news

అన్ని జాగ్రత్తలు తీసుకుంటూ, లాక్ డౌన్ కు పటిష్టంగా సహకరిస్తూ కరోనా పాజిటివ్ లకు దూరంగా ఉంటూ ఊపిరి పీల్చుకుంటున్న కడప జిల్లా ఒక్క సారిగా ఉలికిపడింది. మాములు ఉలికి పాటు కాదు జిల్లా మొత్తాన్ని గడగడలాడించే ఉలికిపాటు ఇది. కరోనా మహమ్మారి కడప గడప తొక్కకుండా తరిమికొట్టేస్థాయిలో పోరు సాగిస్తున్న జిల్లాలో ఒక్కసారిగా 15 మందికి పాజిటివ్ కేసులు నమోదు కావడం ఈ భయానక పరిస్థితికి దారితీసింది. దీంతో జిల్లాలో కరోనా మహమ్మారి తీవ్ర ఆందోళన కలిగిస్తోంది. వీరు రెండువారాల్లో ఎవరెవరిని కలిశారో, ఎందరికి కలిశారో , ఎక్కడ తిరిగారోనన్న ఆందోళన జిల్లాను వణికిస్తోంది. ఇంత వరకు ఒక్క కరోనా కేసుకూడా నమోదు కాకుండా ఉండటంతో ఊపిరి పీల్చుకుంటున్న జిల్లా ఒకేసారి విజృంభించిన కరోనా దాటికి గడగడలాడుతోంది. ఢిల్లీ కి వెళ్ళి వచ్చిన వారిని పోలీసులు రెండు మూడు రోజులుగా గుర్తించి క్వారంటైన్ లో పరీక్షలు చేయించడంతో ఒకేసారి వీరిలో 15 మందికి కరోనా పాజిటిన్లు వచ్చాయి.

వీరిలో బద్వేలు, పులివెందుల, వేంపల్లిలో ఒక్కోక్కరికి పాజిటివ్ లు నమోదు కాగా కడపలో 5మందికి, ప్రొద్దుటూరులో 7 మందికి పాజిటివ్ లు రావడంతో రెండు పట్టణాల్లో ప్రజలు గగుర్పాటుకు గురవుతున్నారు. ఒకేరోజు 15 మందికి రావడంతో ఇంకెంతమందికి పాజిటివ్ వస్తుందోనన్న ఆందోళన వెంటాడుతోంది. వీరు ఎందరిని కలిశారో, ఎక్కడెక్కడ తిరిగారో నన్న ఆందోళన కడప, బద్వేలు, పులివెందుల, వేంపల్లి, ప్రొద్దుటూరు ప్రాంతాల్లో తీవ్ర ఆందోళకు గురిచేస్తోంది. కడప నగరంలోని యర్రముక్కపల్లి, టూటౌన్, అలంఖాన్ పల్లి తదితర ప్రాంతాల్లో కరోనా పాజిటివ్ కేసులు ఉన్న వారు బయట పడటంతో నగరం మొత్తం ఆందోళనకు గురవుతోంది. ఇంత వరకు 30 మందికి పైగా క్వారంటైన్లో ఉన్నట్లు సమాచారం.

ఇక మరో పక్క, గుంటూరు జిల్లా మంగళగిరిలో కరోనా పాజిటివ్ కేసు నమోదుపై అధికారులు ముందస్తు చర్యలు చేపట్టారు. పాజిటివ్ కేసు నమోదైన టిప్పర్ల బజార్ నుంచి అధికారులు మూడు కిలోమీటర్ల పరిధిలో ఉన్న ప్రాంతాన్ని రెడ్ జోన్​గా ప్రకటించారు. మంగళగిరిలో ఉదయం నుంచే తెరిచి ఉన్న నిత్యావసర, కూరగాయల దుకాణాలను మూయించారు. 144 సెక్షన్​ను పక్కాగా అమలు చేస్తున్నారు. పట్టణం మొత్తం హైపో ద్రావకం చల్లుతున్నారు. పోలీసులు మైక్​లో విస్తృతంగా ప్రచారం చేపట్టారు. మంగళగిరి రెడ్​జోన్​లో ఉన్నందున ఎవరూ బయటకు రావద్దని పోలీసులు హెచ్చరించారు. తాడికొండ నియోజకవర్గంలోని మేడికొండూరు మండలం తురకపాలెం రెడ్​జోన్​గా ప్రకటించారు. గ్రామానికి చెందిన ఒకరికి కరోనా పాజిటివ్​ అని తేలడంపై.. అధికారులు ముందు జాగ్రత్తలు తీసుకున్నారు. గ్రామంలో బ్లీచింగ్ చల్లారు. ఇళ్ల నుంచి ఎవరూ బయటకు రావొద్దని హెచ్చరికలు జారీ చేశారు.

