news

ఆంధ్రప్రదేశ్ శాసనమండలిలో, నిన్న ప్రభుత్వం ప్రవేశపెట్టిన బిల్లుల పై చర్చ జరుగుతుంది. సీఆర్డీఏ చట్టం రద్దు, అభివృద్ధి వికేంద్రీకరణ బిల్లు రెండూ కలిపి చర్చించాలని శాసనమండలి మొత్తం నిర్ణయం తీసుకుంది. దీని పై నాలుగు గంటల పాటు చర్చ చెయ్యాలని, వైస్‌ చైర్మన్‌ రెడ్డి సుబ్రమణ్యం ఆదేశించారు. ఈ చర్చకు తెలుగుదేశం పార్టీకి 84 నిమిషాలు, అలాగే తెలుగుదేశం నామినేటెడ్‌ సభ్యులకు 8 నిమిషాలు, ఇండిపెండెంట్‌ గా ఉన్న సభ్యులకు 9 నిమిషాలు, వైఎస్ఆర్ కాంగ్రెస్ పార్టీ సభ్యులకు 27 నిమిషాలు, పీడీఎఫ్‌కి 15 నిమిషాలు, బీజేపీ సభ్యలకు 6 నిమిషాల సమయం కేటాయించారు. దీంతో ఈ చర్చను తెలుగుదేశం పార్టీ ప్రారంభించింది. తెలుగుదేశం పార్టీ తరుపున, ముందుగా ఎమ్మెల్సీ నారా లోకేష్ చర్చను ప్రారంభించారు. ఈ సందర్బంగా లోకేష్ మాట్లాడుతూ, ప్రభుత్వం పై విమర్శలు గుప్పించారు. అమరావతిని చంపేసి, మూడు ముక్కల రాజధాని అంటూ, జగన్ మోహన్ రెడ్డి తీసుకున్న నిర్ణయం తప్పు అంటూ, లోకేష్ వ్యాఖ్యానించారు.

జగన్ మోహన్ రెడ్డి తీసుకున్న ఈ నిర్ణయం ఒక, తుగ్లక్‌ నిర్ణయం అని లోకేష్ అన్నారు. అసలు అమరావతిలో ఏమి జరుగుతుందో, వారి బాధలు ఏంటో, జగన్ మోహన్ రెడ్డి అక్కడికి వెళ్లి చూడాలని, కనీసం ఇప్పటి దాకా, అక్కడకు తన ఎమ్మెల్యేలని కూడా పంపలేదని అన్నారు. అంతే కాకుండా, వారిని ఇష్టం వచ్చినట్టు వ్యాఖ్యానిస్తూ, పైడ్ ఆర్టిస్ట్ లు అంటున్నారని అన్నారు. అమరావతిలో ఇప్పటికే ఎన్నో భవనాలు ఉన్నాయని, వాటి వివరాలు చదివి వినిపించారు. ఇన్ని కోట్లు ఖర్చు పెట్టి కట్టిన ఈ భవనాలు, మళ్ళీ అక్కడ కట్టుకోవాలని, ఈ తుగ్లక్ నిర్ణయంతో, పెట్టిన ఖర్చు అంతా వృధా అవుతుందని లోకేష్ అన్నారు. ప్రపంచంలో 195 రాజధానులు ఉంటే, ఒక సౌత్ ఆఫ్రికాకు మాత్రమే, మూడు రాజధానులు ఉన్నాయని, మనం దాన్ని ఆదర్శంగా తీసుకోవటం ఏమిటి అని అన్నారు.

కేంద్రం కూడా తాజాగా, పరిపాలన మొత్తం ఒక్క చోటుకు తీసుకు రావాలని, ప్రయత్నిస్తున్న ఈ తరుణంలో, మనం ఇలా చెయ్యటం ఏమిటి అని లోకేష్ అన్నారు. తెలుగుదేశం పార్టీ సిద్ధాంతమే, అభివృద్ధి వికేంద్రీకరణ అని, మా 5 ఏళ్ళ హయంలో అభివృద్ధి వికేంద్రీకరణ చేసి చూపించామని, దాన్ని ముందుకు తీసుకు వెళ్ళాలి కాని, ఈ పరిపాలన వికేంద్రీకరణ ఏమిటి అని ప్రశ్నించారు. అయితే ఈ సందర్భంలో, ఒక ఆసక్తికర ఘటన చోటు చేసుకుంది. లోకేష్ ఒక సర్క్యులర్‌ గురించి మాట్లాడుతూ, తన సెల్ ఫోన్ చూసి, ఆ సర్కులర్ చదివారు. లోకేశ్ మొబల్ తీసి చదువుతుండగా, బొత్సా కలగచేసుకుని, మొబైల్ ఉపయోగించకూడదు అంటూ చెప్పారు. అయితే మరో సీనియర్ ఎమ్మెల్సీ మాట్లాడుతూ, మేము కూడా ఎప్పటి నుంచో వాడుతున్నాం, సభలో వైఫై సౌకర్యం ఉంది, మేము మొబైల్ లో నోట్స్ రాసుకుంటున్నాం, డాకుమెంట్స్ చదువుతున్నాం అంటూ, ఆయన కూడా లోకేష్ కు మద్దతు పలకటంతో, బొత్సాకి కౌంటర్ ఇచ్చినట్టు అవ్వటంతో, ఇక అక్కడితో సెల్‌ఫోన్‌ పై చర్చ ముగిసింది.

