news

దూకుడు నిర్ణయాలతో, వాటి పర్యావసానాలు ఆలోచించకుండా, ఏది తోస్తే అది చేస్తూ, ఎవరి మాట వినకుండా, స్పీడ్ గా వెళ్తున్న జగన్ కు, ఎప్పటికప్పుడు హైకోర్ట్ బ్రేకులు వేస్తూనే ఉంది. ప్రతి రోజు, ఏదో ఒక విషయంలో, ఏపి ప్రభుత్వానికి హైకోర్ట్ చేతిలో ఎదురు దెబ్బలు, మొట్టికాయలు పడుతూనే ఉన్నాయి. తమకు మంద బలం ఉంది, తాము చెప్పిందే వేదం అంటూ, రూల్స్ పాటించుకుండా వెళ్తున్న జగన్ ప్రభుత్వానికి ఈ రోజు ఇప్పటి వరకు, రెండు ఎదురు దెబ్బలు తగిలాయి. మొదటిది, వైజాగ్ లో చంద్రబాబుని, 151 సెక్షన్ కింద నోటీస్ ఇచ్చి, అరెస్ట్ చెయ్యటం పై, ఈ రోజు విచారణలో, ఏకంగా డీజీపీనే వచ్చి సమాధానం చెప్పమని కోరటం. ఇంకోటి స్థానిక సంస్థల ఎన్నికల్లో రిజర్వేషన్‌ పై. జగన్ ప్రభుత్వం ఎంతో గొప్పగా చెప్పుకుంటూ, స్థానిక సంస్థల ఎన్నికల్లో 59.85 శాతం రిజర్వేషన్ అంటూ నిర్ణయం తీసుకుంది. అయితే ఇది కోర్ట్ లు కొట్టేస్తాయి అని అందరికీ తెలిసిందే. అయినా సరే, జగన్ ప్రభుత్వం, ఎందుకు ముందుకు వెళ్లిందో ఎవరికీ అర్ధం కాని పరిస్థితి.

ఈ రోజు స్థానిక సంస్థల ఎన్నికల్లో రిజర్వేషన్‌ పై హైకోర్టులో విచారణ జరిపింది. ప్రభుత్వం ఇచ్చిన 59.85 శాతం రిజర్వేషన్ నిర్ణయాన్ని హైకోర్టు కొట్టేసింది. సుప్రీంకోర్టు తీర్పునకు విరుద్ధంగా 50 శాతానికి పైగా రిజర్వేషన్ చెల్లదన్న కోర్టు...నెలలోగా బీసీ రిజర్వేషన్లు ఖరారు చేయాలని తెలిపింది. రిజర్వేషన్లు 50 శాతం దాటడం సుప్రీం తీర్పునకు విరుద్ధమని హైకోర్టు స్పష్టం చేసింది. 4 వారాల తరువాత ఎన్నికల ప్రక్రియను కొనసాగించాలని హైకోర్టు ఆదేశించింది. స్థానిక సంస్థల పై, ప్రభుత్వం ఇచ్చిన జీవోని ప్రభుత్వం రద్దు చేసింది. హైకోర్ట్ ఆదేశాలు నేపధ్యంలో, ఎలా ముందుకు వెళ్ళాలి అనేదాని పై, ప్రభుత్వం మల్లగుల్లాలు పడుతుంది. సుప్రీం కోర్ట్ కు వెళ్తే ఎలా ఉంటుంది అనే దాని పై చర్చలు జరుపుతున్నారు.

ఇక స్థానిక సంస్థల ఎన్నికల్లో బలహీన వర్గాల రిజర్వేషన్లు తగ్గిస్తే సహించేది లేదని టీడీఎల్పీ ఉపనేత అచ్చెన్నాయుడు అన్నారు. అవసరమైతే ప్రభుత్వం సుప్రీంకోర్టుకు వెళ్లాలని సూచించారు. తొమ్మిది నెలల పాలనలో బలహీన వర్గాల కోసం వైకాపా ప్రభుత్వం ఒక్క రూపాయి ఖర్చు పెట్టలేదని అచ్చెన్నాయుడు మండిపడ్డారు. బీసీ పథకాల్లో కోత విధిస్తున్నారని విమర్శించారు. స్థానిక సంస్థల ఎన్నికల్లోనూ బీసీల రిజర్వేషన్లను తగ్గించే ప్రయత్నం చేస్తోందని ఆరోపించారు. బీసీ రిజర్వేషన్లకు వ్యతిరేకంగా తెదేపా కేసు వేసిందంటూ మంత్రి బొత్స తప్పుడు ప్రచారం చేసున్నారని ఆగ్రహం వ్యక్తం చేశారు. తెదేపాకు అండగా ఉన్నది బీసీలేనన్న విషయం అందరికీ తెలిసిందేనని చెప్పారు. న్యాయస్థానం చెప్పిందని బీసీల రిజర్వేషన్ తగ్గిస్తే ఒప్పుకునేది లేదని హెచ్చరించారు.