ఒక పక్క కరోనా రాష్ట్రంలో, గత రెండు రోజులుగా విలయతాండవం చేస్తుంటే, ఆంధ్రప్రదేశ్ ప్రభుత్వం మాత్రం, అమరావతి మీద నుంచి ఫోకస్ తప్పించటం లేదు. రాజధాని పరధిలో ఇళ్ల స్థలాల కేటాయింపునకు చర్యలు తీసుకోవాల్సిందిగా సీఆర్డీఏను ప్రభుత్వం ఆదేశించింది. హైకోర్టు ఉత్తర్వులకు లోబడి చర్యలు తీసుకోవాలని ఉత్తర్వులు జారీ చేసింది. కృష్ణా, గుంటూరు జిల్లాల్లోని పట్టణ ప్రాంతాల్లో పేదలకు ఇళ్ల స్థలాలు కేటాయించేందుకు ప్రభుత్వ భూములు లేనందున రాజధాని ప్రాంతంలో భూములు ఇవ్వాల్సిందిగా ఆ 2 జిల్లాల కలెక్టర్లు చేసిన అభ్యర్థనను పరిగణనలోకి తీసుకుని చర్యలు చేపట్టాల్సిందిగా పురపాలక శాఖ కార్యదర్శి జె. శ్యామలరావు ఆదేశాలు జారీచేశారు. సుప్రీం, హైకోర్టు మార్గదర్శకాలకు అనుగుణంగా రాజధాని పరిధిలో ఇళ్ల స్థలాల కేటాయింపునకు చర్యలు చేపట్టాలని సీఆర్​డీఏకు ప్రభుత్వం మార్గదర్శకాలు జారీచేసింది. గుంటూరు, కృష్ణా జిల్లాల కలెక్టర్ల అభ్యర్థనలను పరిగణనలోకి తీసుకుని, చర్యలు చేపట్టాలని పురపాలకశాఖ కార్యదర్శి ఆదేశాలు ఇచ్చారు.

సీఆర్​డీఏలోని భూకేటాయింపుల నిబంధనల్లో సడలించాలని సూచించింది. 2017లో జారీ చేసిన అమరావతి భూకేటాయింపుల నిబంధనల్లో భాగంగా 6.5.1 ప్రకారం రెవెన్యూ విభాగాన్ని ఓ దరఖాస్తుదారుగా పరిగణించాలంటూ తాజా ఉత్తర్వుల్లో ప్రభుత్వం పేర్కొంది. పేదలకు ఇళ్లస్థలాల కేటాయించేందుకే రెవెన్యూ శాఖ ఈ పథకాన్ని చేపట్టిందని తెలిపింది. పేదలందరికీ ఇళ్ల పథకాన్ని ప్రత్యేక కేసుగా పరిగణించి సీఆర్డీఏలోని భూకేటాయింపుల నిబంధనల్లో సడలింపు ఇవ్వాల్సిందిగా ప్రభుత్వం సూచించింది. మాస్టర్ ప్లాన్​లోనూ నిబంధనల ప్రకారం అవరమైన సవరణలు పరిశీలించాల్సిందిగా ఆదేశాలిచ్చింది. ఈ చర్యలన్నీ సుప్రీం కోర్టు, హైకోర్టు మార్గదర్శకాలకు అనుగుణంగానే ఉండాలని ఉత్తర్వుల్లో పేర్కొంది.

అమరావతిలో రైతులు ఇచ్చిన భూముల్లో పేదల ఇళ్ల కోసం 1251.51 ఎకరాలను, గతంలో ప్రభుత్వం సిద్దం చేసింది. వేరే ప్రాంతంలోని వారికి, ఇక్కడ భూములు కేటాయించాలని, ప్రభుత్వం అనుకుంది. తాడేపల్లి, దుగ్గిరాల, మంగళగిరి, పెదకాకాని మండలాల్లోని వారికి, అమరావతి పరిధిలో భూములు ఇవ్వాలని అనుకున్నారు. అయితే, దీని పై రాజధాని రైతులు హైకోర్ట్ కు వెళ్లారు. దీని పై విచారణ చేసిన హైకోర్ట్, ప్రభుత్వ నిర్ణయాన్ని తప్పుబట్టింది. అమరావతి నిర్మాణం ఏమి జరగకుండా, ఏమి చెయ్యకుండా ఇక్కడ రైతులు ఇచ్చిన భూమి, ఎలా పంచుతారు అంటూ, ప్రభుత్వం పై సీరియస్ అయ్యింది. ప్రభుత్వం అమరావతిలో పంచాలి అనుకునున్న, జీవోని రద్దు చేస్తూ, హైకోర్ట్, గత నెలలో తీర్పు ఇచ్చిన సంగతి తెలిసిందే.