అందరి ఫోకస్ శాసనమండలిలో, తెలుగుదేశం వ్యూహం ఈ రోజు ఎలా ఉంటుంది అని భావిస్తున్న వేళ, ఈ రోజు టిడిపి ఎమ్మెల్సీలను ముందుకు కదల నివ్వకుండా, చేసిన ఘటనతో, టిడిపి ఎమ్మెల్సీలు అవాక్కయ్యారు. ఈ రోజు శాసనమండలి సమావేశానికి టిడిపి ఎమ్మెల్సీలు బయలుదేరారు. అయితే, వారిని సచివాలయం సమీపంలో ఉన్న, ఫైర్ స్టేషన్ దగ్గర, పోలీసులు వారిని అడ్డుకున్నారు. దీంతో తెలుగుదేశం ఎమ్మెల్సీలు, పోలీసులకు మధ్య తీవ్ర వాగ్వాదం చోటు చేసుకుంది. ఎందుకు ఆపారు అని తెలుగుదేశం ఎమ్మెల్సీలు అడగగా, వీరి వాహనాల పై, ఎమ్మెల్సీ స్టిక్కర్‌లు లేవని, అందుకే ఆపామని పోలీసులు చెప్పారు. అయితే దీని పై తెలుగుదేశం ఎమ్మెల్సీలు తీవ్ర అభ్యంతరం చెప్పారు. కారులోనే ఎమ్మెల్సీలు ఉంటే, ఇంకా స్టికర్ లు ఎందుకని, మండి పడ్డారు. కార్లో ఎమ్మేల్సీ ఉండాలా ! కారుకి ఎమ్మేల్సీ స్టిక్కర్ ఉండాలా ! ఏది ముఖ్యం అంటూ, పోలీసులని నిలదీశారు. తీవ్ర వాగ్వివాదం అనంతరం, ఎమ్మెల్సీల వాహనాలను పోలీసులు అనుమతించారు.

తమను మానసికంగా ఇబ్బంది పెట్టటానికి, ఇలాంటి చర్యలకు ప్రభుత్వం పాల్పడుతుందని, మండి పడ్డారు. అయితే ఈ రోజు శాసనమండలిలో, తెలుగుదేశం వ్యూహం ఎలా ఉంటుంది అనే దాని పై, ఉత్కంట నెలకొంది. అలాగే ప్రభుత్వం ఏమి చేస్తుంది అనేది కూడా చూడాలి. అయితే, ఈ రోజు కూడా లైవ్ ప్రసారాలు ఇస్తారా ఇవ్వరా అనేది తెలియాల్సి ఉంది. నిన్న శాసన మండలిలో యుద్ధ వాతావరణం నెలకొంది. ఏకంగా మహిళా సభ్యుల పైకి, మంత్రులు దూసుకువెళ్ళటంతో, అందరూ ఆశ్చర్య పోయారు. ఆ సమయంలో, మంత్రులకు అడ్డు వెళ్ళకపోతే, ఏమి జరిగేదో అని అందరూ అనుకున్నారు. ప్రభుత్వ తీరును తప్పు పడుతూ టీడీపీ ఎమ్మెల్సీ సంధ్యారాణి ప్రసంగించారు. రాజధాని రైతులు చనిపోతే కనీసం పరామర్శించని సీఎం అంటూ ఆగ్రహం వ్యక్తం చేసారు.

అసెంబ్లీ సమావేశాల కోసం డమ్మీ సీఎం కాన్యాయిని తిప్పారన్న ఎమ్మెల్సీ సంధ్యారాణి. సంధ్యారాణి కామెంట్లపై అధికార పక్ష సభ్యుల తీవ్ర అభ్యంతరం వ్యక్తం చేసారు. ఆడవాళ్లను అడ్డం పెట్టుకుని రాజకీయం చేస్తున్నారంటూ మంత్రులు కామెంట్ చేసారు. అయితే ఈ సందర్భంలో సంధ్యారాణికి అండగా నిలిచిన టీడీపీ ఎమ్మెల్సీ నాగ జగదీశ్వరరావు. మాట మాట పెరగటంతో, ప్రతిపక్ష సభ్యుల వైపు దూసుకొచ్చిన మంత్రులు కొడాలి నాని, అనిల్. ఒక్కసారిగా సభలో నెలకొన్న తీవ్ర ఉద్రిక్తత వాతవరణం. ఈ సమయంలో ఉమ్మారెడ్డి సభ్యులను శాంతింప చేసారు . ఇదే సందర్భంలో ప్రస్తుత ప్రభుత్వ విధనాలను తప్పు పట్టిన బీజేపీ ఎమ్మెల్సీ మాధవ్. మూడు రాజధానుల విధానం సరి కాదన్న మాధవ్. ల్యాండ్ పూలింగ్ విధానం మంచిదని.. తప్పులను సరిదిద్దాలని మాధవ్ సూచన.