మూలిగే నక్కపై తాటిపండు పడిన చందంగా ఇప్పటికే దాదాపు 5వేల కోట్ల రూపాయల మేర పీకల్లోతు నష్టాలతో ఉన్న ఆర్టీసీ పై అదనపు భారం పడింది. ఇటీవలే నామమాత్రంగా టిక్కెట్ చార్జీ పెంచినప్పటికీ పెరిగే వడ్డీల భారంతో నష్టాలు కొనసాగుతూనే ఉన్నాయి. ఈనేపథ్యంలో రాష్ట్ర ప్రభుత్వం ఒక్క సారిగా డీజిల్ పై లీటరు రూ. 1.07 పైసలు వ్యాట్ చార్జీ పెంచింది. రాష్ట్రంలో అత్యధి కంగా డీజిల్ వినియోగంలో మొదటి నుంచి ఏపీ ఎస్ ఆర్టీసీ అగ్రస్థానంలో కొనసాగుతోంది. రాష్ట్ర వ్యాప్తంగా 12వేల బస్సులు ఉండగా నెలకు సగటున 30కోట్ల లీటర్ల డీజిల్ ని వినియోగిస్తున్నాయి. తాజాగా లీటర్‌కు రూ. 1.07 పైసలు పెరిగిందంటే నెలకు రూ. 32 కోట్లు, సంవత్సరానికి దాదాపు రూ. 400 కోట్లు అదనపు భారం పడినట్లయింది. ఇప్ప టికే రాష్ట్రంలో ప్రభుత్వం 2 రూపాయలు అదనంగా అంటే 22.25 శాతంపై రూ. 24.25 పైసలు మేర వ్యాట్ వసూలు చేయటం ప్రారంభించింది. అలాగే పెట్రోలు లీటర్ 31శాతంపై రెండు రూపాయలు అదనంగా మొత్తం రూ.38 వ్యాట్ వసూలు చేయటం ఆరంభించింది.

అయితే పొరుగునున్న తెలంగాణ ప్రభుత్వం రెండు రూపాయలు తగ్గించడంతో వాహన యజమానులు సరిహద్దులోని తెలంగాణ పెట్రోలు బంక్ లతో ఫుల్ ట్యాంకు నింపుకోవటం ప్రారంభించారు. తాజాగా డీజిలపై రూ. 1.07 పైసలు, పెట్రోల్ పై 76 పైసలు వడ్డన జరిగింది. గతంలో డీజిల్ ధర పెరిగినప్పుడల్లా ఆర్టీసీ కార్మిక సంఘాలు రోడ్డెక్కి ఆందోళన చేసేవి. అయితే ప్రభుత్వంలో విలీనం కావటం, పైగా ఆర్టీసీ కార్మికులకు ప్రభుత్వ ఉద్యోగులతో సమానంగా సర్వీసు రూల్స్ వర్తించడంతో ఏఒక్కరూ రోడ్డెక్కే వీలులేదు. దీంతో పెరిగిన డీజిల్ ధరపై ఆందోళన చేసేవారు కనిపించడం లేదు. ఇక కృష్ణాజిల్లానే అధికంగా ఆర్టీసీ బస్సులున్నాయి. జిల్లాలో 1432 బస్సులున్నాయి. ప్రతిరోజు ఈ బస్సులు ఐదు లక్షల కి.మీ చొప్పున నడుస్తాయి. పెరిగిన 1.07 పైసల వ్యా ట్ నెలకు కోటీ 60లక్షలు చొప్పున సాలీనా రూ. 19.21 కోట్ల మేర భారం పడనుంది.

జిల్లాలో ఇతర వినియోగ దారులందరిపై కలిసి రూ. 117 కోట్ల మేర భారం పడింది. జిల్లావ్యాప్తంగా 250 పెట్రోలు, డీజిల్ బంకులున్నాయి. ప్రతి బంకులో సగటున రోజుకు 3వేల లీటర్ల పెట్రోలు, 8వేల లీటర్ల డీజిల్ విని యోగం జరుగుతుంది. పెరిగిన చార్జీలను మొత్తం 250 బంకులపై రోజుకు పెట్రోలు వినియోగదారులు రూ. 5.70 లక్షల లెక్కన నెలకు రూ. 1.71కోట్లు, ఏడాదికి రూ. 20.52 కోట్లు భారం పడుతుంది. అదే డీజిల్ వినియోగదానికి వస్తే సగటున బంకుల్లో రోజుకు 8వేల లీటర్ల వినియోగం జరుగుతుంది. దీనివల్ల రోజుకు రూ. 21.40 లక్షల చొప్పున నెలకు రూ. 6.42 కోట్లు సాలీనా రూ. 77.10 కోట్ల భారం పడుతోంది. ఒక్క నెల రోజుల్లో, రెండు సార్లు డీజిల్ రెట్లు పెంచటంతో, ఆర్టీసీ షాక్ అయ్యింది. మొదటి సారి డీజిల్ రేట్లు పెంచాగానే ఆర్టీసీ చార్జీలు పెంచారు. అయితే, ఇప్పుడ నెల రోజుల్లోనే రెండో సారి పెంచటంతో, ఆర్టీసీకి ఈ నష్టం ఎలా బర్తీ చేసుకోవాలో అర్ధం కావటం లేదు.