కరోనాపై పోరులో రాష్ట్రాలు తీసుకుంటున్న చర్యలపై అన్ని రాష్ట్రాల ముఖ్యమంత్రులతో ప్రధాని మోది వీడియో కాన్ఫరెన్స్ నిర్వహించారు. రాష్ట్రంలో కొవిడ్-19 కట్టడి, గడచిన 2 రోజుల్లో కేసుల సంఖ్య పెరిగినందుకు గల కారణాలను సీఎం జగన్ వివరించారు. ప్రధాని మోదీతో జగన్‌ వీడియో కాన్ఫరెన్స్‌లో మాట్లాడారు. రాష్ట్రంలో కరోనా కట్టడికి తీసుకుంటున్న చర్యలను, గడచిన 2 రోజుల్లో కేసుల సంఖ్య పెరగడానికి గల కారణాలను ప్రధానికి వివరించారు. కేసుల్లో 111 మంది జమాత్‌కు వెళ్లినవారు, వారితో కాంటాక్టులో ఉన్నవారేనని పేర్కొన్నారు. కుటుంబం వారీగా చేస్తున్న సర్వే అంశాలను చర్చించారు. ఏ మాత్రం అనుమానం వచ్చినా, క్వారంటైన్, ఐసోలేషన్‌కు తరలించి వైద్య సదుపాయాలు అందిస్తున్నట్లు తెలిపారు. వైద్య పరికరాలను తగిన సంఖ్యలో అందించాలని కోరారు. రాష్ట్ర ఆదాయం బాగా దెబ్బతిందని తగిన విధంగా ఆదుకోవాలని ప్రధానికి, ముఖ్యమంత్రి విజ్ఞప్తి చేశారు. ఇక ప్రధాని మాట్లాడుతూ, రాబోయే రోజుల్లో టెస్టులు నిర్వహించడం సహా బాధితుల్ని గుర్తించడం, ఐసోలేషన్​, క్వారంటైన్​పైనే ప్రధానంగా దృష్టి సారించాలని సూచించారు.

9 రోజులుగా దేశంలో లాక్​డౌన్​ కొనసాగుతున్నప్పటికీ, కరోనా కేసులు పెరుగుతున్న తరుణంలో ఆయా రాష్ట్రాల్లో ప్రస్తుత పరిస్థితులపైనా ఆరా తీశారు. కరోనా నియంత్రణకు రాష్ట్రాలన్నీ ఏకమై పోరాడటం ప్రశంసనీయమన్నారు మోదీ. లాక్​డౌన్​ ముగిసిన తర్వాత తీసుకోవాల్సిన చర్యలపైనా సీఎంలతో చర్చించారు. కేంద్ర, రాష్ట్ర ప్రభుత్వాలు సంయుక్తంగా పరిష్కార వ్యూహాన్ని రూపొందించుకోవాలన్నారు. కొవిడ్​-19 బాధితుల కోసం, ప్రత్యేకంగా ఆసుపత్రుల ఏర్పాటు అంశాన్ని పరిశీలించాలని కోరారు ప్రధాని. అత్యవసర వైద్య ఉత్పత్తి పరికరాల సరఫరా, ఔషధాల తయారీకి అవసరమయ్యే ముడిపదార్థాల లభ్యతకు అవసరమైన చర్యలు చేపట్టాలని నిర్దేశించారు. చివరగా కరోనా నియంత్రణ కోసం కృషి చేస్తున్న అందరికీ ప్రధాని కృతజ్ఞతలు తెలిపారు.

సంక్లిష్ట సమయంలో ప్రధాని తన నాయకత్వ ప్రతిభను చూపారని మోదీని కొనియాడారు ముఖ్యమంత్రులు. దిల్లీ మర్కజ్​ వెళ్లొచ్చిన వారి వివరాలు సేకరించినట్లు తెలిపారు. ఇంకా ఆయా రాష్ట్రాల్లో తీసుకుంటున్న చర్యలను మోదీకి వివరించారు. కేంద్ర మంత్రులు రాజ్​నాథ్​ సింగ్​, అమిత్​ షా కూడా ఈ దూరదృశ్య సమీక్షలో పాల్గొన్నారు. కరోనా సంక్షోభంపై రెండు వారాల వ్యవధిలో ముఖ్యమంత్రులతో ప్రధాని వీడియో కాన్ఫరెన్స్ నిర్వహించడం ఇది రెండోసారి. మార్చి 20న తొలిసారి సీఎంలతో సమావేశమైన మోదీ, 24న దేశవ్యాప్తంగా లాక్​డౌన్​ విధిస్తూ నిర్ణయం తీసుకున్నారు. అయితే ఇది ఇలా ఉంటే, ఏప్రిల్ 14 తో, లాక్ డౌన్ ముగుస్తు ఉండటంతో, ఆ తరువాత, ఒకేసారి కాకుండా, విడతల వారీగా లాక్ డౌన్ ఎత్తి వేసే అవకాశం ఉందని, ప్రధాని చెప్పినట్టు తెలుస్తుంది. అరుణాచల్‌ప్రదేశ్ ముఖ్యమంత్రి పెమా ఖండు కూడా ఇదే విషయంతో ట్వీట్ చేసారు. లాక్ డౌన్ తరువాత కూడా తగిన జాగ్రత్తలు తీసుకోవాలని, ప్రధాని కోరారని ఆయన ట్వీట్ చేసారు.