అసెంబ్లీ సమావేశాల్ మూడో రోజు కూడా గందరగోళం మధ్యే సాగుతున్నాయి. తెలుగుదేశం పార్టీ ఎమ్మేల్యేలు, అమరావతి పై మాకు పూర్తిగా మాట్లాడే అవకాసం ఇవ్వకుండా సస్పెండ్ చేసారని, తమకు మాట్లాడే అవకాసం ఇవ్వాలి అంటూ, స్పీకర్ పోడియుం వద్ద నినాదాలు చేసారు. జై అమరావతి, జై జై అమరావతి అంటూ, నినాదాలు చేస్తూనే ఉన్నారు. అయితే ఈ సమయంలో స్పీకర్ తీవ్ర అసహనం వ్యక్తం చేసారు. నిన్న కూడా జై అమరావతి అంటూ నినాదాలు చేస్తుంటే, స్పీకర్ అసహానంతో, నేను నిరసన వ్యక్తం చేస్తూ వెళ్ళిపోతున్నాను అంటూ వెళ్ళిపోయారు. అయితే ఈ రోజు కూడా స్పీకర్ అసహనంతో, టిడిపి సభ్యులను వారించారు. అయినా టిడిపి సభ్యులు వెనక్కు తగ్గలేదు. ఈ సందర్భంలో మంత్రి కొడాలి నాని మాట్లాడుతూ, తెలుగుదేశం పార్టీ పై, చంద్రబాబు నాయుడు పై తీవ్ర అభ్యంతర వ్యాఖ్యలు చేసారు. అమరావతి అంటూ చంద్రబాబు రోడ్ల మీద తిరిగి అడుక్కుంటూ, డ్రామాలు ఆడుతున్నారని, ఆ డబ్బు అంతా కొట్టేస్తారని, చందాలకు అలవాటు పడి, ఇలా అడుక్కుంటున్నారు అంటూ నాని అన్నారు.

అలాగే మొన్న సస్పెండ్ చేసిన సందర్భంలో చంద్రబాబు, మెట్ల మీద కుర్చుని, మెడలో నల్ల కండువా వేసుకున్నారని, అప్పుడు ఆ మార్షల్స్ కి, కొంత చిల్లర ఉంటే పడేయండి, పోతాడు అని చెప్పమని, హేళనగా నాని మాట్లాడారు. ఇదే సందర్భంలో, నాని మాట్లాడుతూ ఉండగానే, జగన్ మోహన్ రెడ్డి సభలోకి వచ్చారు. దీంతో నాని మాటలకు కౌంటర్ గా, ‘ప్రతి శుక్రవారం కోర్టుకెళ్లాలి.. ప్రతి శుక్రవారం కోర్టుకెళ్లాలి’ అంటూ నినాదాలు చేసారు. దీంతో అడిగి మరీ తన్నించుకోవటం అంటే ఇదే అనుకున్నారో ఏమో కాని, వెంటనే తేరుకుని, వైసీపీ సభ్యులు అందరూ, టిడిపి ఎమ్మెల్యేల వద్దకు దూసుకోచ్చారు. దీంతో స్పీకర్, ఇక పోయి కోర్చోండి, చల్, చల్ అంటూ వ్యాఖ్యలు చేసారు. అయితే స్పీకర్ మాట్లాడే సందర్భంలో కూడా వాయిస్ కట్ అవ్వటం గమనార్హం.

అయితే ఈ తతంగం అంతా చూస్తున్న జగన్, తనను "ప్రతి శుక్రవారం కోర్టుకెళ్లాలి" అంటూ నినాదాలు చెయ్యటంతో, ఆగ్రహంతో ఊగిపోయారు. తెలుగుదేశం సభ్యులు పది మంది కూడా లేరు, మేము 150 మంది ఉన్నాం, తమను రెచ్చగొడుతున్నారు, తమ చేత తన్నించుకుని, సానుభూతి పొందే ప్రయత్నం చేస్తున్నారు, అసలు పోడియం వద్దకు వెళ్ళటం ఏమిటి, వీళ్ళు వీధి రౌడీలు, వీరిని వెంటనే మార్షల్స్ ను పిలిపించి, వారిని కిందకు దించండి, మాట వినకపోతే, ఎత్తి బయట పడేయండి అంటూ వ్యాఖ్యలు చేసారు. అయితే జగన్ చెప్పినట్టే స్పీకర్, మార్షల్స్ ని పిలిచి, టిడిపి ఎమ్మెల్యేలని, వారి స్థానల్లో కూర్చో పెట్టాలని కోరగా, నిమ్మకాయల చిన రాజప్పని ఎత్తి, అసెంబ్లీ బయటకు తీసుకు వెళ్ళటంతో అందరూ ఆశ్చర్య పోయారు. సస్పెండ్ చెయ్యకుండా ఎలా బయటకు పంపిస్తారు అంటూ అందోళన వ్యక్తం చేసారు.