచారం జరుగుతుంది. శ్రీలక్ష్మి ఇప్పటికే, సిబిఐ కోర్టులో తన పై వేసిన అభియోగాలు కొట్టేయాలని పిటీషన్ కూడా వేసారు.