విశాఖపట్నంలో చంద్రబాబుని వైసీపీ నేతలు అడ్డుకోవటం, ఎయిర్ పోర్ట్ లో వీరంగం చెయ్యటం, అలాగే అయుదు గంటలు పాటు చంద్రబాబుని కదలనియ్యకుండా చెయ్యటం, చివరకు వైసీపీ వారిని ఏమి చెయ్యకుండా, చంద్రబాబుకు 151 సెక్షన్ కింద నోటీసు ఇచ్చి, చంద్రబాబుని పోలీసులు అరెస్ట్ చెయ్యటం తెలిసిందే. అయితే, ఈ విషయంలో మాత్రం అందరూ షాక్ తిన్నారు. ఎందుకంటే, చంద్రబాబు పర్మిషన్ తీసుకుని, యాత్రకు వచ్చారు. పోలీసులు షరతులతో కూడిన అనుమతి ఇస్తే, దానికి తగ్గట్టే చంద్రబాబు వచ్చారు. అయితే అంతకు ముందు రోజు, చంద్రబాబుని అడ్డుకుంటాం అని వైసీపీ మంత్రులే చెప్పినా, దాని కోసం ముందే ప్లాన్ చేసినా, పోలీసులు మాత్రం వారిని అడ్డుకోలేదు. ఏకంగా 500 నుంచి వెయ్యి మంది వైసీపీ కార్యకర్తలను ఏకంగా విశాఖ ఇంటర్నేషనల్ ఎయిర్ పోర్ట్ లోకే అనుమతి ఇచ్చారు. పోనీ చంద్రబాబు వచ్చిన తరువాత వారిని క్లియర్ చేసారా అంటే అదీ లేదు. ఇంతా జరిగి, చివరకు చంద్రబాబునే అరెస్ట్ చేసి, వైజాగ్ నుంచి హైదరాబాద్ పంపించారు.

అయితే, దీని పై తెలుగుదేశం పార్టీ సీరియస్ అయ్యింది. విశాఖ పోలీసులు తీరు, అదే విధంగా ప్రభుత్వం తీరు పై, హైకోర్ట్ లో లంచ్ మోషన్ పిటీషన్ వేసారు. అయితే రెండు రోజుల క్రితం ఈ పిటీషన్ పై విచారణ చేపట్టిన కోర్ట్, ఆ రోజే తీవ్ర వ్యాఖ్యలు చేసింది. ఎక్కడైనా అనుమతి ఇచ్చి, వచ్చిన వ్యక్తిని అరెస్ట్ చెయ్యటం ఏమిటి ? గొడవ చేసిన వారిని కదా అరెస్ట్ చెయ్యల్సింది అంటూ కోర్ట్ ప్రశ్నించింది. అసలు చంద్రబాబుకి 151 నోటీస్ ఇచ్చి, ఆయన్ను ఎందుకు అరెస్ట్ చెయ్యాల్సి వచ్చింది అంటూ, కౌంటర్ వెయ్యాలి అంటూ, పోలీసులను హైకోర్ట్ ఆదేశిస్తూ, విశాఖ సిపీకి, రాష్ట్ర డీజీపీకి నోటీసులు ఇచ్చింది హైకోర్ట్. అయితే, కోర్ట్ ఆదేశాలు ప్రకారం, ఈ రోజు పోలీసులు, కౌంటర్ వేసారు. ఈ రోజు ఈ కేసు పై విచారణ జరిగింది.

ఈ విచారణ పై, టిడిపి తరుపు న్యాయవాది, కృష్ణారెడ్డి మాట్లాడుతూ, ఈనెల 12న డీజీపీ గౌతమ్‌ సవాంగ్‌ కోర్టుకు హాజరుకావాలని, చంద్రబాబుని ఎందుకు అరెస్ట్ చెయ్యాల్సి వచ్చిందో వివరణ ఇవ్వాలి అంటూ, కోర్ట్ ఆదేశాలు ఇచ్చినట్టు చెప్పారు. ఈ కేసు పై తదుపరి విచారణను, ఈనెల 12కు వాయిదా వేసిందని చెప్పారు. పోలీసులు పర్మిషన్ ఇస్తే చంద్రబాబు వచ్చారని, అలాంటిది, చంద్రబాబుని ఎందుకు అరెస్ట్ చేసారు, గుడ్లు, రాళ్ళు వేసిన వారిని ఎందుకు నివారించలేదు అంటూ కోర్ట్ అడిగినట్టు న్యాయవాది చెప్పారు. ఈ రోజు పోలీసులు వేసిన కౌంటర్ తో, కోర్ట్ సంతృప్తి చెందలేదు కాబట్టే, డీజీపీని కోర్ట్ కు వచ్చి హాజరు అవ్వమని, వివరణ ఇవ్వమని కోర్ట్ చెప్పినట్టు, న్యాయవాది, కృష్ణారెడ్డి అన్నారు.