news

తెలుగుదేశం పార్టీ నేత, మాజీ మంత్రి అచ్చెన్నాయుడు ఆరోగ్యం బాగోకపోయినా, ఆయనకు వెంటవెంటనే, రెండు ఆపరేషన్లు జరిగినా, ప్రభుత్వం ఆయన్ను హాస్పిటల్ నుంచి హుటాహుటిన డిశ్చార్జ్ చేసి, జైలులో పెట్టటం పై, అచ్చెన్నాయుడు హైకోర్టులో పిటీషన్ దాఖలు చేసిన సంగతి తెలిసిందే. తన ఆరోగ్యం బాగోలేదని, ప్రైవేటు హాస్పిటల్ లో చికిత్స చేయించుకుంటానికి, అవకాసం ఇవ్వాలని, ఖర్చు మొత్తం తామే భరిస్తాం అంటూ, హైకోర్టులో పిటీషన్ దాఖలు చేసారు. దీని పై, గత వారం వాదనలు జరిగాయి. దీని పై, ఈ రోజు హైకోర్టు తీర్పు ఇచ్చింది. అచ్చెన్నాయుడుకి మెరుగైన వైద్యం కోసం, ప్రైవేటు హాస్పిటల్ కు తరలించాలని, ఈ రోజు హైకోర్ట్ ఆదేశాలు ఇచ్చింది. అచ్చెన్నాయుడుని ఏ హాస్పిటల్ కు తరలించాలని అనుకుంటున్నారు అంటూ, హైకోర్టు అచ్చెన్నాయుడు తరుపు న్యాయవాదిని అడిగింది. అచ్చెన్నాయుడు తరుపు న్యాయవాది, ఈ సందర్భంగా, విజయవాడలో మూడు హాస్పిటల్ పేర్లు, గుంటూరులో రెండు హాస్పిటల్ పేర్లు కోర్టుకు చెప్పారు.

అయితే ఈ సందర్భంలో, ప్రభుత్వ తరుపు న్యాయవాది అభ్యంతరం చెప్పారు. అచ్చెన్నాయుడుని ఏ హాస్పిటల్ కు తరలించాలి, అసలు తరలించాలా లేదా అనే విషయం పై, గుంటూరు జీజీహెచ్ సూపర్ఇంటెన్దేంట్ ఆదేశాలు ఇస్తారని, కోర్టుకు చెప్పారు. అయితే ఈ దశలో కోర్టు జోక్యం చేసుకుని, ఆదేశాలు ఇచ్చింది. గుంటూరులోని రమేష్ హాస్పిటల్ కు తరలించాలని కోర్టు ఆదేశాలు ఇచ్చింది. దీని పై అతి త్వరలోనే ఉత్తర్వులు వచ్చే అవకాసం ఉంది. హైకోర్టు నుంచి ఉత్తర్వులు రాగానే, విజయవాడలోని జిల్లా జైలు పోలీసులకు చూపించి, ఆయన్ను హాస్పిటల్ కు తరలించే అవకాసం ఉంది. ఈ రోజు సాయంత్రం లోపు, ఆయన్ను హాస్పిటల్ కు తరలిస్తారు. ఇక మరో పక్క, అచ్చెన్నాయుడు బెయిల్ పిటీషన్ కూడా, హైకోర్టు ముందు పెండింగ్ లో ఉంది.

ఆంధ్రప్రదేశ్ శాసనసభ స్పీకర్ తమ్మినేని సీతారం, ఇటీవల, న్యాయ వ్యవస్థను ఉద్దేశిస్తూ చేసిన వ్యాఖ్యల పై, హైకోర్టులో పిల్ దాఖలు అయ్యింది. అయితే ఈ పిటీషన్ వేసింది బీజేపీ కావటం గమనార్హం. మీడియాలో ఎక్కువగా కనిపించే, బీజేవైఏం అధ్యక్షుడు రమేష్ నాయుడు ఈ ప్రజా ప్రయోజన వ్యాజ్యం దాఖలు చేసారు. వ్యవస్థల పై సామాన్యులకు విశ్వాసం సన్నగిల్లేలా స్పీకర్ మాట్లాడారని, రమేష్ నాయుడు అభ్యంతరం తెలిపారు. ఈ నెల రెండవ తేదీన , తిరుమలలో తమ్మినేని మాట్లాడిన అంశాలను కోర్టు దృష్టికి తెచ్చారు. పరిపాలనలో, పాలసీలలో కోర్టులు జోక్యం చేసుకుంటున్నాయని, ఇలాగైతే మేము ఎందుకు అంటూ తమ్మినేని మాట్లాడిన వ్యాఖ్యలను ఆక్షేపించారు. ప్రజాస్వామ్యంలో, మూడు స్థంబాలలలో ఒకటైన న్యాయ వ్యవస్థ పై రాజ్యాంగం స్పష్టంగా చెప్పిందని, వ్యవస్థల మధ్య, స్పష్టమైన విభజన రేఖ ఉందని, అలాగే చట్టాలు, వాటి అమలు తీరు విషయంలో, జోక్యం చేసుకునే అధికారం రాజ్యాంగమే, న్యాయ వ్యవస్థకు ఇచ్చిందని పేర్కొన్నారు.

