news

వైసీపీలో ఫైర్ బ్రాండ్ గా పేరున్న రోజా, ఈ మధ్య సైలెంట్ అయ్యారు. అప్పుడప్పుడు మీడియా ముందుకు వచ్చి, చంద్రబాబుని, లోకేష్ ని తిట్టి వెళ్ళటం మినహా పెద్దగా ఆక్టివ్ గా ఉండటం లేదనే చెప్పాలి. ఇటీవల రోజుకి సొంత జిల్లాలో, సొంత పార్టీ నుంచే పోరు ఎక్కువ అయ్యింది. సొంత పార్టీ క్యాడర్ నుంచి కూడా బహిరంగంగా వ్యతిరేకత రావటం ఒకటి రెండు సందర్భాల్లో మీడియాలో కూడా వచ్చింది. ఇక మరో పక్క ఇద్దరు మంత్రులు నుంచి కూడా రోజాకు సహకారం లేదనే ప్రచారం ఉంది. అయితే ఇవన్నీ పక్కన పెడితే, జగన్ దగ్గర తనకు పలుకుబడి ఉందని, ఏదైనా అక్కడే తెల్చుకుంటా అంటూ, వ్యతిరేక వర్గానికి చెక్ పెడతాను అంటూ రోజా తన సన్నిహితుల దగ్గర చెప్తూ ఉంటారని ప్రచారంలో ఉంది. అయితే ఇప్పుడు తాజాగా అధిష్టానం వైపు నుంచి కూడా రోజాకు షాక్ తగిలింది. దీనికి కారణం ఇటీవల ప్రకటించిన 56 బీసి కులాల కార్పొరేషన్ లు వాటి కూర్పు. రోజాకు తన నియోజకవర్గంలో, కే.శాంతి అనే వైసిపీ నేత నుంచి వ్యతిరేకత వస్తుంది. ఒకానొక సందర్భంలో బహిరంగంగా కూడా మాటలు అనుకునే స్థాయికి వచ్చారు. అయితే ఇప్పుడు శాంతి అనే ఆవిడకు ఈడిగ కార్పొరేషన్ చైర్మన్ గా నియమించటం, రోజా వర్గానికి మింగుడు పడటం లేదు. ఇంకా ఇబ్బంది పెట్టే అంశం, ఈ చైర్మెన్ లు అందరికీ క్యాబినెట్ ర్యాంక్ ఉండటం. రోజాకు కూడా ఏపీఐఐఐసి చైర్మెన్ గా క్యాబినెట్ ర్యాంక్ ఉంటే, ఇప్పుడు తన వ్యతిరేక వర్గం అయిన శాంతికి కూడా క్యాబినెట్ ర్యాంక్ తో కూడిన పదవి రావటంతో, షాక్ తిన్నారు.

గతంలో శాంతి అనే వైసీపీ నాయకురాలు, నగరి మునిసిపల్ చైర్ పర్సన్ గా పని చేసారు. ఆమె భర్త కుమార్ కూడా, మునిసిపల్ చైర్పర్సన్ గా పని చేసారు. వీరికి నగిరి నియోజకవర్గం పై పట్టు ఉంది. అదీ కాక నియోజకవర్గం బీసిలు, ఎస్సీల డామినేషన్ ఎక్కువ. గతంలో వీరు, రోజాతో కలిసి పని చేసేయిన్ వారే. ఎలక్షన్ ప్రచారంలో, రోజా వీరి ఇంట్లో హాల్ట్ తీసుకునేంత చనువు కూడా ఉంది. అయితే అధికారంలోకి వచ్చిన తరువాత, ఇరు వర్గాలకు గ్యాప్ వచ్చింది. కారణాలు బయటకు తెలియకపోయినా, ఇరు వర్గాల మధ్య కోల్డ్ వార్ట్ నడుస్తుంది. దీంతో ఇరు వైపులా, ఎవరి ఎత్తులు వారు వేస్తూ రాజకీయం చేస్తున్నారు. ఇక మరో పక్క వీరికి, జిల్లాలోని ఇద్దరు మంత్రులు నుంచి సపోర్ట్ ఉండటం, అలాగే ఇరువురు రోజాకి వ్యతిరేకంగా పని చేస్తున్నారనే ప్రచారం ఎప్పటి నుంచో ఉంది. ఈ నేపధ్యంలో, మంత్రుల అండదండలతోనే, శాంతికి పదవి వచ్చిందని, రోజా వర్గం భావిస్తుంది. నియోజకవర్గ ఎమ్మెల్యే అయిన రోజా వ్యతిరేక వర్గం అయిన శాంతికి పదవి రావటం రోజాకు షాక్ అనే రాజకీయ విశ్లేషకులు భావిస్తున్నారు. రోజా దూకుడుకు బ్రేక్ వేసే క్రమంలోనే అధిష్టానం ఈ నిర్ణయం తీసుకుని ఉండవచ్చని భావిస్తున్నారు.

ఒక్కో ప్రభుత్వానికి, ఒక్కో పాలసీ ఉంటుంది. అందులో ఎటువంటి తప్పు లేదు. కానీ అభివృద్ధి, సంక్షేమం సమంగా జరిగినప్పుడే ఆ రాష్ట్రం ముందుకు వెళ్తుంది. ఈ మౌళిక సూత్రానికి లోబడే, పరిపాలన సాగిస్తూ ఉంటారు. అయితే గతంలో ఉన్న తెలుగుదేశం ప్రభుత్వం మౌళిక సదుపాయాలు, పెట్టుబడులు పై ఎక్కువ ఫోకస్ పెట్టింది. అదే సమయంలో సంక్షేమం కూడా ఎక్కడా తక్కువ చేయలేదు. రెండు సమానంగా జరిగాయి. అనంతపురం జిల్లా స్వరూపం మార్చేసే కియా లాంటి కంపెనీ వచ్చింది. ఇలా చెప్పుకొంటూ పొతే ఎన్నో ఉంటాయి. కానీ తరువాత వచ్చిన జగన్ ప్రభుత్వం, పెట్టుబడులు పై పెద్దగా శ్రద్ద పెట్టటం లేదని అంకెలు చూస్తే అర్ధం అవుతున్నాయి. ఉచితాలు తెచ్చి, ప్రజలకు పంచటమే సరిపోతుంది. ఆ ఉచితాలు ఇవ్వాలి అంటే ఆదాయం ఉండాలి కదా ? కానీ అప్పులు చేసి మరీ ఉచితాలు పంచుతున్నారు. పోనీ ఆదాయం పెంచే మార్గాలు చూస్తున్నారా అంటే అదీ లేదు. గతంలో ఆంధ్రప్రదేశ్ రాష్ట్రము విదేశీ పెట్టుబడులు తేవటంలో మహరాష్ట్ర, కర్ణాటక, గుజరాత్ తో పోటీ పాడేది. ఒక్క కియానే రూ.13 వేల కోట్లు పెట్టుబడి. ఇక ఈ ప్రభుత్వం వచ్చిన తరువాత, అక్టోబర్ 2019 నుంచి జూన్ 2020 వరకు లెక్కలు తీస్తే, మనకు వచ్చిన విదేశీ పెట్టుబడులు 1652.31 కోట్లు. గతంలో దేశంలో మూడు నాలుగు స్థానంలో ఉండే మన రాష్ట్రము, ఇప్పుడు ఉత్తరప్రదేశ్ కంటే తక్కువగా 12 వ స్థానంలో ఉంది. పక్కన ఉన్న తెలంగాణా 9044.7 కోట్ల విదేశీ పెట్టుబడి తేగలిగింది. ఆంధ్రప్రదేశ్ రాష్ట్రం ఇప్పటికైనా, తమ ప్రాధాన్యాలు మార్చుకోక పొతే, రాబోయే రోజుల్లో తీవ్ర సంక్షోభం ఎదుర్కునే పరిస్థితి వస్తుంది. పాలకులు గ్రహించాలని కోరుకుందాం.

విపత్తులు అనేవి సర్వ సహజం. ఏ రాష్ట్రానికైనా, ఏ ప్రాంతానికైనా అది తప్పదు. కానీ ఆ విపత్తులు చూసి నవ్వితే, ఏదో ఒక రోజు మనకీ అదే పరిస్థితి వస్తుందని గ్రహించాలి. సరిగ్గా ఇప్పుడు ఇదే పరిస్థితి గుర్తుకు తెచ్చుకుంటున్నారు. ఆంధ్రప్రదేశ్ ప్రజలు, మరీ ముఖ్యంగా అమరావతి వాసులు. కేసీఆర్ తెలంగాణా ముఖ్యమంత్రి అయ్యి 7 ఏళ్ళు అవుతుంది. హైదరాబాద్ లో ఇప్పటికీ చిన్న వర్షం పడినా, పరిస్థితి ఎలా ఉంటుందో చూస్తున్నాం. అలాంటిది రెండు మూడు రోజులు వర్షం అయితే చెప్పే పనే లేదు. ఇప్పుడు హైదరాబాద్ అదే పరిస్థతి ఎదుర్కుంటుంది. విశ్వనగరం కాస్త, విశ్వ నరకం అయ్యింది. చాలా కాలనీలు వారం రోజులకు పైగా వరదలోనే ఉన్నాయి. సరిగ్గా నీటి పారుదల లేక, ఈ పరిస్థితి. ప్రతి ఏడు ఇదే పరిస్థితి. కాకపొతే ఈ ఏడాది మరి కొంచెం ఎక్కువ. సాటి తెలుగు రాష్ట్రం, అందులో ఆంధ్రప్రదేశ్ లో చాలా కుటుంబాలకు హైదరాబాద్ తో అనుభంధం ఉంటుంది కాబట్టి, ఈ పరిణామాలు బాధ వేస్తున్నాయి. హైదరాబాద్ త్వరగా కోలుకోవలాని అందరూ కోరుకుంటున్నారు. అయితే ఈ సందర్భంలోనే కేసీఆర్, కేటీఆర్ గేలి చేసిన మాటలు సోషల్ మీడియాలో వైరల్ అవుతున్నాయి. వైజాగ్ కి హుద్ హూద్ వచ్చిన సమయంలో, కేటీఆర్ మాట్లాడుతూ, హైదరాబాద్ కు అలాంటి పరిస్థితి లేదని, ఐటి కంపెనీలకు ఇక్కడే సేఫ్టీ అని ఒక ప్రకటన చేసారు. ఇక కేసీఆర్ అయితే ఆంధ్రప్రదేశ్ రాష్ట్రాన్ని థర్డ్ క్లాస్ రాష్ట్రము అని, అమరావతిని డెడ్ ఇన్వెస్ట్మెంట్ అంటూ హేళన చేసిన మాటలు ఇప్పుడు గుర్తుతెచ్చుకుంటున్నారు. ఇంత పెద్ద వరద వచ్చినా అమరావతి మునగలేదని, గుర్తు చేసుకుంటూ, ఇలాంటి పెద్ద పెద్ద నాయకులు ఒక ప్రాంతాన్ని తక్కవ చేసి మాట్లాడాలని, లేకపోతే, కర్మ సిద్ధాంతం తన పని తాను చేసుకుపోతుందని గుర్తు చేస్తున్నారు.