శాసన, ఎక్జిక్యూటివ్ తీసుకునే నిర్ణయాలను, సమీక్షించే అధికారం కోర్టులకు ఉన్నాయని అన్నారు. సామాన్యుడికి న్యాయ వ్యవస్థ పై నమ్మకం ఉండేలా, ఆర్టికల్ 129, 215 ప్రకారం, తమ్మినేని సీతారం చేసిన వ్యాఖ్యల పై కోర్టు ధిక్కరణ కింద పరిగణించాలని అన్నారు. స్పీకర్ వ్యాఖ్యలు రాజ్యంగ స్పూర్తికి విరుద్ధంగా ఉన్నాయని, ప్రజలు అయినా, స్పీకర్ అయినా, చట్ట విరుద్ధంగా ప్రవర్తిస్తే, అవి చక్కదిద్దే హక్కు, రాజ్యాంగం కోర్టులకు కట్టబెట్టిందని అన్నారు. స్పీకర్ తమ్మినేని వ్యాఖ్యలు ఒక దుష్ట సంప్రదాయానికి, నాంది పలికేలా ఉన్నాయి కాబట్టే, తాను కోర్టు వద్దకు రావాల్సి వచ్చిందని అన్నారు. అయితే బీజేపీ ఈ విషయంలో ఎంటర్ అవ్వటం పై, రాజకీయంగా ఆసక్తి రేపుతుంది. బీజేపీ ఏపిలో తన ఆట మొదలు పెట్టిందా అనే విషయం పై చర్చ జరుగుతుంది. 108 స్కాం బయట పెట్టిన దగ్గర నుంచి, బీజేపీ రోజు రోజుకీ వైసీపీ పై విమర్శల దాడి పెంచుతుంది.

ఆంధ్రప్రదేశ్ లో బీజేపీ పాత్ర పై ప్రముఖ న్యాయవాది జంధ్యాల రవి శంకర్ చేసిన ట్వీట్ ఇప్పుడు ఆసక్తికరంగా మారింది. ఆంధ్రప్రదేశ్ లో ప్రజాస్వామ్య పరిరక్షణకు బీజేపీ నడుం కడుతుందా, రాజ్యాంగ పరిరక్షణకు ముందుకు వస్తుందా, ప్రజల్లో గూడు కట్టుకున్న అసహనాన్ని తొలగించేందుకు బీజేపీ ముందుకు వస్తుందా అంటూ, ట్వీట్ చేసారు. ఈ ట్వీట్ల పై, ఇప్పుడు ఏపిలో చర్చా జరుగుతుంది. అయితే ఈ ట్వీట్లు చెయ్యటం వెనుక, ఏ కారణం ఉంది అనేది క్లారిటీ రావటం లేదు. వరుసగా కోర్టుల్లో రాష్ట్ర ప్రభుత్వం తీసుకుంటున్న నిర్ణయాల పై ఎదురు దెబ్బలు తగులుతున్నాయి. అలాగే రాష్ట్రంలో అన్ని వ్యవస్థల పై ప్రభుత్వం దాడి చేస్తుంది అనే అభిప్రాయం వ్యక్తం అవుతుంది. ప్రభుత్వాన్ని ప్రశ్నిస్తే, ఎవరైనా ఎదురు తిరిగితే ఏమి జరుగుతుందో చూస్తూనే ఉన్నాం. ఇక ఎన్నికల కమీషనర్ వ్యవహారంలో జరిగిన విషయం అందరికీ తెలిసిందే. ఇక ఇటీవలే, ఏకంగా న్యాయవ్యవస్థ పైనే దాడి మొదలైంది.

మరో పక్క సొంత పార్టీ ఎంపీ కూడా, ప్రభుత్వానికి ఏమైనా సూచనలు ఇస్తే, దాడి జరుగుతుంది. ఆయన ఏకంగా కేంద్రానికి లేఖ రాసి, తనకు సెక్యూరిటీ కావాలని కోరారు. ఇక అమరావతిని మూడు ముక్కలు చెయ్యటం కూడా, దేశ వ్యాప్తంగా చర్చ జరుగుతుంది. మరో పక్క రాజకీయ దాడులు, కక్ష సాధింపు చర్యలు కూడా అధికం అయ్యాయి. ఇక రాష్ట్రంలో ఇసుక దొరక్క, పనులు లేక, జీవితాలు అస్తవ్యసంగా ఉన్నాయి. అప్పు తెచ్చి, ఉచితాలు పంచి పెట్టటం తప్ప, రాష్ట్రంలో జరుగుతున్నది ఏమి లేదు. ఈ నేపధ్యంలో జంధ్యాల రవి శంకర్ చేసిన ట్వీట్ ఆసక్తికరంగా మారింది. బీజేపీ ఎలా వస్తుంది ? ఫెడరల్ వ్యవస్థలో మరో ప్రభుత్వాన్ని శాసించటం సాధ్యమయ్యే పనేనా ? ఏ రూపంలో బీజేపీ వచ్చి, జగన్ మోహన్ రెడ్డిని కట్టడి చేస్తుందో చూడాలి.